Ads by Google Ads by Google

Alofa: Fa'avae ai Aiga— Vaega 100

“O a mai le tou aiga Sunema, ua maua ea se iuga o le fa’amasinoga lea na fai i le vaiaso ua tuana’i?” O le fesili lea a Tagiilima ma tilotilo ane i a Sunema. Ua tau le tali le lo’omatua ua te’i ina ua fesili ane i ai Tagiilima i le fa’amasinoga a lona aiga. Sa i ai le manatu o Sunema e leai se tasi o le nu’u o iloaina lea fa’amasinoga, a’o lea ua iloa e Tagiilima.

“Oi ua mae’a, a’o lea e fa’atalitali mo se fa’ai’uga mai le Fa’amasinoga.” E lafo ane le tala a le lo’omatua ma a’apa ane i lana fusi tapa’a Samoa lea e fa’apona i le pito o lona ie. Ua lulu le ulu o Tagiilima, ma tilotilo ane i a Sunema, fa’atasi ai ma ona mafaufauga e fa’apea, “Ua ma’imau si o’u tuagane i lenei fafine fa’apenei.”

E le i umi, ae ulufale loa ma le fanau teine a Tovi’o ma Sunema, ua feiloa’i nei teine ma Tagiilima. I le taimi atoa na fai ai le feiloaiga a Tagiilima ma ona tuagane, o lo’o talatalanoa fiafia Loimata ma lona tausoga, ua fa’amatalatala i ai e le teine lana a’oga i le Kolisi, fa’atasi ai ma ana mataupu, ae maise o ana fa’ailoga na maua.

  Ua malolo nei Tagiilima, ae fa’agaoioi e Analosa ma Sunema ma teine le tapenaga ma le teuteuina o le fale aua le faigalotu ma le alalafaga a le aiga. Ina ua gasolosolo ane le aiga o Tagiilima i lea afiafi, na iloa ai e le lo’omatua e moni lava lana tala na fai i lona tuagane o Lolesio, e muamua mai i luma le toeaina ma le lo’omatua, ae sau ai tua ma le solo a tamaiti.

  Na va’aia e Tagiilima le to’atele o lona aiga ua o ane nei i le alalafaga i lea afiafi, e tasi lava le tulaga na mafaufau i ai le lo’omatua, se i fa’apa tasi si ana fana i le aiga, anusa, o e savavali, o e afisi ma le au fetolofi, ua tumu le fale atoa, ua leai se ofi, ae ‘ese ai isi o lo’o i tuafale.

Ua taunu’u le Faifeau ma lona Faletua ma ua feiloa’i fiafia ma Tagiilima, ua fesili le Faletua po’o fea Loimata, na tu mai nei i luga le teine ma feiloa’i ane i le Faletua. “Loimataoapaula, oka se tama’ita’i a lalelei, e leai se foliga o lona tama e ave’esea.” Ua le ano ane i ai Tagiilima i lea taimi i le feiloa’iga lea, ae ua na o le va’ai atu i le isi itu ma le isi itu o le fale. E ofo le loto ma le mafaufau, i le va’ai atu i le to’atele o tagata o lona aiga, ua nonofo mai nei i totonu o le fale. Ua mafaufau le lo’omatua i le seleni na o ane ma la’ua ma lana tama, pe o le a tofusia ai le anoano lea ua o’o ane nei, pe leai. Na tau au tago nei i totonu o le ato, o le isi itu o le ato a le lo’omatua, o lo’o i ai le isi vaega tupe mai lana fa’atoaga. O tupe nei, o fa’atauga a tagata e o ane e manana’o i fuala’au’aina, o nisi e manana’o i ato talo, o ‘aufa’i o pi u’umi ma pi pupu’u. O nisi e manana’o i meleni, o kapisi o isalaelu u’umi, o isalaelu pupu’u. O tupe la ia ua taga mai e le lo’omatua, ae e le o iloa e le teutupe ma le failautusi o le fa’atoaga.

Ua lagi le pese o le faigalotu, “Fa’afetai i le Atua Le na tatou tupu ai………” E punou le Faifeau mo le tatalo, ae punou ifo le lo’omatua o Tagiilima i lana ato lea e i ona talane, ma au mai i fafo le teutusi a le Faifeau ma lona Faletua. Ua na o le fetilotilofa’i solo nei o le lo’omatua i tagata ia ua nonofo mai, na fa’apea ona mafaufauga i lea taimi, “Sole, se ua tumu lalo nei.” Ua ‘ata’ata le lo’omatua ma tilotilo atu i si ona aiga, e pele i lona loto.

Ina ua ma’ea le faigalotu i le afiafi ua fa’amavae le Faifeau ma lona Faletua ma tu’umuli loa i lea taimi, na taofi mai e Lolesio, ae ua silafia e le Fa’afeagaiga, ua tatau ona tula’i ‘ese, ona o lo’o i ai fuafuaga a le aiga e tatau ona alo i ai. O le ta’ita’i a le Fa’afeagaiga ma lona Faletua, sa saunia lelei mea uma, fa’atasi ai ma le la teutusi na alu ane ma Tagiilima, o lo’o mafanafana lelei ai i totonu le toluselau tala.

Ua fa’afeagai nei Tagiilima ma lona aiga atoa i lea taimi, ua na o le tilotilo atu o le lo’omatua ma tau mafaufau pe o le a fa’afefea ona tofutofu sia lenei anoano ua nonofo mai.

“Le mamalu o le tatou aiga potopoto, e muamua lava ona avatu malu i pu’ega, e tusa ai ma tulaga o le afiafi, ua ma’ea ona molia la’au i foga’a ma paepae mamalu o le lagi e le Susuga i le Fa’afeagaiga,