Ua na o le fa’alologo o taliga o tama, a’o fa’amatalatala e lo latou tina le mea na tupu i lona aiga. O nisi o taimi a o’o loa i le tulaga lea na fai ai a latou faiga tala ma ona tuagane ma lona uso, ua va’aia e tama le maligi ifo o loimata o lo latou tina. Na alu alu lava fa’ai’u e le lo’omatua e fa’apea, “Lameko ma si a’u fanau pele, po’o a lava mea na tutupu i tua i si o’u aiga, e le mafai, le mafai lava ona ou fa’agaloina lo’u aiga.

O le a lava lo’u nofonofo i inei i lou aiga Lameko, e le mafai ona galo ia te a’u si o’u aiga. Le aiga e fai i ai tala a tagata e matitiva, le aiga e fai i ai tala a tagata e fa’amimisa, le aiga e fai i ai tala a tagata i o latou loto, le aiga lea ua lafo mai ai le tala a la’u tama teine e to’atasi o Loimataoapaula, e le toe fia o’o i ai. Lameko ma si a’u fanau pele, o le aiga e pele i lo’u loto ma lo’u agaga.”

 Na liliu nei le lo’omatua i lana tama teine, “Loimataoapaulua, avea lenei taimi ou te fa’apea atu ai ia te oe si a’u tama pele i lo’u loto ma lo’u agaga, afai ua e va’ai i si o’u aiga i le tulaga o lo’o i ai nei, o iina e taula’i i ai lau vaai ma lou loto ma lou agaga. Po’o a fo’i mea na tutupu a’o ta i ai i lo’u aiga, ia natia i tulimanu e fa o le fale lenei, ia ‘aua ‘aua ne i o’o atu i fafo o le faitoto’a o le tatou fale, ua e fa’alogo mai.?” Ua a’apa ane nei Tagiilima ma tau toso a’e i luga lona solosolo na togi ane e si ona tuagane o Lolesio. O le solosolo na lafo atu e lona afafine o Minalosa lea o lo’o nofo tane i Tutuila.

E lafo ane tala a le lo’omatua ma ona loimata e le ma tu. “Lameko, o le a fo’i sau va’ava’ai mai ia te a’u ma lo’u nofonofo atu i totonu o lou aiga, ia e alofa fa’amagalo mai a’u ma la’u fanau, i se mea ua matou sese ai i totonu o lou aiga. E momoli atu la’u fa’afetai tele Lameko ma si a ta fanau, ona o mea na momoli atu i tua i lo’u aiga, ua lagona le fiafia o lo’u loto fa’atasi ai ma le agaga fa’afetai, amuia a’u, ua ou maua se tama e loto alofa e pei o oe, amuia a’u ua maua se fanau e usita’i ma alolofa i si o’u aiga. Fa’afetai Lameko, fa’afetai atu fo’i i le ta fanau, e le mafai ona galo i lo’u aiga, lo outou alofa ma lo outou agalelei, ona o lo outou va’ai mai ia te a’u.” Ua tau le mafai e Tagiilima ona tautala, ua lagona le vaivai o lona loto, fa’atasi ai ma lona loto fa’afetai ona o mea na momoli atu e Lameko ma lana fanau, mo ia ma lona aiga i tua.

Na tu a’e nei i luga le toeaina ma savali atu i le nofoa o lo’o nofo mai ai lona to’alua e pele i lona loto ma lona agaga. “Tagi, ua e fa’apea mai ea o le a, e i ai se mea ua ou sese ai i lo ta va, Tagiilima, va’ai mai i mata o le ta fanau, e leai se mea e tasi e gase i la ta mafutaga, amata mai lava i le amataga e o’o mai i le aso. O au galuega lelei uma i totonu o lo’u aiga, ua na o le Atua e silafia mea uma ma lo’u loto fa’afetai, o au galuega lelei sa e punou ai i le tautuaina o lo’u a’iga, Tagiilima, e momomo le loto pe a ou mafaufau i ai.”