Ads by Google Ads by Google

Aloaia malo fanau i ai manaoga fa’apitoa o le tino

I le avea ai o le masina lenei o Mati o se masina e ave ai le fa’ataua a le lalolagi atoa i fanau e i ai manaoga fa’apitoa o le tino ma le mafaufau, o le taeao nei lea ua fa’amoemoe le malo e fa’ataunu’u ai se sauniga fa’apitoa e fa’ataua ma aloaia ai fanau uma i le atunu’u e i ai manaoga fa’apitoa o o latou tino.

 

I se fa’atalatalanoaga a le Samoa News ma le Sui Fa’atonu o le Ofisa e Puipuiga Aia Tatau o Fanau e i ai manaoga faapitoa o le tino ma le mafaufau a le malo (OPAD), tofa Tapumanaia Galu Satele Jr i le vaiaso na te’a nei, sa ia fa’amaninoina ai tulaga uma o le polokalame e pei ona fuafuaina mo le taeoa nei, atoa ai ma le polokalame lea ua fa’ataoto e le Ofisa mo le masina atoa lenei o Mati, e fa’ataua ma aloaia ai fanau o lo o i ai manaoga fa’apitoa o le tino ma le mafaufau.

 

O le polokalame lea ua fa’amoemoe e fa’ataunu’uina i le taeao nei i le malae o le Su’igaula, e amata mai i le tamo’ega lea ua fuafua a amata mai i le Paka i Fagaalu, mo le momolina mai o le fu’a e sui o le vaega o fanau e i ai manaoga fa’apitoa o le tino ma le mafaufau i le itula e 6:00 i le taeao, ma aga’i mai ai loa i le Fale Samoa a le malo i Utulei mo le amataina o le sauniga.

 

O luga o le fu’a lea o le a momoliina mai e fanau i le taeao nei, o lo o tu’u ai i luga le pepa o lo o tusia ai le Poloaiga Fa’alaua’itele a le Kovana mo le fa’atauaina o le aso e fa’apitoa mo i latou.

 

Saunoa Tapumanaia e fa’apea, o le taimi lava e taunu’u ai le fu’a i Utulei, ona tauaao atu loa lea mo lona tolaulauina i le taimi o le sauniga fa’apitoa, lea o le a taitaia e le susuga Rev. Uaea Satele.

 

O le afioga i le Lutena Kovana ia Lemanu Peleti Mauga ua fa’amoemoe na te tuuina mai le saunoaga fa’apitoa o le aso, e aloaia ai le fa’atauaina o fanau o lo o i ai manaoga faapitoa o le tino ma le mafaufau i le atunu’u.

 

O polokalame ua fa’atulagaina e le Ofisa o lo o fa’amoemoe mo le masina atoa lenei o Mati.

 

O le aso Gafua e oo atu i le aso Faraile, Mati 7-11 ua fa’atulaga ai asiasiga a fanau nei i aoga maualuluga i le atunu’u, e aofia ai le asia o le maota o le malo i luga o le Maugaoali’i ma le nofoaga o le Fono Faitulafono i Fagatogo.

 

O le aso 14-17 o Mati, o le aso Gafua lea e oo atu i le aso Tofi o le isi vaiaso, ua fa’atulaga e asia ai nofoaga o lo o i ai Falema’i eseese i itumalo i tua e pei o Amouli, Tafuna ma Leone, fa’apea ai ma le falema’i i Fagaalu.

 

O le vaiaso fa’ai’u o le masina o Mati ua fa’amoemoe e asia ai nofoaga e pei o le toese i Tafuna, o le nofoaga o sulufaiga mo i latou e puapuagatia i Tafuna, ma fa’ai’u ai loa i le latou po fa’apitoa i le po o le aso Tofi, 24 Mati, lea ua fa’amoemoe e faia ai a latou fiafia ma matamata ai ata, e fa’atautaia uma ia polokalame e le Ofisa o le OPAD.

 

Saunoa Tapumanaia e fa’apea, o le agaga atoa o le Ofisa, ia fa’ailoa atu i fanau nei e amanaia i latou ma aloaia fo’i lo latou sao i totonu o aiga, atunu’u ma le malo.