O le to’atele o tagata Manu’a na fesiligia i le mataupu e uiga i le sisiina lea o le latou fu’a i Tutuila nei ae ua le ave i Manu’a, sa latou faailoa lo latou le fiafia ona o le faaiuga ua faia e le malo, ma ua atagia mai ai le le amanaia e le faigamalo o le motu o Manu’a.

O le aso Gafua o le vaiaso fou, Iulai 16 e faamanatuina ai le atoaga o le 108 tausaga talu ona osia le feagaiga i le va o le malo o Amerika ma le motu o Manu’a, ma ua i ai le fuafuaga a le malo, o le itula e 3:00 i le afiafi o le aso Sa, o a taeao lea, o le a faia ai se sauniga lotu ae o le aso Gafua e soso’o ai, o le aso malolo lea a le malo mo le fu’a a Manu’a.

Na taua e nisi o tagata Manu’a e faapea, e le’i faia se fono a le itumalo e iloilo ai poo fea e sisi ai le fu’a, peitai o lea ua fai e le malo le faaiuga e aunoa ma le fesiligia o taitai o Manu’a.

“Ua le kasi se mea ua faia e le malo e faailoa mai ai lo lakou le amagaiaiga o Magu’a, e le gata i le faasoasoaiga o kupe, o le kamaoaiga, o faamanuiaga mai le malo kele, ae ua oo lava foi i mea e pakigo ia Magu’a e pei o laga fu’a ua oo i ai le malosi o le malo,” o le saunoaga lea a se tasi o tagata matua e le’i finagalo e faailoa lona suafa sa fesiligia e le Samoa News.

O le aso 16 Iulai, 2010 na faamanatuina ai le fu’a a Manu’a i se sauniga lotu sa faia i le maota o Lee Auditorium i Utulei, e aunoa lava ma nisi polokalame na mulimuli mai ai, ina ua mae’a foi le sauniga lotu, e leai se taumafataga mamafa poo se vaimalu na tapenaina e le malo mo le au valaaulia faapea ai ma tagata Manu’a sa faatasi atu.

O le alii faifeau ia Rev. Elder Tootoo Seanoa o le ekalesia EFKAS mai Ofu na taitaia le sauniga, ae o viiga o le Atua na lagiina lea e lana aufaipese.

I le saunoaga autu o le aso lea mai le kovana sili ia Togiola Tulafono, sa ia faamalulu atu i tagata Manu’a ona o le le sisiina o le fu’a a Manu’a i Faleula, le malae na sisi a’e ai le ulua’i fu’a a le malo tele o Amerika

Na faailoa e Togiola i tagata sa faatasi atu i lea aso, o le faaiuga e faamanatu le fu’a a Manu’a i Tutuila, sa tasi i ai taitai o le malo ma taitai o Manu’a i se feiloaiga sa faia,

Na umi se taimi o faamatala e Togiola i lea sauniga le uluai taimi na sainia ai le feagaiga i le va o Tutuila, Manu’a ma le malo tele o Amerika. I lona talitonuga, o le faamanatuina o le fu’a a Manu’a i lena tausaga, o le faamanatuina lea o le alofa o le Atua i tagata Manu’a, atoa ai ma le alofa na faatula’i e tuaa ua lagomau mai tiasa mo tupulaga o le lumana’i.

O le tausaga na te’a nei na faamanatuina ai le fu’a a Manu’a i Manu’a lava, ma sa molimauina le matagofie o faafiafiaga faaleaganuu na tapena i ai le itumalo atoa, ao molimauina e taitai o le malo.

E to’alua isi tagatanuu o Manu’a sa fesiligia e le Samoa News e uiga i lenei mataupu, peitai e le’i finagalo i laua e faailoa o laua suafa, ona o atugaluga lava i le ono aafia i pulega mamalu a alii faipule o le itumalo, peitai i lo la talitonuga, e leai se mea o le a sisi ai fua le fu’a a Manu’a i Tutuila nei, ae tatau lava ona avatu i Manu’a.

“E tatau ona manino Tutuila, e lua lava feagaiga na sainia i le va o motu nei e lua ma le malo tele, o le feagaiga a Tutuila ma le malo tele i le 1900, ma le feagaiga a Tui Manu’a ma le malo tele i le 1904, o lona uiga la, e le feaiaia’i feagaiga ia e lua, e le tatau fo’i ona tuu faatasia leaga e eseese,” o le molimau lea a le isi tina matua o le itumalo.

Saunoa le tofa i le tootoo ia Le’i Sonny Thompson e faapea, afai ua sa’i finagalo o tagata Manu’a ona o le faaiuga ua fai e le malo, ua tatau ai, ona o le fu’a lava ia a Manu’a e tatau ona sisi i Manu’a ae le o Tutuila nei.

“E le’i faia se fono a le itumalo poo fea e sisi ai le fu’a, ae o lea ua fai e le Ofisa o Mataupu tau Samoa le faaiuga e sisi le fu’a i Tutuila nei, e le toe oo foi i ai sa matou leo ona o le faaiuga lava ia e fai e le malo, ae o le mea moni, o le fu’a a Manu’a e tatau lava ona sisi i Manu’a,” o le saunoaga lea a le tofa Le’i.

Saunoa Senatoa Velega Savali Jr, o le fu’a lava ia a Manu’a e tatau ona fai i Manu’a, tusa lava poo le a le finagalo o le malo, o le fu’a a Manu’a e sisi i Manu’a.

O le finagalo foi lea o le afioga i le alii Faatui ia Laolagi Fonoti Savali Vaeao ina ua fesiligia e le Samoa News e uiga i lenei mataupu.

Saunoa Laolagi, e leai lava se isi nofoaga e tatau ona sisi ai le fu’a a Manu’a sei vagana ai Malaetele.

Na faateia Laolagi ina ua fesiligia o ia e le Samoa News e uiga i le fu’a a Manu’a, ona sa ia taua, e le’i faia se fono a le itumalo e talanoaina ai le faia o le fu’a i Tutuila nei.