Login

Fa‘alauiloa suafa o sui mae’a ona lesitala mo le palota

O le 4:30 i le afiafi o le Aso To’ona’i na te’a nei, na tu’u aloaia mai ai e le Ofisa o Palotaga a le atunuu suafa o sui tauva uma ua mae’a ona lesitala, mo le palota tele a le atunu’u i le aso 6 o Novema.

E ono paga ua maea ona lesitala mo le tauvaga i le tofi Kovana ma le Lutena Kovana; to’alima mo le tauvaga o le tofi Faipule i le Konekeresi, ma le to’a 61 mo tofi Faipule i le Fono Faitulafono.

I le lisi mo i latou ua maea ona lesitala mo tofi faipule i le maota o sui a le Fono Faitulafono, e na o le Itumalo #11 e toatasi le sui ua maea ona lesitala lona suafa mo le palota, o ia foi lea o loo avea ma faipule o le itumalo i le taimi nei, le afioga ia Faimealelei Anthony Allen.

Mai le to’a 61 ua maea ona lesitala o latou suafa mo le tauvaga a le maota o sui i le Fono Faitulafono, o le to’aono sa avea muamua ma faipule.  E toatasi le Senatoa o lo o nofoia le nofoa a lona itumalo i le nofoaiga o lo o i ai nei, ua maea ona lesitala lona suafa e tauva mo le tofi faipule i le palota o lo o loma nei, o le susuga Fuata Dr. Tagiilima F. I’atala, mai le Itumalo #4.

O le afioga i le alii faipule ia Agaoleatu Charlie Tautolo o lo o nofoia le nofoa o le itumalo i le taimi nei mo le tele o tausaga, peitai e le o i ai lona suafa i le lisi sa tuuina mai e le Ofisa o Palotaga ina ua maua mai se fa’aaliga, ua saunia lea sui faitulafono e litaea mai i ona tiute fa’alemalo.

Mai Itumalo Faapalota e 17 o lo o vaevae i ai le palota a le maota o sui, e tolu itumalo e na o le to’alua sui ua lesitala mo le palota, o le Itumalo #7 lea o loo tulai mai ai le Lemapu Suiaunoa Talo i le taimi nei; Itumalo #10 lea o loo tulai mai ai Tuumolimoli Saena Moliga; ma le Itumalo #14 lea o loo tulai mai ai le Fofoga Fetalai o le maota o sui ia Savali Talavou Ale.

O isi itumalo e taito’a 3 a latou sui ua lesitala e tauva, o isi e taito’a 4 e aofia ai ma le Itumalo #12 e to’alua ona sui i le maota, ae o isi e ta’ito’a 5 sui tauva. Pau le Itumalo e to’a 8 ona sui tauva ua maea ona lesitala, o le Itumalo #15 o Tualauta.

Ina ia tusa ai ma le Vaega 6.0302 (a) o le Tulafono Toe Teuteuina a Amerika Samoa, o loo i ai le aia tatau i soo se tagata ua aloaia ona palota na te fesiligia ai soo se tasi ua taua o latou suafa i le lisi mo i latou o le a tauva i le palota.

Afai e i ai se tasi e fia failaina lea talosaga, i lalo o le tulafono, e tatau ona tuuina atu lea faasea i le Ofisa o Palotaga a le atunuu, ao lei tapunia galuega i le aso Tofi, aso 6 Setema i le itula e 4:30. O le talosaga ia tusitusia ma ia faailoa atu ai mafuaaga o le talosaga, faatasi ai ma le saini a le suafa o le tagata e ana ia le talosaga.

faaliliu Ausage Fausia



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.