I le aloaia ai o tautua o loo ofoina atu e alii ma tamaitai leoleo mo le puipuiga o le Saogalemu Lautele o le atunuu i le ao ma le po, o le vaiaso na tea nei na faataunuuina ai se tasi o sauniga faapitoa a le Matagaluega o Leoleo, e aloaia ai tautua a nisi o leoleo ua faamanuiaina i latou i tulaga maualuluga ua i ai la latou tautua i totonu o le Matagaluega.

O lea faamoemoe o loo aofia ai vaega taitasi a le Matagaluega e pei o le Vaega Suesue (CID), Vaega o loo Tautuaina luga o le Alatele (Traffic Division), atoa ai ma le Vaega o loo maitaituina le Saogalemu i soo se taimi i luga o le alatele (Patrol Division).

O le vaega a le CID e ta’i kuata ma faia a laotu faapinega ae o isi vaega e lua e faia lava i masina taitasi, peitai faatoa tuu faatasi le faapineina o leoleo i le maea ai o le kuata.

O le faatolu ai lea ona faataunuuina o lenei sauniga faapitoa i kuata taitasi ma le faamoemoe, o leoleo uma latou te ausia tulaga maualuluga i le faatinoina o latou tiute mai Vaega Eseese a le Matagaluega, o le a faapaleina i latou i ni faailoga taualoa atoa ai ma tusi pasi, ina ia molimauina ai galuega o loo fita i tuga i ai i latou mo le tautuaina o le atunuu.

Mo le vaega a le CID, ua faamanuiaina ai le alii leoleo suesue ia Det. Poutoa Iamanu i le faailoga o le leoleo suesue o le kuata, ae o le alii suesue ia Det. Vaina Vaofanua sa ia mauaina le faailoga o le leoleo suesue o le tausaga, ma le isi faailoga faapitoa o le leoleo suesue e tulaga ese lana tautua, na mauaina lea e le susuga Det. Silivao Sea.

Na faamalamalama e le taitai o le Vaega Suesue a leoleo, tofa Cpt. Lavatai Taase Sagapolutele e faapea, o le faailoga o le leoleo suesue o le tausaga, e maua e leoleo e pito tele ana mataupu tau solitulafono e faila atu i le faamasinoga, faamaonia ma tausalaina ai i latou o loo tuuaia i solitulafono eseese.

Saunoa Ctp. Lavatai, e silia ma le 200 mataupu tau solitulafono sa suesueina e le susuga Det. Vaofanua ma faila atu i le faamasinoga, o nisi o mataupu ua maea, o nisi o loo faaauau e oo mai i le taimi nei.

Ae mo le faailoga o le leoleo e tulaga ese lana tautua, o le leoleo lea soo se taimi lava e valaauina ai mo le suesueina o se mataupu e tali mai lava. O ia foi lea e tele ina maua ai e le Ofisa o leoleo nisi o tagata o loo tau sailia i ni solitulafono e le iloa poo ai sa faatinoina, ae mulimuli ane maua mai e leoleo ni faamatalaga e uiga i mataupu ia ma faagasolo ai loa suesuega, lea ua faamanuiaina ai le susuga Det. Sea.

Mo le Vaega o loo mataituina le saogalemu i luga o le alatele, ua faamanuiaina ai le susuga i le alii leoleo ia Savelio Vaofanua i le leoleo o le masina o Tesema, atoa ai ma le faailoga o le leoleo e pito toatele tagata sa ia lokaina i taimi o poloka o le kerisimasi ma le tausaga fou i le ave taavale ‘ona.

O le isi foi leoleo sa faamanuiaina i le vaega lava lea o le susuga ia Pepe Mann, lea foi sa faamanuiaina o ia i se faailoga tauoloa atoa ai ma se tusi pasi.

O le faailoga o le Leoleo o le Masina o Novema na mauaina lea e le alii leoleo ia M. Fale.

Na faafetaia e le afioga i le Komesina o Leoleo ia Tuaolo M. Fruean leoleo uma ua faamanuiaina i le vaiaso na tea nei, ona o le tautua o loo latou ofoina atu mo le atunuu.

O lenei sauniga faapitoa sa molimauina lea e taitai o le matagaluega, o leoleo atoa ai ma o latou aiga.