Na tu a’e nei i luga le teine ma savali mai i le itu o lo ’o i ai lona tina ma lona uso o Malia. ìTina, o a mai oe, e i ai se mea e te mana’o ai?î Na fai tala a le teine ma saofa’i ifo i talane o lona tina, ma lomilomi lona tua. Na fa’ateia Loimata i le musumusu ane a le lo’omatua, ìLoimata, a aulia taeao i le taeao, ona oulua o lea ma Moe ia Faiane, fai i ai ua ou fai atu e savalivali mai se i ma talanoa, ua e fa’alogo mai.î Ua ioe i ai Loimata i lea taimi i lona tina.

Na lagona mai e Lolesio ma Analosa le musumusuga lea o lo ’o fai nei a Tagiilima ma lana tama o Loimata. Na tu a’e nei i luga le toeaina o Lolesio ma savali mai i le itu lea e soafa’i ai lona tuafafine. ìTagiilima, o le a le mea ua e le malolo ai, se tu’u se i aulia taeao ona fai lea o le mea lena e te mana’o ai. Fa’amama mea i lou mafaufau, ua uma le talanoaga, o lea fo’i ua malilie mai o tatou tausoga e fai le fa’ai'uga ua e faia.î E fai ane lava tala a Lolesio ma saofa’i ifo i talane o lona tuafafine.

 ìLolesio, ua ou iloa ua alu ma le le malie Faiane ia te a’u ona ua mamafa a’u tala na lafo i ai. O le ala lea ua le maua ai sa’u malologa, ona o lo’u mafaufau e tatau ona ou talatalanoa ia Faiane. O a lava vesiga na o’o i ai la tatou fa’atasiga, Lolesio, ou te nofo ma ou va’ava’ai atu ia te outou o lo ’o nonofo i le aiga. O la’u tala fo’i na lafo e uiga i la’u tama o Lolesio, ua na o se mea na ou faia i lo’u fa’alogologo atu i 'upu ua felafoa’i i le va o Malia ma Faiane, ta te le fia fa’alogo atu i ai, ua pei o ni tagata ‘ese. ìO le ala lea o lo’u tautala atu, ae o lea ua malilie mai ona tuagane, ae o lo ’o le malie mai Faiane ia te a’u. Lolesio, va’ai oe le tuagane, e mamao lava ma lo’u mafaufau se manatu e fa’amatai se isi o la’u fanau, e leai, o la’u tala na lafo atu, se i o’u fa’alogologo atu ai, po ’o le a le sau e toe sau ai Faiane.

 Talofa i si o tatou tausoga o Faiane a Lolesio, e vaivai lava lona mafaufau ma e mafua ona fa’apea le lo’omatua, ona o le fautua leaga a lona to’alua o Lopati. O se tamaloa ua silisili le leaga, e filemu mai ma le tautala, ae pei o le liona fe’ai ma ona uiga, na ona iloa lava e Lopati ua ou sau, le o’o mai loa i le talanoaga a lo tatou aiga. E moni ai le 'upu fo’i lea, e malu mai, ae ivia, ua tutusa lava ma le ivia o lona fatafata talu le loto leaga.î Ua tali e nei Tagiilima ma lona tuagane, na i’u ina toe ala mai ai i luga le lo’omatua o Malia.

Ua mafaufau Lolesio i le uiga o le tala a lona tuafafine lea ua tautala ane ai nei ia te ia, ma ua iloa ai e Lolesio, e leai, e le o mana’o Tagiilima e fa’amatai lana tama i le suafa o le aiga.  ìTagiilima, ‘aua e te popole, atonu e sau se taimi ona oulua feiloa’i lea ma Faiane, o a’u fo’i ua ou malie ma lo’u loto atoa e sau Lolesio e nofo i le suafa matai o lo tatou aiga. Taga’i fo’i oe le tuafafine, o lea fo’i e malamalama le la itu o le fanau, o toeaiina fo’i, e lelei lava, e o’o fo’i i nai tina ua fai ma o latou fesoasoani e lelei lava fafine. E fautua lelei, toe va’ai mamao i le lumana’i o le aiga. O le lo’omatua lenei o Faiane, e ‘ese ai lava ia i ona uiga ma ana mea e fai. O lona to’alua, ua ou iloa lelei le va’ava’a o le toeaina o Lopati,  ae ‘aua tatou te fa’avaivai ai Tagiilima, pau lava o lea, afai ua e loto malie e sau lau tama o Lolesio e nofo i le aiga, ua ou malie atoatoa i ai. O le mea sa’o ma le mea tonu, ma o le mea e tatau ona fai. Aua e te popole i le itu lea e uiga i a Faiane, ta’atia e sau malama ona logo lea e sau e fai se lua tala.î

Ua le tautala le lo’omatua o Tagiilima i lea taimi, ua na o le mafaufau loloto i le tulaga na tula’i mai i le feiloa’iga a lona aiga lea na fai i le afiafi.

ìLolesio, o le a sou manatu ia  Tovi’o, na i ai lo’u manatu o le a tautala mai, ae ua uma lava le talanoaga e leai ma se 'upu e tasi na lafo mai ia te a’u, o le a sou manatu i lea itu?î Ua toe mafaufau Lolesio i le fesili a lona tuafafine, ona e sa’o a ia, e le i tautala mai lava Tovi’o i le taimi atoa na fai ai le feiloa’iga a lo latou aiga.  Na ia tali e fa’apea, ìO Tovi’o ou te lagona lava le matamuli o lou tuagane lea, ae taga’i fo’i oe le tuafafine, atonu o lo ’o sa’o lava lona loto, a’o lona to’alua le lo’omatua o Sunema, o le na ua e iloa tafatafa o le lo’omatua. E pei o le fe’e fo’i lea a lelei ma mana’o i se mea ua pa’epa’e atoa ona 'ave e valu, ae a o’o loa i lona itu leaga, ua uliuli fa’asolo atoa le pa’u. E fa’apena uiga o le lo’omatua lenei. Va’ai fo’i oe, e seasea sau i le ma fale., se ’iloga lava o se mea e mana’o ai, ona sau lea, ma te fa’alogo atu lava ma Analosa o tau valavala’au mai i fafo, ae ou te le amanaia ona uiga vaivai ia, ona o lo’u alofa i mata o si o’u uso ma si ana fanau.î