A’o tu’u fesili ai le to’atele o le atunuu aemaise lava i tagata mai fafo o loo aumai i totonu o le teritori, pe aisea ua maualuga ma taugata ai pili o le falema’i e totogi e tagata mai fafo nai lo tagatanuu o Amerika Samoa faapea ai ma i latou ua avea ma tagata nofomau, na faamanino mai ai e le pulega a le LBJ e faapea, o loo manino i le tulafono toe teuteu a Amerika Samoa ituaiga tagata e agavaa ona maua togafitiga fai fua mai le falema’i.

I le vaega o le tulafono 13.0602 lea na siitia mai e le pulesili a le LBJ o Michael Gerstenberger i le iloiloga lea sa faia i le vaiaso na te’a nei, sa ia taua ai e faapea, o tagata o loo fai mai le tulafono e agavaa i togafitiga mai le falemai e aofia ai tagatanuu uma o Amerika Samoa, o tagata e le o ni tagatanuu ae ua faaipoipo ua silia i le 10 tausaga o aumau ma latou fanau i le teritori.

O isi tagata e aofia ai tagata faigaluega a le malo tele ua tofia e galulue i Amerika Samoa.

Na taua e Olosega Amituanai o Aua e faapea, “e le tatau ona eseese tupe e totogi e tagata i le falemai aua o loo totogi lafoga uma tagata faigaluega i le malo, ma fesoasoani i le atina’eina o pisinisi.”

Na taua e Gerstenberger e faapea, e ui e le o se matafaioi a le falemai le saili o tupe e faatino ai lana auaunaga, peitai o le mea tonu lena ua faia e le LBJ i le taimi nei, o le saili lea o tupe mo ia lava.

Sa ia taua foi e faapea, ua taoto se fuafuaga a le falemai ina ia faaopoopo lana paketi i le $40 milioina mo le Tausaga Tupe 2013, ina ia fesoasoani atili ai i lana auaunaga.

“Afai e silafia e le LBJ e le lava lana paketi o loo i ai i le taimi nei, e tatau ona talosaga i le kovana ma le fono e toe faaopoopo se isi tupe,” o le saunoaga lea a Nuutofia Nuusolia sa i ai i le taimi o le iloiloga.

Na taua e Togiola Tulafono i luga o lana polokalame i le faaiuga o le vaiaso na tea nei e faapea, na

O le vaiaso muamua o Iulai lea ua faamoemoe le pulega a le LBJ e faalauiloa aloaia ai loa le aso e faamamaluina ai a latou siitaga o pili a le falemai.

I le iloiloga sa faia i le vaiaso na tea nei, e na o Lelei Peau ma Moananu Va sui o le komiti faafoe sa auai, faatasi ai ma le pulesili ia Gerstenberger.

Na taua e kovana Togiola Tulafono i luga o lana polokalame i le faaiuga o le vaiaso na tea nei e faapea, ana pasia e le Senate le pili e $10 miliona lea na ia faaulu i le Fono e faatupe ai le auina atu o gasegase i fafo mo togafitiga, e le tau toe sailia e le LBJ se isi alagatupe mo lea tautua, aua o lea o le a tupu pea le tupe lea ma faaauau ai pea le faatupeina o lea tautua.

Saunoa Togiola, afai e faaalu e le LBJ le $1 e tasi e faatupe ai togafitiga mo le soifua maloloina o tagata, e toe totogi mai e le malo tele i lalo o le polokalame a le Medicaid le isi $1 e faafetaui ma le $1 ua faaalu.

“O lona uiga, afai e $10 miliona e faaalu e le LBJ e faatupe ai togafitiga o gasegase i fafo, o le a toe maua mai ai le isi $10 miliona mai lalo o le polokalame a le medicaid, ma faaauau ai lava ona tupu le tupe lea e le toe motusia,” o le faamaninoina lea e Togiola o le mataupu lea.

tusia Ausage Fausia