Ads by Google Ads by Google

Alofa: Fa'avae ai Aiga— Vaega 106

 O le po na uma ai le talanoaga a le aiga na fafau ai e Faiane le polokalama e ao ona ia faia, ina ia taofi ai le saofa’i a le tama a Tagiilima. Ina ua taunu’u le lo’omatua i le fale lea o lo’o nonofo ai ma lona to’alua, le toeaina o Lopati, na talatalanoa ai loa ina ia taofi le nofo a le tama a Tagiilima e pei ona malilie fa’atasi i ai le aiga.

O le taeao lea ua talatalanoa fiafia ai Tagiilima ma ona tuagane ma lona uso o Malia, ae ua leva ona alu Faiane i le pasi usu i le taeao i Apia.

O le fili e le moe moe loa, e alu lava e sa’ili’ili pea ina ia fa’aleaga se mea ua lelei. O le itu lea na mafua ai ona lagona e le lo’omatua o Faiane le loto tiga. Ina ua taunu’u Faiane i le aiga o lona to’alua lea o lo’o nonofo ai, ua ‘ese lava ona mafaufauga ua i ai. Ua tauga i lona loto fa’amatalaga na lafo ane e Tagiilima ia te ia.

Na ona nofo ifo lava i lalo o le lo’omatua ma to lona sela, liliu ane loa i lona to’alua, le toeaina o Lopati. “Lopati se nofo mai i luga, o le a e saga moe lava o lea ua ou sau.” Na tau pulapula a’e nei mata o le toeaina ma ia iloa ai o lo’o saofa’i le lo’omatua i ona talane. “Oi, Faiane, ua leva ona e taunu’u mai?” Ua le tali le lo’omatua ae ua na o le tagi nei, “Lopati, ua lagona lava le tiga o lo’u loto i a Tagiilima, o lea o le a fai le saofa’i a le tama a Tagiilima i le suafa matai o lo matou aiga.” Ua nofo le toeaina o Lopati, ua le taunu’u le fa’amoemoe sa i ai i lona atali’i lea e faigaluega lelei i Apia, ae o lo’o nofo i le aiga o lana ava i le taulaga.

O le fesili muamua lava a Lopati, “A’o fea o i ai Sunema, na i ai i le talanoaga, ae a Tovi’o, na i ai i le talanoaga?” Ua le tali Faiane ua na o le tagi o le lo’omatua i lea taimi. O o la manatu sa fai vavale o lea ua le taulau, o o la manatu sa fai ma le agaga fa’amaualuga, o le la tama e nofo i le suafa, a lea ua le taulau lo la fa’amoemoe.

 Ua lagona le loto tiga, ua lagona fo’i le loto le malie, “E te iloa Lopati, o le a ou alu taeao i Apia, ou te alu i le ofisa o Fa’amasinoga e taofi le saofa’i a le tama a Tagiilima.” Ua le tautala le toeaina, ae ua lagona lona fiafia ona o lea e iloa e Faiane le mea e tatau ona fai.

Ua na o le ‘ata’ata o Lopati i lea taimi, “O le mea tonu le na e tatau ona fai, va’ai oe, e tutusa a oulua aia fa’aleaiga ma Tagiilima. O le lo’omatua le na e le o se lo’omatua lelei. E nofo mai lava i le taulaga, ae pulepule mai e ia mea e fai o le aiga. A aulia taeao ona e usu lea i le pasi usu, va’ai le tupe o lo’o i le taga o lo’u ofu e te alu ma oe e fai ai lou pasese ma fa’atau ai sau mea’ai.” Ua le maua se moe i le po atoa a le lo’omatua o Faiane, ona o le fa’asolosologa o ona mafaufauga i le mea o le a ia faia. Ua leai se to’afilemu o lona loto, ua na o le ita ma le tiga lea ua fa’afesaga’i nei. Ua avea ia manatu ua pogisa ai lona mafaufau, ae ua galo ai le alofa ma le agalelei o Tagiilima ia te ia ma lana fanau.

O le tupe lea na fai ane ai lona to’alua o Lopati, o le tupe na totoe mai le teutusi na alu ane ma le avepasi i le vaiaso ua mavae, a’o le i taunu’u ane le malaga a Tagiilima ma Loimata. O le tupe na au mai i a Tagiilima e fa’atau ai sa latou mea’ai ma le la fanau. O lea lava e auaua’i e le toeaina ma le lo’omatua, a’o lenei o le a toe fa’aaoga e fa’atino ai fuafuaga leaga ma le taui leaga e fa’asaga ia Tagiilima ma lana fanau.Ua galo le alofa, ua papa’u fo’i manatu lelei, ua sola lava mea lelei na faia e Tagiilima mo la’ua, a ua liliu ane nei e faufau manatu leaga ma le le alofa e lepetia ai le nonofo fealofani ma le alofa i va o aiga.

I le po lava lea, ua le maua se malologa lelei a le lo’omatua o Tagiilima, ua toe mafaufau ma le alofa i lona tausoga o Faiane. Ua toe manatu le lo’omatua ua mamafa ana upu na lafo i a Faiane. Ua fai lana tatalo ina ia fa’amagalo ia i ana upu na lafo i lona uso. E le o iloa atu e lona uso la’ititi o Malia le nofonofo a lona uso matua i le leva o le po.

E le i moe le teine o Loimataoapaula, ua lagona le popole i le vaai mai lona tina ua le maua sana malologa.