Ads by Google Ads by Google

Ai Silia fo’i Tafuna - Ta’amilosaga Pi’i

Ona o lo ’o fa’aauau pea lava le ta’amilosaga pi’i a le fanau aoga i a’oga maualuluga a lo tatou malo, ua ‘iloga mai le malosi pea o le taumafaiga a le ‘au pi’i mai le a’oga maualuga a Tafuna i le taimi nei.

O le ta’amilosaga pi’i na faia lea i le Fale Ta’alo a Leone i le fa’ai’uga o le vaiaso na te’a, ma sa ‘iloga le malolosi pea o taumafaiga a le ‘au pi’i mai le Malae o le Toa. Ae le o mamao lava la latou va ma le ‘au pi’i mai le Malae o le Vikings i Fagaitua.

Peita’i, na oso le mea malosi a le ‘au Pi’i mai tama o le taulaga i Samoana, le laumua o le Malie, ma sa fa’ate’a Fagaitua i le emo ane o le ata, ua tutusa lelei o latou togi ma Samoana i le tulaga lua i le tauvaga lenei.

O se tasi lenei o ta’aloga ua fa’atautaia e le ASHSAA mo le fanua a’oga ua fiafia fo’i e toe fa’aolaola mai lea ta’aloga sili ona umi o tauva ai tagata o malo ta’itasi o le lalolagi. Na to’atele sui o a’oga nei e tolu sa auai e fa’amalosi’au i a latou tama pi’i, ma sa fa’apea fo’i ona fa’atumulia le itu o tapua’iga a matua, aiga ma uo ae maise e masani e fia maimoa i le fa’agatama e fa’aalia ai lava le maso ma le malosi o ali’i talavou Samoa.

I vaega ta’itasi sa fa’atulaga ai le ta’amilosaga, ua ‘iloga mai e lalamua ai lava se Tafuna, ma e soso’o atu ai le Fagaitua, ae o paga mamafa pauna na fa’ato’a oso ai le mau a Samoana ma ‘iloga ai, e fai lava fo’i si vevela o tama o le taulaga.

Ina ua mautinoa le tulaga muamua o le Laumua o le Toa i pi’iga fa’atauva i Leone Gym, sa fa’apea fo’i ona soso’o atu Fagaitua e tusa e lima lava togi o mulimuli atu ai ia Tafuna. O se mea la na maofa ai, ona na amata mai lava le ta’amilosaga e mulimuli lava Samoana i lea fa’asologa, ona e tau leai ni a latou tama pi’i i vaega o paga mama, ma e le’i taumafai lelei mai ai lava ni tamaiti a’oga i na vaega o le ta’amilosaga pi’i.

O le aso To’ona’i lenei o le a fa’atautaia ai loa le sa’iliga siamupini o Pi’iga a High Schools, ma e le o toe mama lava se taumafaiga a nei a’oga uma e tolu. O se mea uiga ‘ese pe afai ae emo ane le ata, ua muamua se a’oga e le’i muamua lava talu mai le amataga!

O le sa’iliga o siamupini o le a faia lea i le faleta’alo o Samoana i Utulei i le aso To’ona’i nei, ma o le a mata’ina fo’i lea filigamaea i le maimoa. Fa’ailoa atu i matua, ia alofagia lava taumafaiga a le fanau, o ane e fa’amalosi’au ia i latou, e le iloa lava ala o manuia, atonu o lana taumafaiga lea e fesoasoani atili fo’i e fa’atupe le a’oga a si ou alo pe a aga’i atu ina a’oa’oina i le Koliosi i fafo.

O le ‘au ta’a’alo a Kanana Fou sa ta’ita’ia mai lea e Bruce Scanlan, o lo ’o va’aia lava lo latou fa’aogatotonu i taumafaiga a nei ‘au ‘iloga i le pi’i i le va o a’oga nei e tolu, ma ua aga’i ina va’aia, e fa’ato’a oso lava se mea malosi a le ‘au pi’i lea i le sa’iliga o le siamupini.

Ua fa’apea fo’i taumafaiga a le Nu’uuli Poly Tech Wildcats. Ua tali tutusa lava aga a lea ‘au pi’i ma ituaiga o manufe’ai o lo ’o fa’aigoa ai. E fa’apuna lava le pusi ma lana fela’u! Ua ‘iloga, e le fa’ailoa telea metotia pi’i a latou tama lelei, ai lava fa’ato’a fa’aalia i le aso To’ona’i nei lea fo’i fa’apolopolo ae a le siamupini ia mautinoa!

O lo ’o fa’apolopolo mai la latou tama mamafa i le pi’i le ali’i lea o Daniel Etuale, masalo o lo ’o fa’aoso mai i le toe ta e maua ai ‘ai lelei mo le Polytech.

O le ‘au a Leone, o lo ’o matele lava ina lavevea latou tama, ma ua fa’amalolo lelei i latou ina ia lava saunia mo le ta’amilosaga i le vaiaso nei e sa’ilia ai fo’i tama matutua i le pi’iga.

O le ali’i o Sione Lui o le South Pacific Academy o lo ’o lalamua mai lava i le paga 145 pauna le mamafa ma e mafai lava ona ia ‘avea le paga lea pe afai ae o malolo lelei  ma koleni fa’alelei mo le fa’amoemoe lelei i lenei aso To’ona’i.

Ua vala’aulia fa’aaloalo atu uma i aiga ma matua o i latou o lo ’o tauva i le pi’iga a A’oga Maualuluga a lo tatou teritori, susu mau e tapua’i faiva o nai a outou fanau ma ia fa’amalosi i o latou fa’amoemoe e manumalo ai!

O se fa’asologa lenei o togi ua agava’a ai a’oga ta’itasi o lo ’o tauva i lenei fo’i fa’agatama ma ua fa’afetai mai fo’i le ali’i o lo ’o fa’auluulu i ai ta’aloga Pi’iga i Amerika Samoa, Ethan Lake, i le mamalu o lo ’o latou sapaia pea lava lea fa’agatama i so ’o se taimi e fa’atautaia ai latou ta’amilosaga, ma isi fo’i taimi e fa’atautaia ai latou sa’iliga tau fa’atupega o latou fa’amoemoe. Afai e te fia tauva i lea fo’i fa’agatama ua mafai ona maua Ethan i lana telefoni: 770-1006 pe o le imeli: asa@fila-wrestling.com

saunia: Leua Aiono Frost

O togi nei o i ai i le taimi nei:

1st            Tafuna            53 points

2nd                        Faga’itua            48 points

2nd                        Samoana            48 points

3rd                                    Kanana Fou 46 points

4th            Leone            45 points

5th            Voc-Tech            14 points

5th            South Pacific            14 points

First place wrestlers:

92lbs            Niles Tuamoheloa            Voc-Tech

119lbs            John Scanlan            Kanana Fou

139lbs            Valentini Taua            Tafuna

145lbs            Sione Lui            South Pacific

152lbs            Shane Meredith            Tafuna

163lbs            Bruce Scanlan            Kanana Fou

187lbs            Nolan Puletasi            Kanana Fou

220lbs            Brandon Ripley            Faga’itua

264lbs            Stephan Sialega            Faga’itua

UNL            Eldon Finau            Samoana