Ads by Google Ads by Google

Alofa: Fa'avae ai Aiga— Vaega 129

“Tagi, ua lelei, ou te fa’amo’i atu ia te oe le lo’omatua, ae ou te mana’o ia e mafaufau lelei i le itu lenei, o lea ua ma’ea ona tu’u mai e le ta tama lana meaalofa ua sili ona lelei mo i ta’ua, o lea ua i’u manuia ana a’oa’oga, ua ia maua fo’i fa’ailoga maualuluga a le au fa’ai’uaso, o lea fo’i ua ia maua le sikolasipi e malaga ai i fafo, e fa’aauau ana a’oa’oga.

O le taimi la lenei, afai o lona mana’oga lea, e fia alu i Tutuila, ua lelei tele, na ona alu lava se i tafao mo le lua vaiaso ona fo’i mai lea, lua ona vaiaso tatou te mafuta ai, ona sauni loa lea o lana malaga i Ni’u Sila.”

Na umi ona fa’atalitali e Lameko se tali a Tagiilima, ua na o le moei’ini o mata o le lo’omatua ma lulu lona ulu. “Tagi, tu’u tama’iti e o, afai ta te taofiofi mau pea i ai, o le a le lumana’i o tama’iti o le a maua. Ua ma’ea le ta galuega mo i latou, sa ta tausi, tu’u atu i a’oa’oga, o lea ua i’u manuia uma le ta fanau. Tatou te le mafuta pea ma tamaiti, aua o le a le finagalo o le Atua ia ta’ua, ae ua ta va’ai atu ua manuia o latou olaga. Ou te iloa le faigata ona e tu’u ‘ese atu Loimata ma oe, e moni a oe, e fa’apena fo’i fa’alogona ia e i ia te a’u. Ae ua ou loto malosi lava, e tu’u le teine e alu, se i o’o atu fo’i i le la motu pe o le a sana va’ai, ona toe fo’i lelei mai lava lea ma sauni lana malaga i Ni’u Sila.”

Na iloa e Lameko le tagi a Tagiilima i lea taimi, ua a’apa ane nei ma u’u le pito o lona ofu moe ma soloi ai ona mata, ua ‘ese fa’alogona ua o’o i le lo’omatua. Ua le mautonu le mafaufau o Tagiilima, afai nei ae tu’u atu Loimata e alu i Tutuila, e alu lana tama ma lona fatu ma lona loto atoa.

“Lameko ua lelei, ua ou loto malie e alu Loimata i Tutuila ae ia e iloa lelei, e alu ‘ese atu si a’u tama e pele ia te a’u, ma lo’u loto ma lo’u agaga atoa Lameko. E le o se mea faigofie le alu ‘ese atu o Loimata ma a’u, e moni oe, e faigata ia te a’u, ae ui i lea, e moni fo’i oe, tatou te le mafuta pea ma tamaiti. A taofiofi fo’i, e o’o ai o latou mafaufau i nisi tulaga, ae ua ou malie atu Lameko, sauni Loimataoapaula e o ma Minalosa ma lona to’alua e tafafao i Tutuila,  ae fa’apenei tasi lava la’u talosaga Lameko, e a pe a o ma Eteuati la te to’alua, ona o la toe fo’i mai ai lea.”

Ua tali le toeaina ua lelei e sili fo’i lea, na i lo’o le tu’u o Loimata e alu na o ia i Tutuila. Na toe manatua vave nei e le toeaina o Lameko le tulaga na o’o i ai le tina o Tagiilima, le lo’omatua o Silia ina ua alu ‘ese mai Tagiilima ma le aiga. Na fa’apea ifo mafaufauga o le toeaina, pe ua sa’o ea lana fa’aiuga ua fai, ina ne i tutupu mai ai nisi tulaga i a Tagiilima, pe a alu ‘ese atu Loimata.

            Ua lagona e Tagiilima le tiga, o le tu’u atu o fanau e o, ona fa’atoa pau lea o se tulaga ua o’o i ai la’ua ma le la fanau, ua fa’atoa pau fo’i lenei o se taimi o le a o ‘ese ai le la fanau mai totonu o lo latou aiga. E le o se tulaga faigofie i le lo’omatua, peita’i, ua ia lagona lava, e sau le taimi ma le aso, e iloa ai e Loimataoapaula, e leai se fiafiaga e maua e le tagata, se i vagana o ona matua ma lona aiga moni. 

Ua sauni nei le malaga a Loimataoapaula, Eteuati, Minalosa ma lona to’alua o Mikaele mo Tutuila, le Motu o Fiafiaga, Amelika Samoa.