O se afiafi ‘ese lea i le mafutaga a Lameko ma Tagiilima ma le la fanau. O tama fo’i, ua le mautonu o latou mafaufau po’o le a le mafua’aga ua fa’apea ai lo latou tina. O lea sa fa’amatalatala lelei lava le mea na tupu i lona aiga, a’o lea ua toe fo’i ane, ua ‘ese le tulaga lea ua i ai lo latou tina.

O mea uma na tutupu i lona aiga, ua teu i le loto o Tagiilima, aemaise ai o le taimi o le latou fa’amavaega ma nai ona tuagane ma si ona uso o Malia. Na o’o i lona loto se manatu e fa’apea, atonu o le latou toe feiloa’iga mulimuli lea ma ona tugane, atonu fo’i o le taimi mulimuli lenei o le a toe va’ai ai i foliga o Lolesio, Tovi’o Tomasi, Toetu ma Malia, ona ua ia toe manatu, ua matutua ua le toe laiti. O le tulaga lea na mamafa i le loto o Tagiilima. Ua pau le mapusaga o lona loto, o le fa’atasi ma mafuta lea i si ona to’alua ma le la fanau e pele ia te ia.

Ina ua ma’ea le fa’amatalaga a le lo’omatua i mea na tutupu i lona aiga, ua o’o nei le fa’asologa i le fa’amuli a Lameko ma lana fanau tama. Ua fa’amatalatala uma nei e le toeaina mea na tutupu i le fa’amuli, a’o to’esea Tagiilima ma Loimata. Na fa’amatala e Lameko le fa’atoaga, e leai se mea o fa’aletonu, o le fale e leai e mea e masepu i totonu o le fale, ona sa va’ai e Eteuati. “Ia o le tatou fale, o le na ua oulua va’ai atu i ai, ua sui atoa le va’ai, ma o le matafaioi lea na tu’u atu i a Eteuati na te tauaveina.” E le i uma mai le tala a Lameko, ae oso atu Eteuati ma lona leo fa’ai’i, “Tama, e le o Eteuati, o Cindy Rose, e tu loa le teine i lona tofi, ua uma mea uma o le lalolagi nei.”

Ua le iloa pe talie pe feitai i lea taimi, ae ua ma’oga a’e i luga le ‘ata a lona uso o Emani ma tilotilo ane i lona uso la’ititi. Ua alu nei le talie, ae ua tu a’e i luga Eteuati ma tele’ai i tua. Ua mao lana tala i lona tama, a’o lea e saofa’i lona tina. “Lolesio, tu’u mai ia te a’u le pulumu, tu’u mai le pulumu…..” Na topetope nei le savali a Eteuati ma lana tomumu, “O le lo’omatua lenei se, sa fa’apea fo’i o le a alu i lona aiga toe fo’i mai ua sui, a’o lea ua atili ai ona nunumi lona mafaufau, e le lalolagi e, ma mea o tumu ai.” Na tilotilo ane nei i ai lona tina, “Eteuati, a uma mea ia ona ou liliu atu loa lea ia te oe.”

Talofa, e fiu lava e na na le tama’i moa ae i’oi’o mai lava. Ua le mafai e le lo’omatua o Tagiilima ona taofiofi lana ata i lea taimi, ua tete’i i le fa’alogologo atu i le leo o Eteuati, ua pei o le leo o Loimata. Na alu alu nei le talie’ega lea, fa’ai’u loa i le tauvalauga o Eteuati, “Eteuati, Eteuati, savali mai i luma o lea matou te fa’atali atu ia te oe, savali mai i luma.” O le tau manuo lea a lona tina. Ua na o le tu nei o Eteuati ma pupuni lona gutu i tua o le faitoto’a ma fa’alogologo mai i le talie’ega lea ua fai nei a ona matua ma ona uso, fa’atasi ai ma lona tuafafine, ia te ia. Na ona tope lava o le fa’ailoga o le koluse a Eteuati, savali fa’atama mai loa i luma, i le potu malolo lea o lo’o i ai uma ona matua, o ona uso, ma lona tuafafine e to’atasi o Loimataoapaulua.