Ads by Google Ads by Google

Alofa: Fa'avae ai Aiga— Vaega 101:

Sa'ili le tofa i le suafa matai o le aiga o Tagiilima

O lupe sa vao ‘ese’ese, a ua fuifui fa’atasi i le alofa ma le agalelei o le Atua. Ua toe aofaga potopoto nei le aiga atoa, ona o le fa’amoemoe e pei ona i ai i le sa’iliga o se tasi e nofo i le suafa o le aiga. O tulaga fa’apenei e le ‘asa lava ma finagalo ma manatu ‘ese’ese o le tagata lava ia. E le maua fo’i se to’afilemu o aiga, pe a o’o i ia tulaga, peita’i, e tele lava pesega, ae matua lava i le o’o i le fai aiga lelei ma le tausi pea o le va fealoa’i ae maise o le nonofo fealofani o aiga.

Ua fa’apena le tulaga ua o’o i ai le talatalanoaga a le aiga o Tagiilima, ua atoa nei le tolu o aso o taumafai lava ina ia maua se finagalo 'au tasi o le aiga potopoto. E le o i ai se tama a le lo’omatua o Naomi, ona ua ma’e'a ona vala’au mai le tama ma le teine mai Niu Sila e alo le aiga i le talanoaga, o la’ua na ona o’o mai lava e asiasi mai, ae ua mautu la’ua i Ni’u Sila.

O le fanau a tuafafine la’iti o Pule, le lo’omatua o Letina, o Susana ma Mineta o lea ua fa’atasitasi nei mo le talatalanoaga a le aiga. Ua taunu’u ane le lo’omatua o Malia ma lana fanau tama e to’alua ma le teine e to’atasi, o tuagane e to’alua o Tagiilima o Tomasi ma Toetu ma a la fanau. Ua aofaga potopoto le aiga e pei ona o latou mo’omia, aua le talanoaina o le suafa matai o lo latou aiga.

I le amataga o le fetufa’aiga a le aiga potopoto, sa fa’aalia manatu ma finagalo o le tagata lava ia, ona ua i ai le fa’amoemoe afai ae ma’e'a lea tulaga, ona tula’i mai ai lea o se fa’ai'uga lelei mo se tasi o le a nofo i le suafa o lo latou aiga.

Ua lua aso talu ona faia le feiloa’iga a le aiga, ae ina ua o’o i le aso lona tolu, ua amata ona fe'upua’i, ma ua lafo fo’i fa’amatalaga mamafa ona o le le mautonu o manatu ma mafaufauga o le tagata. E fai lava fe'upua’iga nei, ae ua na o le nofo o Tagiilima e le tautala.

Ua na o le fa’alogologo nei i tala ua felafoa’i i totonu o le fale. Na iloa ai nei e le lo’omatua, e le o maua se nonofo fealofani o lona aiga, ona o lea e fa’alogologo atu i ai, ua na o le lulu o le ulu o Tagiilima ma tilotilo atu i ona tau toto, tino ma a’ano, ma lona loto fa’anoanoa, ona o le tulaga ua i ai nei lona aiga. Ua saofa’i ifo Loimata i talane o lona tina i lea taimi, ma ua liliu ane nei i ai le lo’omatua ma fesili po ’o fea sa i ai, ona ua matau e Tagiilima, ua tolu ituala e le i va’ai i a Loimata.

Ua lagona e Tagiilima le tiga o ona taliga i fa’amatalaga ia e lafo nei i totonu o le fale ae o lo ’o fa’alogologo a latou fanau. Ua atoa le tolu o aso o fa’amoe pea le toa, se ia malama le aso fou ona toe soalaupule lea o le aiga atoa. Na fa’alogologo atu nei Tagiilima i 'upu o lo ’o lafo e lona uso la’itiiti o Malia e le fa’atafa 'upu a le lo’omatua e lafo i totonu o le potopotoga a le aiga, ona o lo ’o fai a la finauga ma le lo’omatua o Faiane.

 O Faiane, o lo latou tausoga, o le tama teine a Letina le tuafafine o lo latou tama. Na i’u ina fa’asalavei e Tagiilima ia finauga nei, ona ua lagona le tiga o lona loto i fa’amatalaga, “Malia, ia to’a le tai, fai fai malie, e leai lava ni isi o filogia i la tatou talanoaga lenei, o toto, ivi ma a’ano, e leai ni tagata ‘ese. Tau fuafua fa’amatalaga e o o le vao, e i ai fo’i le 'au matau 'upu, ia outou fa’aeteete i le itu lena, ‘aua le so'ona tu’u lafoa’i fa’apena a outou fa’amatalaga fa’amolemole. Se to’a mai, o le tagata e tele le loto na te iloa tausi le filemu ma le va fealoa’i, a’o le tagata e tu, ae na o le atigi, o le tagata lena e mamao le uta ma le tofa o i ai e fetala’i ai lona loto ma lona mafaufau i le tulaga e silisili ona lelei, o le a saga fea’ei lava i luga, o le a fa’afefea ona maua se taunu’uga lelei i le mata'upu o lo ’o talanoaina nei.” Ua toe manava tasi le lo’omatua o Tagiilima, ma toe fa’apea ane i lona aiga,

“O lea ua ou iloa atu nei, e leai se nofo fealofani o lo tatou aiga, ma e mafua mai i a outou na e matutua.  Se fa’aali manatu e lelei ai ma maua ai le nofo filemu o aiga, ae ‘aua le faia fa’amatalaga na o le fea’ina’i ma le le fealofani e maua ai, fai fai malie fa’amatalaga, o lea e pupula mai mata o fanau, fai fa’alelei mai, a i ai le tagata e fa’alogo ifo e maualuga le mauga o lo ’o i ai i le taimi lenei, e sili pe a tula’i ‘ese. O mai i lalo tatou te u’ulima  fa’atasi ma tatou tu tu fa’atasi ona maua lea o le tonu ua silisili ona lelei e maua ai le fa’ai'uga mautu i le mata'upu ua tatou talanoaina nei.”