Na tutu fa’atasi ta’ita’i o le malo, fono faitulafono faapea ai uo ma aiga e aloaia le tautua a le afioga i le ali’i faipule ia Talolema’agao Lemapu Suiaunoa Talo ua tu’umalo, e ala i se sauniga fa’alemalo sa fa’ataunu’uina i le maota o le Fono Faitulafono i le taeao ananafi.

O molimau eseese e fa’atatau i le soifua galue o lenei ta’ita’i o le atunu’u, na manino ai lona soifua galue faapea ai ma le naunau e fai le mea sili mo lona atunu’u, malo, ekalesia aemaise ai lona aiga e pele i lona loto.

I upu fa’alaeiau na saunoa i ai le susuga a Rev. Tafailematagi Muasau, sa ia toe fa’atepa ai le soifua galue o le afioga i le ali’i faipule, o se tasi sa tu i matagiolo mo lona itumalo ma lona aiga, ae sa tautua fo’i mo lona atunu’u fa’apea lana ekalesia.

Saunoa le ta’ita’i o le sauniga e fa’apea, e ui i le inu gata o le ipu o le oti, peita’i ua fa’ataoto e le Atua le alafua mo soo se kerisiano o lo o soifua i lenei olaga, i tua atu o le tu’ugamau ma le oti, ua mae’a ona ia tapena le ola e fa’avavau mo le lalolagi atoa.

Na auai i lenei sauniga taua le afioga i le ali’i kovana ia Lolo Matalasi Moliga, o ta’ita’i o le Fono Faitulafono faapea ai senatoa ma faipule, atoa ai ma ta’ita’i o le malo, ta’ita’i fa’aleaganu’u, aemaise ai uo ma aiga sa latou molimauina lenei sauniga taua.

I le molimau a le afioga i le alii kovana ia Lolo sa ia taua ai e fa’apea, o aso faapenei i Samoa, e le o se aso e faigofie i finagalo o uo ma aiga aemaise ai ta’ita’i o le atunu’u, aua o le aso e fetaia’i ai ma loimata maligi o le fa’anoanoa, ona o le motusia o le mafutaga i le malaga a le oti, peita’i e ui i le matuitui o le oti, e tatau lava ona malamalama le tagata soifua, o lona taunuuga lava o le tu’ugamau.

Saunoa Lolo e fa’apea, e tatau i le tagata soifua ona ola ma magafagafa, ia o o mai le oti ae ua sauni e talia.

Sa ia taua e fa’apea, o ni isi o tagata e fiafia e ola ae fefefe i le oti, peita’i e le o le polokalame lea a le Atua mo so o se kerisiano.

Sa ia fa’afetaia le faletua o le ali’i faipule ua tu’umalo ia Sima Tima Malele-Talo ma le aiga, e tusa ai o le tautua ma le auaunaga a le afioga i le ali’i faipule i le malo, fono faitulafono, faapea ai aiga ma le atunu’u atoa.

Na fa’amatala e le afioga i le ali’i faipule ia Puleleiite Tufele Li’amatua, lea na fai ma sui o le maota o sui na te faia se molimau e tusa ai o le mafutaga ma le ali’i faipule ua tu’umalo e fa’apea, o Talolema’agao, o se faipule e tumu i le loto alofa, e agamalu toe naunau e fia fai mea lelei mo lona aiga, itumalo ma le atunu’u atoa.

Saunoa Puleleiite i lana molimau e fa’apea, so o se taimi la te talanoa ai ma le ali’i faipule ia Talolema’agao, e talanoa mai lava o ia o le naunau e fia fai se mea lelei mo lona itumalo, aemaise ai le atunu’u atoa e aofia ai ma lona aiga.

O le afioga i le ali’i peresetene ia Gaoteote Palaie Tofau na tauaaoina le i’ugafono malilie fa’atasi a le Fono i le faletua ia Sima, e aloaia ai le tautua a Talolema’agao i le fono ma le atunu’u.

Na nofoia e le alii faipule le nofoa a lona itumalo o Sua #2 i le 2010, seia o o mai lava i le taimi na valaau ai le Atua ia te ia. Sa avea o ia ma ta’ita’ifono o le komiti o Aoga a le maota o sui, ma amata ai loa ona ia finau e fa’aleleia tulaga tau a’oa’oga i totonu o Amerika Samoa, aemaise ai lava lona finau e si’i totogi o faiaoga, ona o ia fo’i o se faiaoga, lea na tautua i le Matagaluega o Aoga mo le 33 tausaga, amata mai lava i le faiaoga seia o o ina avea ma Pule Aoga.

Ua fa’atusaina Talolema’agao o le Lupe sa olo i le Fale Fono, ae talofa, ua le toe fa’alogoina si ana olo, ao lea ua lele atu i le vao maoa, talofa e, ua lilo atu i le vaai ma ua le toe iloa.

Ia fa’amaise le Atua i le tina ia Sima ma le aiga fa’avauvau, ona o le motusia o le mafutaga ma le afioga i le ali’i faipule ua tuua le malo.