Ua fa’ailoa mai e le Associated Press, ua laina tutusa nei Isaraelu, Ausetalia ma Aikupito ma le malo o Afakanisitana i le fa’atulagaga fou ua fa’aigoaina: “UO AE LE SE TOTINO O LE NATTO” o se feagaiga e mafai ai ona sapalai atu e Amerika a latou meatau ma ua mafai ai fo’i e Amerika ona fesoasoani malosi i lo latou saogalemu e ala i osofa’iga ma fevaevaea’iga e ono tutupu ia i latou.

O le fa’atulagaga fou lea mo Afakanisitana, ua tu’u i ai e le Malo Amerika, ma ua fa’ailoa patino atu e le Failautusi o le Setete Hillary Clinton i sana asiasiga sa tete’i lava Afakanisitana ua tu atu i le vaiaso na te’a.

O lea fo’i fa’asalalauga ua faia, ae le’i fono le vasega o malo o lo’o tetele a latou foa’i i le Natto, lea e faia i Iapani, lea e talanoaina ai le tula’i ese o le Natto mai Afakanisitana i le 2014.

O le vasega fo’i o malo uma o le Natto, ua i ai le fa’atulagaga e tatau ona latou foa’ia mai le $4piliona mo galuega toe fa’aleleia o lea malo pa a i’i ina tula’i ese.

Peita’i, ua fa’aalia mai e le Faletupe Tutotonu o Afakanisitana, e silia ma le $4piliona le vaega tupe e mana’omia ona toe fa’aleleia ai le latou atunu’u.

Peita’i, o se sui sinia o le Malo o Peretania, sa ia fa’aalia sona taofi, o le faiga lea e mo’omia ai ona foa’ia atu lea 4piliona, o se lu’iga tele mo malo uma o le Natto i le taimi nei.

I le taimi nei, ua matua mana’omia lava e Afakanisitana le fa’amaoniga maumaututu, e faia atu lea foai mo i latou e malo uma o le Natto a’o le’i tula’i ese. Peita’i, ua fa’ailoa mai e i ai aiaiga e ono mo’omia e Amerika ma malo uma o le Natto, e tatau ona usita’ia e Afakanisitana. O ia mea e masani lava ona mana’omia le faigamalo e lelei mo tagata uma ma ia iloa e tagata uma ae maise o Malo o le Natto le fa’aaogaina o lea vaega tupe.

Ua mae’a ona talanoa Hillary Clinton ma Peresetene Hamid Karzai o Afakanisitana ma ua sainia fo’i feagaiga e tu’u ai i latou i lea faiga fou i lo la va ma Amerika, ma ua fa’ailoa atu ia i latou, o lea feagaiga e le tatau ai ona toe fesiligia e i latou le tu mai o Amerika e fesoasoani pe a o’o ina tula’i ese uma a latou vaega au, fa’atasi ai ma le Natto.

I le fonotaga na faia i Chigago, na fa’ailoa atu ai e Pperesetene Barrack Obama, “E le taitai ona tatou fa’amamulu atu Afakanisitana, tusa lava pe ave’esea uma mai ana vaega au mai Kabul.”

I le masina o Me i le tausaga nei lava, sa mua’i sainia ai fo’i e Obama ma Karzai le latou feagaoga e fa’atulaga ai le so’otaga vavalalata o Militeri a Amerika ma Afakanisitana, pe afai ae tula’i ese mai uma vaega au i le tausaga e 2014.

E afua lea tulaga, ona e manatu le tatou peresetene, pe afai ae fa’amamulu ese atu e Amerika Afakanisitana, e tauau e toe fo’i ai lea malo i se faigamalo sili ona vaivai, ma osofa’ia mai fo’i i latou e le tele o vaega tete’e e pei ona sa sau a’i muamua, a’o le’i faia le faigamalo fou ua i ai nei. E le’i taitai fo’i ona mautu lo latou tamaoa’iga e mafai ai ona tutu i latou i o latou lava vae e fesaga’i ma o latou fa’afitauli fa’apena.

I le taimi nei, ua matauina fo’i le toe fa’ateleina mai o osofa’iga a Talipana, ma ua mafua ai ona lagona e Amerika, e ao ina faia nei feagaiga e fa’amautu ai lagona o Afakanisitana, e fesoasoani atu lava Amerika ia i latou.

saunia: Leua Aiono Frost