Ads by Google Ads by Google

Alofa: Fa'avae ai Aiga— Vaega 111

“Tina tu i luga ta o, se i o’u alu e va’ai se ta’avale e sau i tua nei e fa’anoi ta te o ai, tu i luga ta o, o lo’o fa’atali mai Tama ma tama i le fale.” E fai ane lava tala a lana tama o Loimata ma tagi, ua leai se tasi na toe faia se tala, ua tau tonu i muaulu fa’amatalaga a le teine ua lafo ane nei. Ua le toe poi Loimata, ona ua fa’alogologo i tala ma upu e felafoa’i, o upu ma tala e mavaevae ai aiga, o upu e le maua ai se to’afilemu o se aiga, o upu ua na o le fe’aina’i ma le femisa’ai e maua ai.

Ua a’apa ane nei Tagiilima ma fa’anofo ifo lana tama i ona talane. Ua na o le sioa nei o tuagane o Tagiilima ua leai se tasi na toe tautala. Na i’u lava ina to’atuli le toeaina o Tovi’o i lea taimi, ae ua na o le fa’alogoina o le leo o le fa’anoanoa ma le loimata maligi o lo latou tuafafine.

“Tagiilima, lo’u tuafafine, ua ou fa’amaualalo atu ia te oe, fa’amolemole fa’amagalo mai a’u ma Sunema, i lenei mea ua ma faia. Ua le tasi ae ua lasi mea leaga a lenei fafine e fai i totonu o le aiga. Ai fo’i o le mea lea, po’o le a lo’u pologa i lona aiga, ua sili ia te a’u ona ‘aua ne i au maia i lo’u aiga e fai ai ona uiga mataga ma ona uiga leaga nei.”

Na tepa a’e nei le lo’omatua i lona tuagane ma le fa’ato’esega, “Tovi’o, nofo i lalo, nofo mai i lalo.” Ua na o le pau ia o upu na tautala ai Tagiilima. E le i nofo i lalo le toeaina, ua fa’aauau pea le to’atuli ma fa’atagisia se fa’amagaloga mai i lona tuafafine.

“Tagiilima, lo’u tuafafine, afai lava e leai sau upu e fai mai ia te a’u, ua ou malie lava, ia alu le aso atoa lenei o o’u to’atuli, ia e alofa fa’amagalo mai a’u ma si a’u fanau. Ua ou lagona lo’u sese i lo ta va, Tagiilima fa’amolemole, o a ni ou toe alofa’aga mo ita o totoe, ia e alofa fa’amagalo mai lou tuagane leaga ma le le alofa. Ua na o le Atua e silafia lo’u loto ma lo’u agaga, ua na o oe lava, ma le tuafafine ia Silia fa’apea ma uso nei e nonofo atu. Fa’amolemole Tagiilima fa’amagalo mai a’u ma si a’u fanau.”

O se va’aiga fa’amomoi loto ua o’o nei i ai Tagiilima ma Silia ma o la tuagane i lea taimi, e pei ua toe fo’i i tua o latou olaga i le mea na amata mai ai, a’o soifua o latou matua. O mea uma lava o le latou aiga, o Tagiilima lava e faia fuafuaga a le aiga, ma fa’atonutonu i latou i le mea e ao ona fai.

Ua to’atuli nei Lolesio, le tuagane matua o Tagiilima, o Tomasi ma Toetu ma ua fa’apena fo’i Silia lona uso la’ititi. “Tagiilima, va’ai mai ma ua e fa’afofoga i le talosaga a lo’u uso la’ititi o Tovi’o, o le na fo’i se manatu o ia te a’u, o lea fo’i ua to’atuli mai ma lou uso la’ititi. O a mea lelei ma mea leaga uma sa fetaia’i ma tatou a’o soifua mai o tatou matua, sa lafo atu ia te oe le tuafafine le mamafa o mea uma. O le tausiga o matou uma lava, e te le i fa’atafa i se mea e tasi. E ui fo’i ina ua e alu ‘ese atu ona ua e fai aiga. E le mapu lou alofa mai i a matou ma a matou fanau i mea uma lava. O lea Tagiilima lo’u tuafafine, ia e alofa fa’amagalo mai matou uma lava.”

Ua lagona le leo o le loimata maligi, ma fa’anoanoaga, ua lagona fo’i le loto tiga ma le loto ua nutimomoia. E ui lava i nisi tulaga e o’o i ai, ae afai o ni manu’a mai fale, o ni manu’a ia ua sili ona ogaoga o ona tiga. Ua fa’apena le tulaga ua i ai nei le lo’omatua o Tagiilima. Ua lagona le matuitui ma le tiga o manu’aga ua o’o nei i ai, ona e le o ni manu’a mai fafo, e leai, o manu’a mai i totonu o lona aiga, lona lotoi fale, o ona toto, ivi, ma a’ano.

Ua tu nei i luga Tagiilima ma savali ane ua fa’anofo i lalo lona tuagane matua o Lolesio ma sogi atu i ai. Na liliu ane nei i lona tuagane la’ititi o Tovi’o ma fa’anofo ifo i lalo ma sogi atu i ai, na fa’apena fo’i ia Malia, lona uso la’ititi. Ua fa’asolo atu i isi ona tuagane o Tomasi ma Toetu, ua na o le fetagisi nei ma punonou. Na fai si umi o fusifusi Malia ma Tagiilima i lea taimi, “Tagi, si o’u uso pele, ia e alofa fa’amagalo mai a’u ma la’u fanau.” Ua fa’anofo ifo nei i lalo e Tagiilima lona uso. Ua liliu nei ma toe savali aga’i atu i le itu na saofa’i mai ai, ma ua nofo ifo nei i lalo.