Ads by Google Ads by Google

Alofa: Fa'avae ai Aiga— Vaega 132

Ua tamo’e mai nei le tuafafine o Mikaele ma tau valavala’au mai i a Minalosa, na liliu nei i ai le teine ma taalo atu lona lima i le tuafafine la’ititi o lona to’alua, le teine o Melina. Na te’i lava ua le toe tautala Eteuati i lea taimi, ae ua na o le sioa atu nei i le tama’ita’i lea e savali mai nei e fa’afeiloa’i i latou. Na fa’apea mafaufauga o le tama, “E le soso i le tama’ita’i o Loimataoapaula.”

Ua ‘ata nei ma toe tilotilo ane i si ona tuafafine i lea taimi. Na fa’ateia Loimata i le ‘ava’avau ane a Eteuati, “Se tala maia ou aao, o lea e fa’atalitali atu lau auauna, anusa, ua pei o le fa’amaliliu a le pulinisese se au faiga, fai fa’alelei mai au faiga, va’ai oe i toe momoli nei lava oe i Samoa, ae ou nofo na o a’u i Tutuila.” Ua galo i a Eteuati, ana le malie lo la tina e sau Loimata, na te le va’ai i le lalelei o le Motu o Fiafiaga, a’o lea ua faifai tala nei i lona tuafafine, a’o Loimata na mafua ai ona alu i Tutuila.

Ua oso mai nei i lalo mai le ta’avale le teine o Loimata ma ona fa’alogona ua le mautonu i lea taimi. Na i ai lona manatu o le a ia maua le fiafia pe a taunu’u i Tutuila, a’o lenei ua va’ai atu, ua leai se toe fia i ai. Pau le mea ua mana’o i ai, o le toe fia oso i le va’alele lea na sau ai ma toe foi i Samoa i ona matua ma lona aiga.

E le i ulufale le malaga i totonu o le fale, ae fa’alogo atu Minalosa, o lo’o tatagi mai le la telefoni o lo’o i totonu o le fale. Na fa’anatinati atu nei Minalosa i lona to’alua, e tatala le faitoto’a ma tali le telefoni ona o le fia iloa po’o ai ua vala’au mai, a’o lea e le i ulufale le malaga. Na muamua la’a i totonu o le fale i a Mikaele, ma ua a’apa atu loa i le telefoni, “Oi, talofa Tagiilima, ioe, o lea ua fa’atoa matou taunu’u mai lava, o lo’o i fafo  Minalosa ma Loimata ma Eteuati e le i o’o mai i totonu o le fale.” E le i umi lava ae ulu fale loa i totonu le solo a Minalosa ma Eteuati, ae ua fa’atatoso mai i tua le la’a a Loimata.

“Tagiilima, ‘aua e te popole mai i tamaiti, o lea ua matou taunu’u manuia mai i Tutuila. Aua le fa’amamafa i lou loto tamaiti, o lea ma te i ai ma Minalosa.” Na fa’alogoina e Mikaele le tagi mai a le lo’omatua i luga o le telefoni, “Tagiilima, se ‘aua e te loto vaivai, ‘aua fo’i e te popole mai i a Loimata, o le a ma va’ava’aia lava ma Minalosa le teine, ‘aua e te popole mai.”

Na liliu ane nei Mikaele ma vala’au ane i a Minalosa e fai i a Loimata e alu atu i le telefoni. Ua tu nei le teine ma ua tu’u ane i ai e Mikaele le telefoni se i talanoa i lona tina. “Tina, o lea fa’atoa matou taunu’u mai lava i le fale, sa lelei lava le sau a le va’alele. Tina, se ‘aua e te tagitagi mai, va’ai oe, o lea ma te iinei ma Eteuati o lea fo’i e i ai Minalosa ma lona to’alua, ‘aua e te popole mai ia te a’u.” Na fa’alogoina e le teine le tagi mai a lona tina i le telefoni, ma o le ala lea na tu’u atu ai loa i lona tuagane o Eteuati le telefoni se i fai se tala i lo la tina.

Na ona u’u lava e Eteuati le telefoni, alu loa ma ana fa’amatalaga i lona tina e le i toe fa’atali. “Tina, se ‘aua e te loto vaivai fa’apena, o lea ua ma taunu’u manuia mai ma Loimata, ia ua i ai fuafuaga a si vaega lea, e o e fa’atafafao ma’ua taeao i le taulaga o le Motu o Fiafiaga. Aua e te popole mai i a Loimata, ia o a fo’i na ituaiga faiga, o lou popole mai i a Loimata ae fa’afefea a’u?” Ua ‘ata nei Eteuati i lea taimi ma tilotilo ane i a Minalosa ma lona to’alua, lea ua tali e ane nei i tala a Eteuati ua fai i lona tina.

“Se onosa’i lau fasi se i ou toe fo’i atu ona e fuli fo’i lea e tau’ai ta ita i ma’a, ma ipu ma isi mea e tele. Tina, se ‘aua e te fa’apena mai, soia ia le vaivai so’o lou loto ne i te’i ua e ma’i. Va’ai oe Tina, afai e te toe fia va’ai ia te a’u, tu’u ia Loimata ia e le taulia, ae a e toe fia va’ai i si a’u tama o a’u, lau tama e sili ona usita’i ma alofa ma fai mea uma lava e te mana’o ai, ona ‘aua lea ne i mamafa i lou loto lo’u alu ‘ese mai. Ae tatalo i le Atua ia puipui ma‘ua i le ma nonofo ai i Tutuila nei, e Tina.”

Ai po’o le a se tala a lona tina ua fai mai i ai, lea na toe fa’alogologo nei Minalosa ma lona to’alua ma Loimata o ‘ata Eteuati ma fa’apea lana tala, “Se Tina, e te nofo lava ma ki a’u i lalo, o tina uma fo’i e si’i i luga a latou fanau, ae ‘ese lava oe, e te nofo ma soli a’u i ou vae.” Ua fa’alogologo nei le to’atolu lea, ae ua fai lenei ma lena a Eteuati i lona tina. O le mea ua tupu, ua alu lava fa’amatalaga a le tama ma lona le iloa e alu alu lava te’i ua fa’alogo atu ua fa’ai’i lona leo.

E le o ano lava la i ai Eteuati i lea taimi, ae o lo’o pu’e uma i meapu’eata a Loimata ma Minalosa fa’apea Mikaele ana fa’amatalaga lea e fai i lona tina.