Ads by Google Ads by Google

ALOAIA AFIOAGA FAGATOGO LANA AU LAKAPI

Ua aloaia nei e le pulega a alii ma faipule o le afioaga i Fagatogo, tulaga maualuga ua ausia e lana au lakapi ta’ito’a 15 i le faai’uina ai o le taamilosaga lakapi a le Iuni a Amerika Samoa i lenei tausaga.

 

E ui e le’i mae’a aloaia le ta’amilosaga i lenei tausaga ona o se tulaga faaletonu i le malae i Tafuna sa faatinoina ai le taamilosaga, peita’i e faamuta faafuase’i le taamilosaga o lo o umia e le au lakapi a Fagatogo le talita, e leai fo’i sana faiaina.

 

Na faamaonia e se sui o le Iuni Lakapi i le Samoa News le umia e le au lakapi a Fagatogo o le talita a le ASRU mo lenei tausaga, atoa ai ma le avea o i latou ma siamupini ina ua mae’a le taamilosaga e leai ma se faiaina.

 

O le lua ai lea o tausaga sosoo o umia e le kalapu lakapi a Fagatogo le talita ma le siamupini i taamilosaga taitoa 15 a kalapu lakapi eseese uma i le atunuu.

 

O le aso Toona’i na te’a nei na faia ai se fiafia tele a le afioga i Fagatogo ma sui o le au lakapi, e faafetaia ai le tulaga maualuga ua mafai ona ausia e tama fanau a le afioaga i falaga maea o le lakapi o lenei tausaga, ma faaoo atu ai foi le agaga faafetai o ta’ita’i i le pulega ma le kalapu lakapi atoa, ona o le finau e siitia le igoa o le afioaga i tulaga o faagatama faapenei.

 

I se talanoaga a le Samoa News ma le faiaoga o le au lakapi a Fagatogo ia Tui Neueli i le vaiaso nei, sa ia taua ai le aloaia e le afioga o le tulaga ua o o i ai le taumafaiga a le au lakapi e pei ona latou umia ai le talita ma le siamupini o lenei tausaga.

 

Na taua e Neueli e faapea, o le faaiuga ua faia ina ia aloaia loa le tulaga ua ausia e le au lakapi i lenei tausaga, sa faia e le pulega a le au ina ua fiu e faatali se isi faatonuga mai le ASRU i le taimi ma le aso e toe faaauau ai le taamilosaga lea e tolu vaiaso o taofia, ma o lea foi faaiuga sa talia e le pulega a alii ma faipule o Fagatogo.

 

O tulaga le avanoa i le malae i Tafuna ina ua faaaoga i taaloga Football a fanau aoga na mafua ai loa ona faaselemutu faafuase’i le faaauauina o le taamilosaga a le ASRU, ae ua i ai le fuafuaga o kalapu e tolu e le’i o o i le lu’iina o le talita i le tausaga lenei, o le a amata i ai le taamilosaga i le tausaga fou.

 

E talitonu le Samoa News, o kalapu e tolu e le’i o o i le talita e aofia ai Fagasa, Pago Pago ma le kalapu a Avele.