Ads by Google Ads by Google

Agiagia tautua Rev. Uinifareti Rapi Sotoa e ui ua tuumalo

E ui ua fai i lagi le tuligasi’a a le susuga Rev. Uinifareti Rapi Sotoa, peitai e manatua pea galuega lelei sa ia faia i totonu o lona aiga, ekalesia, nuu ma le atunuu.

O le aso ananafi na lagomau ai le susuga Rev. Sotoa i lona aiga i Fagaalu, i le maea ai o ona toe sauniga sa faia i le malumalu a le ekalesia EFKAS i Fagaalu lava, lea sa molimauina e taitai o le malo, paia o aiga aemaise ai uo ma aumea mamae.

O le afioga i le Lutena Kovana, le tofa Faoa I. Sunia na fai ma fofoga o le kovana e momoli se molimau e tusa ai o le soifua galue o le alii faifeau, o ia foi lea sa tusia le ata o le Aeto o loo i ai i le fu’a a Amerika Samoa i le 1956.

Ua loa ona momoe i ti’asa le to’atele o i latou na tofu sao i measina a le malo, peita’i, fa’afetai ua fa’ato’a tu’ua lea o i tatou e Uinifareti Rapi Sotoa, ma ua avea fo’i ma toe fa’amanatu, ina ia tatou manatua i latou na ala mai ai fa’amanuiaga e tele a le Atua mo le tatou malo.

Lea ua faia le auaunaga a le Malo e pei o le auai lea o Malu o le Malo e tautuaina lona Sa ae a lana toe folauga i lenei olaga ma i tatou. Ua ta liu, ua to’ai taunu’u le tagata i lana toe faigamalaga e malolo ma fa’atali i lona Matai, ae mautinoa, sa ia faia lava lona sao mo i tatou, tatou te ola ai.

O le fa’afetai lena a le Malo, aua e silia ma le 30 tausaga o lana tautua Fa’afaia’oga amata mai i A’oga Tulaga Lua, ma fa’asolo mai ina avea ma Faia’oga i A’oga Maualuluga e aofia ai Samoana ma Manu’a High. I le a’oga o ana mataupu sa a’oa’oina ai, o le Igilisi ma le Numera, fa’atasi ai ma le Home Economics, lea e tau’avea ai le Kuka ma le Su’isu’i.

I molimau i le sauniga a le aiga i le afiafi o le aso Lulu, sa fa’ailo ai le olaga a’o talavou o Uinifareti Rapi, e matua mafuli i le fatuaiga tausi, e fesoasoani ai i lona Tina o Fa’ataualofa Sotoa.

O i’ina sa tapena ai o ia ina ia fai auliga, tagamea, kuka, tapena fale, teufale ma galuega fa’atina uma lava. O le afuaga lea o le manatu o nisi, e aga fa’atama’ita’i o ia. Peita’i, na leai se toe gagana ina ua o’o le auanaga a Uinifareti i le tautua i le USArmy mo le 10 tausaga.

Taliu mai ulufale i Malua, maua ai ma le afio’aga e tausia Ekalesia ai, ina ua mae’a fa’aipoipo ma lona faletua lalelei o Lupelele Fareti Sotoa. Ina ua fo’i mai Fareti i Amerika Samoa, e le’i toe fa’aaogaina ai lona tofi Failauga o le Upu, ae pau sana molimau, “Ua mae’a na fai le matala ma Lupelele, e nofo ia i Samoa, ae sau a’u i Amerika Samoa, ae le tatalaina le ma’ua fa’aipoipoga!”

I se molimau a se tasi o alo o lona uso o Iole Logona Sotoa, o Aliitama Sotoa, sa ia fa’ailoa ai, “O Fareti o se tagata alofa i so’o se tasi, e le fa’ailogaina sona atunu’u ma ni ona aiga! 54 tamaiti mai Thailand sa nonofo ma Fareti ma ia fa’atupea lo latou aumau ai i Amerika, a’o avea o ia ma pule o le Fale’aiga i San Francisco. O i latou uma na, ina ua toe fo’i ua mae’a a’oga ma maua galuega i le malo tele, sa latou totogia le pasese o Fareti e malaga ai i le latou atunu’u e tafao ma o’o i o latou matua! Na fa’amatala e Fareti e pei o ia o se tupu i lona o’o atu, ua laulaututu fa’aitualalua mai matua o nei fanau uma, ma fa’afeiloa’i ma tausia o ia. Sa ia tofo i manuia o le Atua e ala i ana galuega alofa!

O le saua o Fareti, lenei ua matou popoto ai, e le fua tasi lava lena molimau, i ana tamaiti a’oga uma lava sa a’oa’oina, ua latou ‘ai i le ma’ini o lana sasa, ina ia popoto! Molimau nisi o ana vasega sa faia’oga ai, “E le fa’avaivai le sasa, e le fa’avaivai fo’i le ote, ae afifi ai le alofa ia e ola poto ma maua sau galuega e tausi ai matou aiga ma matua! Fa’afetai Fareti le alofa ma le a’oa’o mai, ua fua mai ia te’i matou au galuega!”

O lona Tuafafine o Sarona Ma’ae sa tutula’i e fai ma sui o tuafafine ma uso ina ia molimau i lona toe sauniga! Sa ia fa’amatala ai, le fatuaiga tausi sa ia faia mo i latou uma, ma latou fanau, e leai lava fa’apea ua i e se tamaitiiti, ua ola popoto ma a’oa’oina matou fanau, ona o ia! O ia o se tuagane, o se uso, o se tina, o se tama ia te a’u lava ia! E le fa’aletonu ma ofu ma Fa’auisa i taimi uma, e le ma’anuminumi se mea, e felesi mea uma, aua e faituafafine leaga tele mo i ma’ua! Fa’afetai Fareti lou tausi aiga, mataaiga, ae maise o lou mataalofa ma le loto alofa i o tatou aiga ma matou fo’i aiga ta’itasi.”

“Aua ua ou mautinoa, e le mafai e le oti, po’o agelu, po’o ali’i, po’o e malolosi, po’o mea i nei ona po, po’o mea atali, po’o le maualuga, po’o le loloto, po’o se tasi mea na faia, e le mafaia e ia mea ona fa’ate’aeseina mai i tatou, i le alofa o le Atua o lo’o ia Iesu Keriso lo tatou Ali’i.”