Ads by Google Ads by Google

Aisea ua soona ta solo ai mamanu a Samoa?

O le soona taina o mamanu a Samoa i ofu, ta’avale aemaise ai pe’a ua vaaia le ta ta solo i tino o ni isi o tagata Samoa, ua tula’i mai ni manatu faasea o ni isi o le atunuu i le avea lea o nei uiga ma itu ua ta’u maualaloina ai le taua o mamanu a Samoa, peitai na taua e le faletua o Tisa, e le afaina lea tulaga, sei vagana lava ua faia i se auala e faa leagaina ai mea taua a Samoa.

O manatu mai nisi o tamalii o le atunuu, tufuga ta tatau aemaise ai o le au fai tofa, na alia’e mai ina ua faalauiloa le Tauvaga Ta Tatau a le Tisa’s Tattoo Fest, lea ua faamoemoe e faia i le vaiaso fou, o le lona 8 ai fo’i lenei o tausaga talu ona tatala lenei tauvaga.

Fai mai le molimau a Etuale Lavea, o se tama ua 34 tausaga talu ona ta lana soga’imiti, e leai se isi itu e pito sili ona aulelei ai le Samoa pe a ta ai mamanu a le atunuu, nai lo le soga’imiti a alii ma le malu a tamaitai, aua o le tatau moni lena a Samoa, ae o le faaaoga o mitiafu, ie lavalava, o ogavae ma ogalima faapea ai ma tino o taavale e ta ta solo ai mamanu, o se tulaga le manaia lea i le vaai a le Samoa.

Ae na taua e Tisa e faapea, o le taua o le ta ta o mamanu i mitiafu, ie lavalava, ogavae ma ogalima faapea ai ma tino o taavale, o lo o mafai ai ona faalauiloa atu mamanu a Samoa i vaega eseese o le lalolagi o lo o oo atu i ai oloa nei.

“Ou te manatu a’u ia e leai se afaina tele i lea tulaga, na pau lava le tulaga ou te manatu e afaina, o le faaaoga lea e tagata o mamanu i ni gaioiga e faamaasiasi ma ta’u maualaloina ai le igoa o Samoa,” o le molimau lea a Tisa.

“O mamanu o lo o ta i siapo, tino o tagata Samoa ma lavalava, o lo o faamatala atu ai le tala e faatatau ia Samoa ma ona tagata, o lo o faailoa atu ai foi le taua o lana aganuu aemaise ai o uiga eseese o mamanu taitasi o lo o faailoa atu i galuega taulima o lo o faia ma auina atu i fafo,” o Tisa lea.

O le isi faataitaiga na taua e Tisa e mafai ona faamatala ai le faaaoga o mamanu e faamataga ai le igoa o Samoa, pe afai o se tagata e le o se Samoa e le malamalama i le taua o le aganuu ma mamanu a Samoa, ae ofo atu i ai se soga’imiti.

O le tasi faataitaiga o le alii lea na faalauiloa e le Samoa News lona ata i le tausaga na te’a nei, o lo o ia laeiina le malu a tamaitai.

“O ituaiga tu la nei ma aga e ta’u maualalo ai Samoa i le lalolagi, pe afai e tau solomua lava i o tatou tagata ona fai mea e faamataga ai Samoa, e tiga na vaai atu le tufuga ta pe’a o le tama le alii lea ae ta ai lava le malu a tamaitai,” o Tisa lea.

Fai mai Tisa, o le tele o mamanu a Samoa ua salalau atu i le lalolagi, ua mafua ai ona toatele tagata e fiafia ia Samoa ma naunau e fia oo mai i Samoa sei matamata ma vaavaai i lona matagofie.

Na taua e Finau Afereti, o se tasi o alii ta pe’a i le atunuu e faapea, e leai se afaina o le taina o mamanu poo pe’a i vaega eseese o le tino, sei vagana ua faia i se auala e ta’u maualaloina ai le igoa o Samoa.

I le silia ai ma le 10 tausaga o avea lenei alii ma tagata ta pe’a i le atunuu, na taua e Afereti le taua o le faalauiloa o Samoa i atunuu i fafo, e le gata i soga’imiti ma malu ae o pe’a i lima, vae faapea ai ofu o lo o tau i vaega eseese o le lalolagi.

“O isi ia auala o loo faalauiloa atu ai Samoa i le lalolagi, e le gata i pe’a o lo o ta i tauau ma ogavae, ae o mamanu foi ua lolomi i ofu e pei o miti afu, pau le itu ou te le lagolagoina o mamanu ia ua ta i tino o taavale, leaga o iina lea o le a foliga mai ai ua ese le auala ua faalauiloa ai e tagata mamanu a le atunuu,” o le molimau lea a le susuga ia Afereti.

O le faaaliga lona 8 a le Tisa’s Tattoo Fest lea ua faamoemoe e amata i le aso Faraile ae faaiu i le aso Sa, 26-28 o Oketopa, o le a maimoa ai le atunuu i tufuga ta tatau e le’i silasila muamua i ai.

I se faatalatalanoaga ma le faletua ia Tisa e uiga i le faamoemoe lenei, sa ia taua ai lona sauni e aami isi foi aiga ta tatau a Samoa e le’i vaai muamua pe molimauina foi e le atunuu i le tele o tauvaga ua maea atu.