Toe taliu le malaga a Tagiilima ma Loimataoapaula

Ua moe le toa i le mataupu na alo i ai le aiga o Tagiilima, ma ua ma’ea fo’i fuafuaga o le a sauni le aiga mo le nofo a Semi le atali’i o le tuagane la’ititi o Tagiilima, le toeaina o Tovi’o. Ua ma’ea fo’i ona fa’amautu le aso mo le fa’amoemoe o le aiga e pei ona lupe nei i malae. Ua le faia e Faiane le mataupu sa naunau i ai lona loto, o le taofia lea o le nofo a le tama a Tagiilima o Lolesio.

Ina ua taunu’u ane i Apia i lana tama ulumatua o Lamosi lea e fai ava ai, e le i mana’o i ai le tama e nofo ia i le suafa matai o le aiga, fa’atasi ma le tala na lafo ane i lona tina, ia nofo le tama a Tagiilima i le suafa o le aiga.

Ua na o le fafa o le isi fa’afetai i luga o le isi fa’afetai, na i’u lava ina to’otuli le lo’omatua o Sunema i luma o le aiga potopoto, e momoli lana fa’afetai i a Tagiilima ma le aiga, ona o le finagalo ua au tasi i ai le aiga potopoto, o lea ua fa’aeaina ai ia, ma lana fanau, e ala i lana tama o Semi, lea o le a nofo i suafa matai o le aiga.

O le tausoga o Tagiilima, le lo’omatua o Faiane, e ‘ese lana mataupu na folasia i luma o le aiga, o lana fa’ato’esega, ina ia fa’amagalo ia ma lana fanau, e tusa ai ma le fuafuaga sa ia taumafai e fai. Ua malilie le aiga atoa, ua ma’ea fo’i ona folasia i malae finagalo ma manatu o le tagata lava ia. O a mea uma sa manatu i ai le tagata, e malolo lava i le alofa ma le loto fa’amagalo o le tasi i le isi. O tulaga lelei ia o aiga, e fealofani ma fetausia’i ona tagata, e le mafai ona manumalo le fili ma ana faiga leaga.

Afai ua maua’a i finagalo le manatu e tasi, o le alofa e fa’avae ai aiga, o se manatu lea ua silisili ona lelei, mo le aga’i i luma o fuafuaga a aiga, ina ia manuia ai ona tagata. 

Po’o le a le fafati mai o peau toto, ma lofia ai fuafuaga lelei a se aiga, e toe va’aia lava ataata o ta’uleleia, ina ua laga peau sina, ma ua fati, ua maua ai le feso’otaiga vavalalata o aiga, i le alofa, fa’amagalo, fa’apalepale, fetausia’i, ma le nonofo fealofani o ona tagata. O le tulaga lea ua i ai nei le aiga o Tagiilima, ua o latou maua fa’atasi le agaga o le fetausia’i, fa’amagalo, ma le alofa, ua avea lea ma ta’iala mo i latou, ua fai fo’i lea ma pale manumalo o le nonofo fealofani o tagata uma. Ua lagona le fiafia ma le fa’afetai, ina ua suiga malie tulaga sa i ai, ua va’aia tulaga lelei mo le aga’i i luma o le aiga.

Ua toe taliu nei le malaga a Tagiilima ma lana tama o Loimataoapaula i lo latou aiga. O se malaga sa tapuai’a e le toeaina o Lameko ma lana fanau. Ua misia lava e tama lo latou tina, ma o fa’alogona fo’i ia na o’o i lo latou tama. E moni lava le upu, a leai se Atua, a’o le na o lo’o i ai le tina, aua o ia o le fautua lelei, o ia o le mapusaga, o ia o le fetuao e pupula pea ma susulu atu, aua fanau, aiga, nu’u ma Ekalesia.

Na feiloa’i fiafia nei le aiga ma na va’aia e tama uiga o lo latou tama ma o latou mautinoa ai, ua misia e le toeaina lo latou tina. O le mea fo’i lea sa o latou taumafai ai e fa’afiafia lo latou tama, a’o nonofo na o latou. A’o to’esea Tagiilima, na galue malosi lana tama o Lolesio ina ia fa’amautu mea uma o le fa’atoaga. Ua o’o lava i tagata faigaluega, ua maua le avanoa lelei o Lolesio e mafuta ai ma fetaufa’ai i tulaga o lo’o i ai le fa’atoaga, ona o le tele o aso, e le maua sona avanoa, ona o lana galuega o lo’o galue ai nei.