Afaina tamaoaiga pe a leai se auala e taofia ai Ma’i Suka

E talitonu le Faatonusili o le Matagaluega o le Soifua Maloloina, afai e le faia se gaioiga e vave taofia ai le faatupulaia o le Ma’i Suka i le atunuu, pe faalauiloa fo’i ni aoaoga ina ia iloa ai e tagata le leaga o lenei gasegase, e ono afaina atu ai ma le tamaoaiga o le atunuu atoa, i le tele lea o tupe o le a alu e tau togafitia ai i latou e maua i lenei gasegase le pipisi.

 

“Sa ou faailoa i le fonotaga sa faia i Samoa i le vaiaso na te’a nei, le tulaga matautia ua i ai le ma’i suka i le teritori, i le faatupulaia lea o tagata e aafia ai, amata mai lava i tagata matutua seia oo i tamaiti laiti,” o le saunoaga lea a Motusa Saoluaga Nua ina ua fesiligia e le Samoa News i le faaiuga o le vaiaso nei, e tusa ai o le fonotaga sa faatasi atu ai i Samoa i le vaiaso na te’a nei.

 

O le fonotaga lona fa i le va o Samoa e lua (Fourth Annual Bilateral Summit on non-communicable diseases (NCDs) lea na faia i Apia, mo le talanoaina o auala e tete’e atu ai i faama’i le pipisi e pei o le ma’i suka ma isi lava gasegase.

 

O le au malaga mai Amerika Samoa nei sa autova’a atu mo lea fonotaga sa aofia ai sui o le Matagaluega o le Soifua Maloloina, faapea ai sui o le Falema’i o le LBJ i Fagaalu, lea fo’i na feiloa’i ai ma sui o le Matagaluega o le Soifua Maloloina ma le Falema’i a Samoa.

 

I le avea ai o ta’umafa o se ki malosi lea o le soona pipisi o nei ituaiga faama’i, na saunoa ai Motusa i le Samoa News e faapea, “afai e malamalama le tagata i aafiaga o le fiafia e tausami i soo se meaai, ona ia lagona lea e tatau ona i ai lana vaega e fai ina ia puipui ma taofia ai le faatupulaia o tagata e aafia i lenei gasegase.”

 

Na taua e Motusa e faapea, o le autu o le fonotaga sa latou faatasi atu ai, o le vaavaai lea o motu e lua i auala e taofia ai le faatupulaia o lenei gasegase.

 

“E tatau ona tatou vaavaai i tatou meaai, e tatau foi ona maua le faamalositino ma ia ola maloloina tagata o le atunuu,” o le saunoaga lea a Motusa.

 

I se faatalatalanoaga a le alaata o le TV3 a Samoa ma le tofa Motusa i le vaiaso na te’a nei ina ua maea le ulua’i aso o le fonotaga, na faamanino ai e le alii faatonu le tulaga o lo o i ai le gasegase o le ma’i suka i le teritori.

 

“Afai e le faia e Amerika Samoa se gaioiga e foia ai le ma’i suka, o le a tele tupe a le atunuu atoa e alu i le tau togafitiina o lenei ma’i,” o le saunoaga lea a Motusa i luga o le TV3.

 

Saunoa Motusa, o nisi o auala e ao ia Amerika Samoa ona faia e tau taofiofi ai le ma’i suka, o le faia lea o aoaoga ma faalauiloa i tagata le leaga o le ma’i, ina ia silafia e le atunuu ma nofouta ai.

 

O se faataitaiga e pei ona taua e le alii faatonusili i lana saunoaga, o le 75% o le paketi a le falema’i o lo o alu i le togafitiina o gasegase le pipisi e pei o le ma’i suka ma le vaega o lo o faamama toto.

 

“O lo o faatupulaia pea le aofa’i o tagata e maua i gasegase nei i Amerika Samoa, ma o le tele o tupe o lo o avatu i le falema’i o lo o alu uma e togafiti ai tagata o lo o aafia i gasegase le pipisi nei,” o le isi lea saunoaga a Motusa.

 

I le taimi nei i Amerika Samoa, ua latalata i le toa 140 le aofa’i o i latou ua faamama toto, ma o lea aofai e aofia ai ma se tamaititi e 11 tausaga le matua e pei ona saunoa Motusa.

 

“O se tulaga ua tatau ai ona mataala tagata Amerika Samoa ma o latou vaai i le mafuaaga o lenei faafitauli,” o le isi lea saunoaga a Motusa.

 

O le aoaoina o tupulaga talavou i taimi nei ina ia latou iloa le matautia ma le afaina o gasegase le pipisi nei i le lumana’i, o se tasi lea o auala ua manatu le Soifua Maloloina i Samoa e lua e tatau ona faia ina ia foia ai lenei faafitauli.

 

“O le isi auala o le tatou toe vaavaai lea i meaai o lo o tatou aai ai, o iina le fatu atoa o le faafitauli lenei, a lelei meaai ua soifua maloloina le atunuu, ae a soona tausami loa ua maua i le ma’i,” o le saunoaga lea a Motusa.

 

O lo o faaauau pea tuuga na afua mai i fonotaga sa faia i le 2012 e pei ona saunoa Motusa, mo le faamalosia o puipuiga ma ta’iala i gasegase le pipisi uma nei e aofia atu ai ma le faafitauli i le sikaleti, ma le faamoemoe o le a tuu atu i le Fono Faitulafono se tulafono, e faailoa ai le avea o gasegase le pipisi nei ma tulaga ua aafia ai le soifua maloloina o tagata.

Comment Here