Ads by Google Ads by Google

AISEA EA UA TELE AI LE GAOI?

Osofa’i Au Gaoi Faletupe Hawaii Ma Le Faleaiga Pizzahut

O loo faagasolo i le taimi nei suesuega a le Vaega Suesue a le Ofisa o Leoleo, i le tau sailia lea o i latou na osofaia le lala o le faletupe a Hawaii i Tafuna, faapea ai ma le faleaiga o le Pizzahut i le po o le aso Tofi na te’a nei atoa ai ma le vaveao ananafi.

Na faamaonia mai e le Taitai o le Vaega Suesue a le CID, Cmdr. Lavatai Taase Sagapolutele e faapea, o loo faagasolo i le taimi nei a latou suesuega e uiga i mataupu ia e lua.

“Pau le itu lea ua mafai ona faamaonia, sa talepe e tagata le lala o le Faletupe o Hawaii i Tafuna, faapea ai ma le faleaiga o le Pizzahut, peitai e le o mafai ona mautu mai i le taimi nei pe fesootai osofaiga ia e lua, ae o le a foi le taimi na tupu ai,” o le saunoaga lea a Cmdr Lavatai ina ua fesiligia e le Samoa News.

E le o mafai i le taimi nei ona faamaonia mai pe sa i ai ni mea aoga na gaoia i osofaiga nei e lua, ae pe fia foi se tau aofa’i o mea ua faaleagaina.

E lomia lenei ripoti i le afiafi ananafi e le’i mafai foi ona faamaonia mai pe ua i ai nisi ua masalomia i nei osofaiga.

O se molimau na valaau mai i le Samoa News i le taeao ananafi, sa ia taua ai leoleo o loo vaaia i le nofoaga o loo i ai le faletupe a Hawaii i Tafuna, faapea ai ma le Pizzahut.

O le te’a o le 7:00 i le taeao ananafi na taunuu ai le Samoa News i le nofoaga o loo i ai le faletupe a Hawaii i Tafuna, ma vaaia ai lipine samasama a leoleo ua toso faataamilo i le tino o le faletupe.

O le pito i tua o le faletupe a Hawaii na vaaia ai ni faamalama se lua ua nuti lili’i, ma o loo masalomia o le itu lea na ulufale atu ai le au gaoi i totonu o le faletupe.

Ae i le faleaiga o le Pizzahut sa vaaia ai se pu lapo’a i se tasi o faitoto’a o loo i le autafa, e foliga mai o se ma’a na togi ma faaleagaina ai.

O totonu o le faleaiga na vaaia ai le taatitia ai o tioata nuti mai le faitotoa sa faaleagaina.

Na faamaonia mai e EJ Ozu le pule o le lala o le faletupe a Hawaii, le osofaia lea o le lala o le latou faletupe i Tafuna, ma mafua ai loa ona tapunia lana auaunaga i le aso ananafi ma le faanaunauga, o le a toe tatala i se taimi o i luma pe a maea suesuega o loo faia. Sa ia taua foi lona maua o ni ripoti i nisi foi pisinisi e latalata atu i le faletupe na osofaia e tagata.

Na taua e se tagata faigaluega a le Pizzahut i le Samoa News e faapea, na faateia i latou ina ua usu atu i le taeao ae o latou vaaia ai le faaletonu ma faafesootai ai loa le ofisa o leoleo.

Na taua e se tagata faigaluega e le’i finagalo e faailoa lona suafa, e lata i le $8,000 le tau aofa’i o meatotino ua faaleagaina o le faleaiga, lea e aofia ai le faitoto’a faapea ai ma le pusa tupe o loo i totonu.

Na masalomia le tau mafai o le au gaoi e talepe le sefe tupe u’amea sa i totonu o le faleaiga, peitai e le’i mafai ona latou faia ona sa loka, toe mamafa fo’i.

E leai se tupe sa i totonu o le sefe tupe, sei vagana ai le tupe sa i totonu o le pusa lea e faaputu i ai tupe o loo foa’i e le atunuu mo le Koluse Mumu sa i luga o le laulau, na o le au gaoi ma ave.

O loo faaauau pea i le taimi nei suesuega a leoleo e uiga i mataupu ia e lua.