Aloaia tautua nisi o Leoleo i totonu o le Matagaluega

O le taeao ananafi na faataunuuina ai se tasi o polokalame faaauau a le Matagaluega o Leoleo, lea e aloaia ai e le matagaluega alii ma tamaitai leoleo ua latou ausia tulaga maualuluga i le faatinoina o a latou tiute faaleoleo, i totonu o vaega eseese o lo o tautua.

 

Sa molimauina e matua, uo ma aiga o alii ma tamaitai leoleo na faamanuiaina lenei polokalame taua.

 

Na taua e le Ta’ita’i o le Vaega o Leoleo Su’esu’e (CID) ia Cmdr Lavata’i T. Sagapolutele sa fai ma fofoga o le Komesina ma le mamalu o le matagaluega, o le polokalame lenei, o se polokalame faaauau, e taualoa ma faataua ai tiute o lo o faatinoina e alii ma tamaitai leoleo i kuata taitasi ma le tausaga atoa.

 

“E talitonu le afioga i le Komesina ma le matagaluega, e tatau i le Matagaluega o Leoleo ona taualoa alii ma tamaitai leoleo e tusa ai o le latou tautua, aemaise ai i latou e ausia tulaga maoa’e i le faatinoina o latou tiute,” o se saunoaga lea a Lavata’i.

 

E filifili e ta’ita’i o vaega taitasi po o latou komiti leoleo e ua agavaa mo faailoga taualoa nei i masina, kuata po o le tausaga atoa.

 

Saunoa Lavata’i e faapea, e maua e le alii po o le tamaitai leoleo le faailoga taualoa pe afai e maualuga tulaga na te ausia i le faatinoina o lana galuega, o lona auai i soo se taimi, faapea ai ma le faamaoni i le faatinoina o ona tiute i le galuega.

 

Mo le vaega o Leoleo o lo o tiute i luga o le alatele (Traffic Division), o se tasi o vaega na faavae ai i luga la latou filifiliga mo le leoleo e agavaa i faailoga taualoa nei, o le leoleo e pito tele ana pepa sala (tickets) e tuuina atu i le tausaga, faapea ai ma le leoleo e toatele tagata na te lokaina i le ave taavale ‘ona i le tausaga.

 

A’o le’i faalauiloa e  Lavata’i ia Leoleo Su’esu’e e to’atolu sa faamanuiaina i faailoga taualoa, sa ia talanoa i le faigata o le galuega o lo o faatinoina e ali’i ma tama’ita’i Leoleo Su’esu’e, i le tau sailiina lea o i latou sa faatinoina solitulafono e aunoa ma ni molimau na vaai tino i ai.

 

“O Leoleo Su’esu’e e le o i latou o ni agelu latou te iloa ai solitulafono lililo sa faatinoina e tagata leaga, e le mana’omia fo’i le maso e faatino ai a latou tiute, ae faaaoga i ai le mafaufau poto ma le tofa saili, e fetu’utu’una’i ai fa’amatalaga ma molimau, ina ia mafai ai ona latou maua le tagata sa faatinoina solitulafono eseese o lo o tutupu mai i le atunu’u,” o le saunoaga lea a Lavata’i.

 

I le avea ai o le CID o se tasi o vaega e pito maualuga galuega o lo o latou faatinoina i totonu o le matagaluega, e ala i le suesueina lea o solitulafono mamafa, na unaia ai e Lavata’i leoleo na auai i le sauniga ina ia taumafai e o o uma atu i le CID, “ma ia o faatasi le faaaloalo ma le faamaoni i le faatinoina o latou tiute.”

 

O le Sui Ta’ita’i o le Traffic Divison a le Ofisa o Leoleo ia Sgt. Utumoe Alefosio na fai ma sui o le latou Vaega e faalauiloaina leoleo e to’alima sa faamanuiaina i nei faailoga taualoa.

 

Mo le Ofisa o Leoleo i Leone, e to’alua leoleo sa faamanuiaina i faailoga taualoa e tusa ai o galuega o le Kuata Fa ua mae’a, lea na faalauiloa e le Ta’ita’i o le Ofisa o Leoleo i Leone, susuga Cpt. Lima Togia.

 

Na taua e Togia e faapea, o le taua o le polokalame faaauau lenei ua mafai ai ona lu’i leoleo e finau e faatino a latou galuega i le maualuga e tatau ona latou ausia.

 

“E le o se tauvaga lenei polokalame, ae o se galuega e manaomia ona fai fai pea e le leoleo i aso uma e tautua ai i le matagaluega ma le atunuu,”o le saunoaga lea a Togia.

 

I saunoaga faai’u o le aso, na taua ai e le Komesina o Leoleo ia William E. Haleck le tatau lea i leoleo ona faatino a latou galuega i le alofa ma le faaaloalo.

 

“Ia outou alolofa i le atunuu, fai ma le faaaloalo la outou galuega, afai o le a ticket se tagata, ia tusi le ticket ae aua ne’i toe faia i ai nisi faamatalaga, ma ia fai e pei lava o se tasi o lou aiga,” o le saunoaga lea a Haleck.

 

Ua i ai le finagalo o le alii komesina, ua tatau ona maua ni faailoga tupe mo leoleo e maua faailoga taualoa, ina ia avea lea o se auala e lu’i ai isi leoleo ae sili ai le maua o se auala e fesoasoani atu ai le matagaluega mo latou aiga.

 

VAEGA CID

 

O leoleo su’esu’e e to’atolu na maua faailoga taualoa mo leoleo o le Kuata e aofia ai Det. Alisha Godinet; Det. Filemoni Amituana’i, ma Det. Poutoa I’amanu, o ia fo’i lea na mauaina le Leoleo o le Tausaga 2012 - 2013.

 

VAEGA TRAFFIC DIVISION

 

Mo le vaega o le Traffic Divison, o le Leoleo mo le masina o Iulai 2013 na maua e le susuga Mareko Fale, o ia foi lea na ia maua le faailoga o le Leoleo o le Kuata; o le Leoleo o Aukosu 2013 na maua e le tama’ita’i o Nancy Toloafa, ma le Leoleo o Setema 2013 na maua e Pepe Mann, o ia foi lea na maua le faailoga o le Leoleo pito tele ana ‘citation’ sa tusi i le tausaga 2013, ma le faailoga o le Leoleo o le Tausaga mo le Traffic Divison.

 

Ma le faailoga o le Leoleo e pito toatele tagata na ia lokaina i le ave taavale ‘ona, na maua lea e PSO. Siuloa ma PSO. Parker.

 

OFISA O LEOLEO I LEONE

 

O leoleo e to’alua na maua faailoga taualoa mo le Ofisa i Leone e aofia ai Levi Tafaovale ma Devon Mata’u, lea ua faalua ona ia mauaina lenei faailoga.

 

Comment Here