Ua amata ona maligi ifo loimata o Eteuati i lea taimi, ona ua lagona lona fefe i lona tina. Na savali ane nei ma saofa’i ifo i le nofoa lea na nofo ai muamua. Ua la’a ane nei Loimataoapaula ma nofo i talane o lona tuagane i lea taimi, e le i toe taofiofia le lo’omatua i lea taimi, “Eteuati, o le a le mea lea na ou fa’alogologo atu i ai, ua sui e a lou leo.

Se i va’ai i le vave ona sui o lou leo, na ou alu nei i tua i lo’u aiga, o e leo tama, a’o lea ua ou fo’i mai ua e leo teine, aisea, o le a le mafuaga ua e fa’apena ai.” Ua le tautala Eteuati i lea taimi ua na o le tilotilo ane nei i lona tama, aua na te iloa lelei lava, na o lona tama e mafai ona sulu i ai i lea taimi.

Ua le ea i luga le toeaina o Lameko, ua na o le punou ma fa’alogologo i le ata nenefu lea o le a fai e Tagiilima. “Eteuati, fa’alogo lelei mai lava ou taliga, afai o le a e o’o i le tulaga lea ua fa’alogo atu i ai o’u taliga, ona tapena lea o lau atopa’u ma e alu i le mea e te alu i ai. Va’ai oe, ua ma le mafaia ma lou tama ona taofiofi oe, ua ou fiu fo’i e tautala atu ma fautua atu ia te oe, ae ua le mafai lava. O lea fo’i na ou fautua atu ia te oe, o le mea lena e fai i ai lou loto, a’e loto tele ma e malosi, e mafai lava ona e tete’e ‘ese. O le tulaga lea ua ou va’ai atu nei i ai, ua le toe mafai ona toe taofiofi oe ali’i Eteuati. O le a ea se mea ou te faia ina ia mafai ai ona e liliu mai ma e talia a’u fautuaga e tu’u atu pea i aso uma ma taimi uma ta te fa’atasi ai. Ou te ofo ia te oe Eteuati, ua e le alofa mai i a ma’ua ma lou tama. O la’u tala lena ua fai atu, afai loa e fai pea lou le usita’i, ua sili ona tapena lau atopa’u ona e alu lea e fai lou loto ma fai lou ivi i le mea e gata mai ai lou malosi. Ou te le fia pupula atu ia te oe ma ou uiga ia ua sui mai. Po’o le  a lo’u alofa ma lou naunau ia te oe la’u tama pele, ua sili ia te a’u ona tu’u oe e fai le mea e te loto i ai.” Na fa’alogoina i lea taimi le masusu a Eteuati. “Eteuati, po’o fea lava e te alu i ai, e toe lagona mulimuli ane a ma fautuaga ma lou tama, ua leai se aoga, ua masa’a le ipu vai, le ipu vai o o ma loimata, i lou alu ‘ese atu, ma lou le usita’i i a ma’ua. E leai se fiafiaga e te maua, a e fiafia fo’i, e alu alu lava gata, a’o lou fiafia i lou aiga moni na e ola a’e ai, ma e mafuta ai i aso uma o lou olaga, o le fiafiaga lea ua sili ona atoatoa. A ua e le usita’i ma ua e le fa’alogo mai i a ma fautuaga ia te oe, alu e fai lou loto.”

Ua na o le punou o le toeaina o Lameko e aunoa ma se tala. Ua ia toe manatua fautuaga lelei ma tima’iga sa ia tu’u atu i lona atali’i o Eteuati. O fautuaga ma upu lelei na lafo i ai e lona tina, a’o lea ua va’ai atu, e le suia, ma atonu fo’i e le mafai ona toe tu’ua. E le i mafai ona fai ane se tala a Eteuati i lona tina i lea aso. Ua tonu nei i lona mafaufau se i sema se taimi e fa’asaosao ai si ona va’a, mo lana fa’atoesega.

Ua o’o nei i le aso e fai ai le tauvaga lea ua uma ona fa’aulu ai le igoa o ‘CindyRose’. Ua leai se siaki a Eteuati, ua alu uma i le fa’atauina o ana teuga mo lona fa’amoemoe. Ua le maua se moe ma se malolo a le tama, ua leai se siaki e tu’u i lima o lona tina, fa’atasi ai ma fuafuaga ia ua uma ona fa’ataoto e Lipine le uso o lona tama, mo le tauva’aga.

Na toe manatua nei e Eteuati, e sili pe a fa’ailoa i a Lipine le mea na tupu i lona aiga, ina ua toe fo’i mai le malaga a lona tina. Ua na o le ‘ata o Lipine ma fa’alogologo i le fa’amatalaga a Eteuati. “E te iloa la ali’i tama, e sili ai loa pe a tu’u, fai mai le upu fo’i lea, e sili le usita’I, na i lo le ga’o o le mamoe po’a. O lea ua talanoa ane si ou tina, va’ai oe, o lou tina e pele ia te a’u, e iloa lelei lava e Tagiilima le tulaga lea. Ae a iloa mulimuli ane e le lo’omatua, o a’u lea e taulamua ona fa’aosooso oe, o lona uiga e lavevea fa’atasi ai ta’ua i le va lea. E sili loa la pe a e malolo lelei si o’u tei fo’i, ae, a e malie, au mai au teuga ua uma ona su’i, ou te fa’aaogaina.”