Ona toe manatua ai lea e Mikaele le pisinisi a Polo ma lana ave pasi o Tu, a’o le i o’o atu Tu ma le tupe e tu’u i le lima o Polo, ua uma ona faitau e Tu le tupe e o’o ia Polo ma le tupe e tu’u ia te ia, ona fa’apea lea o le faitau a Tu, “Tu, Tu, Polo, Polo, Tu, Tu, toe Polo tasi, ona Tu, Tu, Tu ai lava lea, ioe, ua tele a Tu, ae la’ititi Polo, ma ua gau a’ano ai loa ma si toeaina o Polo i le va lea.

O le aiga o Mikaele i Tutuila e fai pisinisi pasi a lona tama, ma o Minalosa o lo’o fai ma teutupe a le toeaina, o Minalosa fo’i e fa’amaopoopoina lisiti o pisinisi. O ia e faitauina tupe pe a o’o mai avepasi e au mai a latou tupe na maua i lea aso ma lea aso. O Mikaele, o lo’o faigaluega lelei ia i le isi kamupani ma e le aia ia i le pisinisi a lona tama,  o lea ua fa’aopoopo i ai ma le ioga o Minalosa i totonu o le pisinisi a le tama o Makaele.

Ua ma’ea le fa’auga o Loimatamaoapaula, ma ua alo loa ona matua ma aiga galua mo le ‘aiga a le tama’ita’i. O le va’aiga mata’utia na molimau nei e le mamalu o le au vala’aulia i lea aso. Ua foliga mai o se ‘aiga o se fa’aipoipoga ae le o se ‘aiga o le fa’au’uga. O mea lelei uma a matua o Loimata fa’apea o la tau aiga, ua tu’u atoa atu aua le fa’amoemoe o Loimataoapaula.

 A’o ai se o le a le fiafia, ona ua maualuga le fa’aeaea a le tama’ita’i i ona matua ma ona aiga, lea ua alalaga fiafia ai nei ma punou e fa’atino mea uma, aua fai mai upu o le tusi,  o le ua fiafia, ina pese ia. O le tualga lea ua fa’atino nei e agia o Lameko ma aiga o Tagiilima ona o alofa’aga ma pelega mo Loimataoapaula, ina ua i’u manuia ana taumafaiga e ala i ana a’oa’oga.

Ua laga nei le ulu moega a le lo’omatua o Tagiilima aua fa’aaloaloga mo Fa’afeagaiga ma le mamalu o le au vala’aulia na fa’atasi ai. E ofo le loto i le va’ai atu i le ta’atitia mai o ie Samoa moni i le moega o le lo’omatua o Tagiilima. O ie uma nei, o ie na teu lava e le lo’omatua talu mai le la fa’aipoipoga ma Lameko. O lona mafaufau sa i ai, ia fa’amanatu ai pea aso o le le tagolima ma aso o le taumafai sa ola mai ai.

Na tau nei Minalosa ma lona tina, fa’apea nisi o teine o le aiga o Lameko i le ie ua sili ona manaia, ma e leai se ie fa’apea o toe va’ai i ai. O le ie fo’i lea o lo’o afifi ma malu lelei i totonu o le pepa i’ila, e leai se ‘atia pe i ai fo’i se tulaga e ono fa’apea ai ua le toe aoga.

Ua ave’ese nei le pepa i’ila lea ma fa’aaliali atu i a Tagiilima le ie, ua ‘ata le lo’omatua ma fa’apea ane, “O le ie le na, o le ie na au mai i si o’u tina o Timena, talofa e, i a Timena, ma’imau e, le olaga pe ana le seanoa le oti, o si o’u tina fa’aleAualuma i tua. O le ie na au mai ai o’u fala e le Aualuma i le aso o la’u fa’aipoipoga, na lafo lava le tala a Timena e fa’apea, “Tagiilima, o le ie lenei, o le ie fa’apitoa lava mo oe, ma o le ie fo’i na ou faia, ia e teu lelei le ie lenei, afai ae le toe alofa Lameko ia te oe, e tasi lava lau tu’i oti uma. Ae ia e tu’i lava i le tu’i e te mautinoa e uma ai, aua a le uma, o lona uiga, ou te va’ai atu ua afiafi mai ai oe, ma ou te le fia pupula atu i ai.” Ua alu nei le tali e, a Minalosa ma teine na lagaina le moega. Ae sa o latou va’aia le maligi ifo o loimata o Tagiilima i lea taimi, ua toe fa’asolosolo ona mafaufuaga i le amataga mai o lona olaga.