Ads by Google Ads by Google

Aloaia Dr. Oreta e avea ma Ofisa Sili o le Ofisa Oloa malo

Ua aloaia nei le avea o le tama’ita’i foma’i ia Dr. Oreta Mapu Crichton e avea ma Ofisa Sili o le Ofisa o Oloa e le malo, e pei ona tofia i ai o ia e le afioga i le ali’i kovana sili ia Lolo Matalasi Moliga, ina ua pasia o ia e le Senate i le taeao ananafi i le palota e 12-0.

 

O le fa’aiuga a le maota maualuga e pasia ai Dr. Oreta, na faia lea ina ua mae’a se iloiloga sa fa’atautaia e le Komiti o le Fa’agaoioiga o le malo, i lalo o le ta’ita’iga a le afioga i le ali’i senatoa ia Galea’i M. Tu’ufuli o le ta’ita’i komiti, lea na fesiligia ai e le komiti agava’a o le tama’ita’i foma’i.

 

O le to’atele o afioga i senatoa na maua le avanoa e saunoa ai i le taimi o le iloiloga, sa latou fa’ailoa i le molimau le fa’amalieina o i latou i ona agava’a atoa ai ma le tele o tausaga sa tautua ai mo le malo o Amerika Samoa, e le gata i le nofoaiga a Togiola ma Faoa ua mavae atu, ae fa’apea ai fo’i ma le nofoaiga a Lolo ma Lemanu o loo tula’i mai i le taimi nei.

 

Na tutusa finagalo o Alo Faauuga, Uti Petelo ma Laolagi Fonoti Savali Vaeao, afai e le fa’amoemoe le tagata faigaluega i le Atua, e le mafai ona manuia ana galuega e faia.

 

Na fa’afetaia e Alo ma Uti le afioga i le ali’i kovana, ona o le atamai o lana fa’aiuga ua mafua ai ona ia tofia le tama’ita’i foma’i e avea ma ta’ita’i o lenei ofisa, ae na fautua le afioga i le ali’i senatoa ia Magalei Logovi’i i le molimau e fa’apea, afai o i ai ni fa’aletonu sa tutupu i tausaga ua mavae i le ofisa, ua tatau loa ona latou galulue fa’atasi ma lana aufaigaluega e foia ia fa’afitauli.

 

“Ua lava lou tomai i le fa’atinoina o le galuega, ua loa fo’i lau tautua i le malo, afai fo’i o i ai ni fa’aletonu i le ofisa, o le aoga lena o le tofia o oe e avea ma ta’ita’i, ina ia auli ma fa’aleleia fa’aletonu sa tutupu mai i tausaga ua mavae,” o le saunoaga lea a Laolagi e lagolagosua ai i le saunoaga a Magalei e tusa ai o vaega e moomia le fa’aleleia i le auaunaga a le Ofisa.

 

Ae na saunoa le afioga i le ali’i senatoa ia Soliai T. Fuimaono e fa’apea, o se tasi o auaunaga ua tatau ona toe fa’aolaola e le Ofisa o Oloa, o le toe faia lea o le Faleoloa sa masani ona fesoasoani ai i le malo ma le atunu’u.

 

Saunoa atili Soliai e fa’apea, o auaunaga ia e fitoitonu lelei ma le auaunaga a le Ofisa, faaopoopo ai loa ma le mulimulita’i i tulafono o tauofoga, ona manuia atili ai loa lea o le tautua a le ofisa mo le malo.

 

O ni isi o fautuaga sa tuuina atu e ali’i senatoa, o le vaavaai lea i tulaga o tauofoga a le malo mo galuega tetele, ina ia mautinoa e le toe tula’i mai ai fa’aletonu e pei ona maitauina i ni isi o galuega ua mae’a ona faia i ai tauofoga, lea sa molimauina ai ni isi o fa’aletonu.

 

O le vaiaso na te’a nei na pasia ai e le maota o sui le tama’ita’i foma’i i le palota e 14-0, ma ua aloaia nei le avea o ia ma Faatonusili o le Matagaluega.