Vaega: 43

Fa’atalofa atu i lou alafai mai i le manuia i lenei taeao fou. E i ai le fa’amoemoe o lo’o maua pea e le atunu’u le manuia ma le soifua laulelei i le tausiga alofa a le Atua Soifua.

Ae alo maia o le a toe fa’aauau atu la tatou tala fa’asolo e pei ona masani ai. A’o le i amataina la tatou tala, se i vavae fo’i foe, i sina a tatou maea la’ititi lea ona fa’aauau ai lea o le tatou tala. E i ai se toeaina faifa’atoaga o si o matou nu’u. O le toeaina lea, e i ai lana manu o le asini, ma o le lima taumatau lea a si toeaina e fesoasoani malosi ia te ia. Ua o’o i le tasi aso, ua ala usu i le taeao le toeaina, ua fiu e tau vala’au lena asini, ae ua le sau. Ua lagona le popole po’o fea o i ai le asini. Na manatua vave nei e le toeaina e i ai le lua po’o le vaieli o lo’o i le isi itu o le fanua, ua fa’anatinati nei i ai le toeaina, ma le o’o atu, ma autilo i lalo, o lo’o tagi mai ai lana asini. Ua le mautonu le toeaina po’o le a le mea o le fai, ma ua i ai fo’i lona manatu ua lavea le asini, ma ua le toe aoga i se feau.

Na alu nei le toeaina ma ta’u i le isi ona tuaoi ma ua o mai ai loa ua asu ia palapala i totonu o le vaieli lenei, ina ia tanu ai le asini, ona o le manatu o le toeaina ua tigina le asini ma e sili ia ona tanu ai ae aua le faatigaina. Ua asu nei i totonu e toeaiinna ia palapala, na fa’ateia toeai’ina ina ua va’ai atu ua ea a’e i luga le ulu o le asini. Ua tilotilo le tasi i le isi, ma lulu o la ulu, na faateia ina ua fai mai le tala a le asini, “Oe lea, ua galo ia te oe lo’u aoga, a ou pologa e tausi oe ma fai mea e maua ai au tupe, ae ua e le alofa ia te a’u….ia sau loa o le a ‘ai oe.”

A’oa’oga. Tausi lelei nai a tatou asini, pe va’ai atu ua toeaina pe ua lo’omatua, matua’i fuli e milimili lelei ma fa’amalie lelei le loto o le asini.

Ua taunu’u nei Agelu a le Ali’i i Satala, ma ua o latou iloa ai le tele o le mau mea o lo’o tutupu. E taunu’u atu, ua o’o i le taimi e tufa ai siaki totogi a tagata faigaluega. Ua le mautonu Agelu, pe o le a lea mea e tupu, aua o isi tagata o lo’o fa’apupu’u i tua o koneteina, o isi o lo’o u’uu’u lima ma savavali solo, o nisi o lo’o fai talatalanoaga. Na fa’apea ane nei le tala a le Agelu ulavale, “Sole, se ua tumu lalo nei se…leitioa lava Kapilielu i luga a tau oso le ma’i fatu.”

Na taunu’u Agelu a le Ali’i ma ua nofonofo nei i luga tonu lava o le fale o le kamupani ma tilotilo ifo i tu ma aga a tagata o lo’o fai nei. E le i umi lava, ae va’aia loa e Agelu se mea mata’utia. Na ona tu lava o le ta’avale, oso mai fafo se tamaloa lapo’a lava ma savali mai loa i le itu lea e tumutumu atu ai tagata.

E savali atu lava le tamaloa lenei ma tau vala’au atu, “O fea o i ai le ali’i lea e pule i tou sifi lenei, o fea?....fa’asino mai ia te a’u…po’o le a le mea e nofo ai ma fa’atautala lo’u to’alua, fa’asino mai ia te a’u, se i iloga lava e ta’ei mata fa’atoa tu’u lea o le fia ulavale.”

Na oso ane nei le isi tamaloa e masani ma le ali’i lenei, ma fesili loa, “Lima, o le a le mea ua tupu, se to’a mai, o le a le mea ua tupu.? Ua tau to le sela o la’u tama lapo’a lenei, ma tau ai atu le tala ia Ti’a.

“Ti’a, o lo’u to’alua e le toe faigaluega, o la e ta’atiatia i le fale, na ou fasia ana po, anusa, o galuega uma e manava atu i le ta o le lua po’o le ‘afa fo’i o le lua, ae alu atu lava ana galuega ua oso a’e le mata o le la.” E fai lava tala a si toeaina ma punou ifo ua maligi ona loimata.

“Ti’a, o mea lava nei e tupu ai le leaga o aiga, o le o mai o nei mea o fafine e faigaluega, ae o mai ‘ese mea e fai. Ua na o lo’u tigaina e tatalo, tatalo i po ma ao, ae va’ai i faiga ia e fai nei, ae alu atu ia si o’u uso e au mai le siaki a Sieni ou te alu ma a’u e fa’atau ai se matou mea’ai.”

Ua alu nei le tali e, a Agelu a le Ali’i, ua iloa lelei lava, o le mafua’aga o nei faiga uma, o le fia maua lea o le siaki e fa’atau ai le fagu lanu meamata, a ma’ea lea, ona fa’atau ai lea ma le fagu lanu mumu. Ua ‘ata le Agelu ulavale ma fa’apea ane, “O koga koga mea lava nei ua leaga ai le lalolagi, o uiga nei, ua atili ai ona le manuia mea uma.”

E faia pea