Ads by Google Ads by Google

Alofa: Fa'avae ai Aiga— Vaega 128

“Ua ma’e'a ona tu’u mai lau meaalofa mo ma’ua, ua i’u manuia au a’oga. O le ma meaalofa lenei mo oe, ua ma malilie fa’atasi ma lou tina, e te alu se i e tafao i Tutuila, ona e toe sau ai lea.” Ua fa’anunumi nei mata o le lo’omatua o Tagiilima ma tilotilo atu i a Lameko i lea taimi, ma fa’apea ifo ona mafaufauga, “Meko, ua tasi si au mea sese.”

“Lameko, ae a pe a e onosa’i, se i tu’umuli le teine ona ta talatalanoa lea e tusa ai ma lona mana’o?” Na toe manatu nei Lameko, e sa’o lava Tagiilima, se i o la talatalanoa lelei e uiga i le mana’oga o Loimataoapaula.

“Loimata, ta’atia mai lou mana’o se i o ma talatalanoa ma lou tina, e le o se mea faigofie le tu’u atu o oe e alu. Ae tu’u mai se avanoa se i o ma talatalanoa ma lou tina ona toe logo atu lea o oe.”  Ua tali Loimata ua lelei, na savali atu nei ua sogi atu i lona tama, na toe liliu ma sogi atu i lona tina, ma ua tula’i ‘ese loa.

            O le taimi lea ua usi le fa’afofoga ma le fa’alogologo a Eteuati i fa’amatalaga a Minalosa lea ua fai ane ia te ia e uiga i le Motu o Fiafiaga.

“Minalosa, o lona uiga, a tasi le tala Amelika, e fa’atoluina i Samoa nei, a fa’apea la o le na le tulaga o lo ’o i ai, e malosi la le tala Amelika e sa’o a’u.  Ia letioa lava a tele tupe a le aiga o Tulele. E te iloa oe, e to’atolu le fanau a le toeaina ma le lo’omatua o lo ’o i Tutuila. E to’atasi le tama ae to’alua teine, letioa a la a maua tupe a isi aiga, ta’i 'aulelei Tutuila latou, ua sau fo’i ma lo’u fia alu i le Motu o Fiafiaga, se i ou matamata i le matalasi o Tutuila.

Ua ‘ata Minalosa ma tilotilo ane i lona tausoga o Eteuati, o lea ua salusalu tala ane nei i le fa’amatalaina o le Motu o Fiafiaga. Na fetaui tonu lava le taunu’u ane o Loimata ma le fa’agasologa o le fale talatala lea ua fai nei a Eteuati ma Minalosa. Ua fa’alologo taliga o Eteuati i tala e fa’amatala e Minalosa, o le mea ua tupu, e tau le mamalamala Eteuati i tala ia e fai atu nei e Minalosa. O Loimata, ua matua’i siamu le teine i le tala’aga o Amerika Samoa, le Motu o Fiafiaga, o le motu sa fa’aigoa muamua o le Motu o Salaia, ae ua suia nei i le Motu o Fiafiaga, Tutuila, Amerika Samoa. O tulaga ia na a’oa’o ai Loimata i le Kolisi a’o alo atu mo le sa’iliga o le poto ma le atamai.

Ua amata nei le talatalanoaga a Lameko ma Tagiilima, ua le iloa po ’o se talatalanoaga po ’o se misa lea ua fai nei i totonu o le la potu moe.

 “Meko, se o ou uiga a ia, va’ai oe, ua ou iloa lou faitama leaga i a Loimata, ua uma ona ou talatalanoa atu ia te oe i le mea e fai. Ae e le mafai lava oe, e ui ina fa’apea e to’atasi Loimata, ae ‘aua le faia fa’apea. O au mea ia, e o’o ai i isi taimi ua le iloa e Loimata a’u. Ua e va’ai la Lameko i le tulaga mata’utia lea e aliali mai nei, talutalu ai oe. Ou te iloa ai ana le fefe le teine ia te a’u oka oka e, Lameko, e soli vaelua ta’ua e Loimata. O le matua alofa moni i lana fanau, e sasa ma fa’atonu, a’oa’i, velo atu i ai 'upu lelei ma 'upu le lelei e a’oa’ia ai le mafaufau o le tamaitiiti, ae le o le fai fa’apepepepe ma fa’apelepele fa’apena, e le maua ai se i’uga lelei o se tamaitiiti.”

Ua le tautala Lameko i lea taimi, ua lagona i lona loto e sa’o lelei lava Tagiilima i ona uiga ia. Ae sa ia manatu fo’i i ni isi itu ona o lea ua tu’u mai e Loimataoapaula le meaalofa ua sili ona lelei mo i la’ua, e tatau fo’i la ona o la tu’u atu i le la tama se meaalofa mo ia.

E faia pea!