Ads by Google Ads by Google

Alofa: Fa'avae ai Aiga— Vaega 104

Ua na o le punou o Faiane i lea taimi, ua pei e tui’a le vae i se ma’a, ina ua fa’alogologo atu i upu ua tautala mai ai Tagiilima. E le i toe fa’atali Tagiilima, a’o le taimi lea, ua na o le pulapula vale o mata o lana tama teine o Loimataoapaula. Ua lagona e le teine lona popole ona e le o iloa e  Faiane le isi itu o lona tina, e lelei lelei lava, ae a liu loa, ia ua leai  se mea e toe ‘alo i ai le tagata.

“Faiane, ou te fa’apenei atu, afai ua e le maua maia la’u fa’amatalaga e fa’apea, ia o tatou tepa i ala o le vavau, o lona uiga, e te le o malamalama i le uiga tonu o la’u tala. O le mea le na e maua e le tina faitatala ma fela’ula’utala solo, a alu atu tala’iga o mea e fai a lona aiga, ua tagi ma fai mai e lima vaivai e leai se galuega a lana fanau e fai ai mea o le aiga. A le o le na, ua sau lau tali, e fai e matou le tonu o oe ua e fa’ama’ima’i, o le tonu e fai e matou o le mea lena e fai.

“A alu atu le feau e logo atu oe e te o’o mai se i tatou feiloa’i pe a ou sau i isi aso e asi mai outou, e sau lau tali o oe o lo’o pisi e leai sou taimi e te sau ai. Faiane, ou te toe fo’i ma lo’u fa’anoanoa ia te oe. Sa i ai lo’u manatu o oe o se uso ia te a’u, aisea, ona ta te tupuga fa’atasi mai i le manava e tasi. E ui ina ua ‘ese’ese o ta nofoaga ona o tulaga o le soifuaga ua i ai nei, ae e le mafai ona galo oe ia te a’u. Taga’i fo’i oe Faiane, e sau lava le pasi ma le atigipusa mea’ai e fai ai sau mea tausami. A le o le na, o le teutusi, tiga lo’u iloa le tau fa’asoasoa, e le mafai ona galo mai outou, e sau lava le pasi ma a outou fa’amomoli ona o lo’u manatu alofa mai po’o a a outou mea o ‘ai, po’o maua se suka ma se fasi moli, po’o i ai se ‘apa e fai ai a outou mea tausami. O le ‘ese’esega lea ma o uiga ia o le tagata soifua, e ‘ese’ese ai ta’ua.”

Ua na o le punou nei o le lo’omatua o Faiane ma ona loimata, ua tuia le loto i fa’amatalaga nei ua lafo atu e Tagiilima.

“Faiane, o lea ua ou iloa atu nei o oe o se tina e vaivai le mafaufau, aisea, leaga e te le alofa, e te le ola taumafai, ua e ola fa’apalapala. Ua ou iloa uma lava le tulaga le na e i ai oe i le aiga o lau nofogatane, o lea fo’i e fa’alogologo mai tuagane i a Tovi’o, o Tomasi ma Toetu, ua tutusa pau ai lava outou, o mea fo’i a tagata se i nofonofo fa’apea ifo i lona loto, talofa e i si o’u aiga po’o a mai, ona tu lea i luga ma savali mai e asi ma feiloa’i, ae e leai. O le to’alua o Tovi’o latou, o lana lava lea masani, o le ala usu i le taeao alu i le fale o le Komiti, aisea, e fai uma ai tala o tagata. O lea la e fai fo’i e oe Faiane le amio lea, ua tia’i lou a’iga, ae ua e mafuli e fai le na tulaga le lelei. O lea la ua aliali mai i le afiafi lenei lou itu leaga lea.

“Le tatou aiga, ou te fa’amalulu atu, o le a se upu ua lafo, a’o se tala ua paopapa i la outou fa’afofoga mai, ia alofa fa’amagalo le auauna, e moni lava le upu e poto le tautai ae se lana atuiama. Ia o tatou maua pea le nonofo fealofani, ia o tatou maua le agaga o le feva’ilia’i, pe afai e mo’omia le fesoasoani, ua uma a’u upu, ia manuia le tatou afiafi.”

E le i toe tali Faiane ae ua na o le nofo ma ona loimata i lea taimi. Ua ia toe manatua vave le folasaga a Tagiilima, e moni ma fa’amaoni, e le mafai ona misi se teutusi, a’o se pusa mea’ai e sau ma le pasi mo ia ma lana fanau. Ua le avea ia mea lelei na faia e Tagiilima e tatali ai le le malie o Faiane i le fa’aiuga ua fai, ona o lo’o i ai lona mana’o fa’atasi ai ma fautuaga le lelei a lona to’alua, ina ia nofo lana tama ulumatua i le suafa matai o le aiga.

 Na fa’ama’ea nei e Lolesio le fetufa’aiga a le aiga i lea afiafi se ia aulia malama o le aso fou. Na tula’i nei Tovi’o, o Tomasi ma Toetu, ma aga’i i tua fale, ua na o le mulumuluga o vae o le latou tuafafine matua lea ua fai nei. E le i ano ane i ai Tagiilima, ua na o le ‘ata ma tilotilo atu i ona tuagane i lea taimi ma fa’apea lona mafaufau, “Ta fefe, ua le ‘elia e le aiga o Lameko so’u tu’ugamau e sefululua futu, a’o lea ua ‘eli e lo’u aiga.” Ua ‘ata’ata Tagiilima ma tilotilo atu i fafo i tu’ugamau o ona matua e pele i lona loto. E moni lava, o manu’a mai fale, o manu’a ia ua sili ona ogaoga ona tiga.