Ads by Google Ads by Google

Alofa: Fa'avae ai Aiga— Vaega 122

 “E talofa e, i nai o’u tuagane, si o’u uso Malia, ua ou le logo atu outou, ona ou te iloa le mamao o le ala. A’o lenei ua outou o’o mai, e talofa e, i si o’u aiga, fa’afetai i lo outou manatu mai ia te a’u ma si a’u fanau. E talofa e, i nai o’u tuagane e pele ia te a’u, si o’u uso Malia, tiga ona mamao le ala, ae ua e sau lava.

Ae po’o le a se aoga o Loimataoapaula ia te outou. Talofa e, i si o’u aiga e pele i lo’u loto.”

 Na fa’alologo le Faifeau ma tagata o le nu’u na i ai i le fa’au’uga o Loimata i le tagi talatala a le lo’omatua i lea aso. O le fa’aulaga o Loimataoapaula, o lo’o auai ma tagata o le aiga o Lameko i le taimi lea, ma ua le maua se avanoa ona o le to’atele o tagata na o’o ane e fa’aula le tama’ita’i. Na fa’apea le musumusu a se tasi o tina o le aiga o Lameko i a Maselina, “O le lo’omatua lenei, e fai mai lava ia o lona aiga, o lona aiga, ae o le a fa’afefea tatou ia, e le o tatou o sona aiga?”

Ua ‘ata’ata Maselina ma fa’apea ane, “Ia, onosa’i i le onosa’i a Iopu, o le a e tagi talatala mai nei la, e pule lava Tagiilima, ae a fesili ifo i le loto ma le mafaufau, a’o a la mea o fai e Tagiilima i lo tatou aiga. O le tali, o mea uma o le aiga lenei, e fa’atino e Tagiilima, e leai se mea e tasi e pau i a Tagiilima, o le alofa le na o le lo’omatua i lo tatou aiga, e sa’o a’u pe se se?” Ua le tali mai le lo’omatua o Sele, lea na muimui, ae ua tali mai e le isi tausoga o Lameko, le lo’omatua o Ana, “E sa’o.” Na toe fa’apea atu nei Maselina, “Ia tu’u la’ia, e leai lava se mea o le a tatou pisa ai fua, e pule lava Tagiilima i ana mea e fai.”

Na toe liliu ane nei Maselina i le isi ona tausoga lea na fai ane le tala, ae ua leai se isi o toe tu i ona talane. Ae fa’apea ane le musumusu a le lo’omatua o Matalena ia Maselina, “E a, o le susu toto’o a Paulo, po’o le felesi miki a le palagi?”

Ua alu nei le talie a lo’omatutua, ma tilotilo atu i le fa’aulaga o Loimataoapaula lea ua tumutumu ai nei le aiga o Tagiilima mai tua. Ua lagona le mimita o le lo’omatua, ua lagona le fiafia o lona loto, ua mausali ma ua taui mai e le Atua ana galuega sa fai. Ua ma’ea a’oa’oga a lana fanau tama, e leai se tasi na pau, o lea ua faigaluega lelei uma, a’o lea fo’i ua toe tula’i mai Loimata, o se tulaga e lagona ai le loto fa’afetai i mea uma lava. 

Ua gasolosolo nei tagata e fa’aula le teine o Loimataoapaula, ua alu alu le fatuga o ula, ua le iloa atu foliga lalelei o le tama’ita’i. Na i’u ina toe to ‘ese isi ula, ae toe alu atu le isi vaega. Na o’o mai nei le teine i le isi itu, ae na vala’au ane i ai lona tina, na fa’ateia Loimataoapaula ina ua iloa mai tuagane o lona tina ma le uso o lona tina o Malia ma a latou fanau, e le gata i lea, a’o nisi tagata o le aiga sa ia feiloa’i i ai i le vaiaso atoa na nonofo ai ma lona tina i lona aiga.

“Sio, talofa e, ua outou o mai mamao lava ae e le i logoina outou, fa’afetai lava,” Ua le mafai e le toeaina ona fai ane se upu ia Loimataoapaula i lea taimi. Ua liliu nei Loimata i le isi itu ma feiloa’i atu ai i le isi tuagane o lona tina, le toeaina o Tovi’o ma lana fanau. Ua fa’apena le uso o lona tina, le lo’omatua o Malia ma lana fanau.

Na fa’ateia le teine i le va’ai mai i a Minalosa, le afafine o Lolesio lea e nofo tane i Tutuila. Na gata le va’aiga a Loimata i a Minalosa, a’o a’oga i le a’oga Tulagalua. Ua sui le va’ai a Loimata i lona tausoga lea. Na oso fiafia atu nei Loimata ma fusi mai Minalosa ma ‘ata. “Malo lava le taumafai Loimata, amuia oe, ua i’u lelei au a’oga, malo lava le onosa’i, malo fo’i i lou fa’aeaea.”

Ua fusi mai nei e Loimata le afafine o le tuagane o lona tina ma ‘ata. “Loimata, o lo’u to’alua lea, o Mikaele, na vala’au atu le toeaina ia ma o mai se i o’o mai Mikaele i lo’u aiga, ma ia ma o’o mai i lou fa’au’uga, o lea la ua ma o’o mai ai nei.”

Na iloa ane nei e Tagiilima le afafine o lona tuagane o Minalosa ma savali ane loa i ai, “Minalosa, talofa e i si o’u tei, na e sau ana fea?” O le fesili ane lea a le lo’omatua, na tali Minalosa na o la o’o atu ma lona to’alua o Mikaele. Ua tu’u ane nei le lima o Mikaele ma fa’atalofa i a Tagiilima. “Mikaele, o le tuafafine lea o lo’u tama, o Tagiilima, o lana tama lea e fa’au’u nei o Loimataoapaula.”