Ads by Google Ads by Google

Aloaia avea afioga Save ma Komesina o Leoleo

Ua aloaia nei le avea o le afigoa a Save Liuato A. Tuitele e avea ma Komesina o le Matagaluega o Leoleo, ina ua fulisia le maota o sui i le vaiaso nei e fa’amaonia tofiga a le alii kovana fa’asaga te ia, i le palota e 15-0.

 

O le vaiaso ua te’a na fulisia ai fo’i le maota maualuga e fa’amaonia tofiga a le kovana.

 

O le fa’aiuga a le maota o sui e sapaia tofiga a le kovana, na faia lea ina ua mae’a sa latou iloiloga sa fa’atautaia i le amataga o le vaiaso, lea na latou fesiligia ai agava’a o le ali’i komesina na te tauaveina ai lenei tofiga taua, lea fo’i na matua fa’atumulia ai luga o le maota i sui o le matagaluega o leoleo, na afifio atu e faaalia lo latou lagolago ma le sapasapaia o le afioga a Save e avea ma komesina.

 

Mai le tele o mataupu sa fesiligia ai e faipule ia Save, atoa ai fesili sa fia malamalama ai ni isi o afioga i faipule, o se tasi o mataupu sa fesili i ai le faipule mai Pago Pago ia Meauta Lauoi Mageo, o le mafua’aga ua le aloaia ai e le Matagaluega o Leoleo le fa’atonuga a le Matagaluega o Tagata Faigaluega a le malo, e taofia ai le toe faia o ni suiga i totonu o matagaluega ma ofisa a le malo, se’i vagana ua aloaia mai e le fa’atonusili o lea Matagaluega.

 

Saunoa Meauta e fa’apea, e ui o lea ua taoto le faaiuga e taofia ai le toe faia o ni suiga, ae sa fa’aauau pea ona faia e le Ofisa o Leoleo a latou suiga, ma ia fia maua ai se fa’amalamalamaga mai ia Save.

 

Na fa’amanino e le afioga a Save e fa’apea, ua mae’a ona fa’amanino i le Fa’atonu o le Matagaluega o Tagata Faigaluega a le malo ia Sonny Thompson le autu sa faia ai suiga e pei ona fesiligia, o le faia lea o suiga ina ia si’itia ma fa’aleleia atili ai le auaunaga a le Ofisa o Leoleo i le atunu’u.

 

Saunoa fo’i Save e fa’apea, sa fautuaina e le alii kovana ia Lolo Matalasi Moliga le Ta’ita’i Leoleo, le tofa Tauese Va’a Sunia, afai e i ai ni suiga e fia faia mo le manuia o le Matagaluega, ia fai.

 

O le to’atele o isi faipule na maua le avanoa e saunoa ai, sa latou taua le fa’amalieina o i latou i ona agava’a atoa ai ma le tomai o lo o ia te ia, na te tauaveina ai le tofiga komesina o leoleo.

 

Na fautuaina e le afioga i le tama’ita’i faipule ia Vui Florence Vaili Saulo le ali’i komesina, ina ia silasila toto’a i tulaga o totogi o leoleo o lo o maualalo pea.

 

Sa taua fo’i e Vui ia Save le i ai o ni fa’asea mai ni isi o lona itumalo, e fa’atatau i fa’aiuga e fai i luga o le masani, ina ia silasila toto’a i ai.

 

Na fesili le afioga i le sui fofoga fetalai ia Fetu Fetui Jr ia Save e fa’atatau i lana fautuaga lea ua tu’uina atu i le ali’i kovana e tapunia ai lala o le ofisa o leoleo i Leone ma Tafuna.

 

I le maoa’e ai o agava’a o Save e mafai ai ona ia tauaveina lenei galuega, na saunoa ai Fetu e fa’apea, afai na te silafia o lana fautuaga ua tu’uina atu i le alii kovana e tapunia ai lala o le ofisa o leoleo i Leone ma Tafuna o se fa’aiuga lelei, ia fai.

 

Sa ia fautuaina fo’i Save ina ia silasila toto’a i so o se fa’aiuga e si’itia ai le tautua ma le auaunaga a le Ofisa o Leoleo.

 

Ae i fautuaga ma fa’asea mai le atunu’u aemaise lava i tagata matutua e fa’atatau i amio o lo o fa’aalia e leoleo i le taimi e fa’atino ai a latou tiute, na fautuaina e le sui fofoga fetalai le ali’i komesina ina ia silasila toto’a i fautuaga ma fa’asea nei.

 

Na fa’ai’u le iloiloga i le fa’afetaia e Save o fautuaga ma timaiga mai afioga i faipule, o le a avea lea ma ta’iala e fesoasoani ai i le fa’atinoina o lana galuega.