Login

Tala o Fa’amasinoga

ausage@samoanews.com

TELE AVE TA’AVALE ‘ONANA MAUA POLOKA A LEOLEO

E to’a 10 ave taavale na mafai ona taofia e leoleo i le faaiuga o le vaiaso na te’a nei, ma tuuaia i moliaga e aofia ai le ave ta’avale ‘ona, a’o feagai ai le Matagaluega o le Puipuiga o le Saogalemu Lautele ma le latou poloka e faamalosia ai tulafono i luga o le alatele mo le tolu vaiaso.

O le taeao ananafi na tutulai uma ai i latou i luma o le Faamasinoga Faaitumalo, lea foi sa o latou teena ai tuuaiga faasaga ia i latou.  E to’afa na mafai ona tatala i tua ina ua o latou totogia le ta’i $500 ae o le isi toaono sa toe taofia i le toese i Tafuna, faatoa tatala i le taeao ananafi ina ua maea a latou iloiloga i luma o le faamasinoga.

Na taua e se molimau mai le vaega a le Ofisa o Leoleo e mata’ituina luga o alatele, e faapea, na amata taofia mai lava nisi o i latou nei i le po o le Aso Faraile ma le po o le Aso Toonai, seia aulia le vaveao ananafi.

O ni isi o ave taavale na taofia ma tuuaia e aofia ai se alii pailate ave vaalele i se tasi o kamupani vaalele i le atunuu, o Stanley Malae, ma se tamaitai o lo o malaga mai e fai ma sui o le teritori o Saipan i le fonotaga a le Vaega o le Gataifale lea o lo o usuia i le teritori i le vaiaso nei, o Francis Castro.

I faamaumauga na taua ai e faapea, o Malae na tafao i le fale kalapu o le Bowling Alley i le po o le Aso Toona’i na te’a nei, ma taofia ai e leoleo ina ua le tu lana taavale i le fa’ailo taofi (stop sign) o lo o i luma o le auala lea e afe ai i tua o le Bowling Alley.

Na taofia o ia e leoleo ina ua masalomia lona faafoeina o le taavale a’o ia tagofia le ‘ava malosi.

Ae mo le tamaitai o Castro, na taofia o ia e leoleo i le vaveao ananafi ina ua masalomia lona faafoeina o se taavale a’o ia tagofia le ava malosi, ina ua tulai o ia i luma o le faamasinoga faaitumalo i le taeao ananafi, sa ia ioeina ai le moliaga o le ave taavale ‘ona, ma faanofovaavaia ai loa o ia e le faamasinoga mo le 9 masina i lalo o tuutuuga e ao ona ia usitai i ai.

O nisi o ia tuutuuga e aofia ai lona totogiina o le salatupe e $100, avea o ia ma tagatanuu lelei, aua foi nei ona toe solia se tulafono ao i ai o ia i le teritori.

FOLAFOLA LE FANAINA O LE FAATAUOLOA

O alii e toalua ia na taofia faapagota mai e leoleo i le faaiuga o le vaiaso i Pava’ia’i, o lo o tuuaia i laua i lo la faia o ni gaioiga e save’u ai le nonofo filemu o tagata lautele, atoa ai ma lo la folafola o le tafanaina o le faatauoloa, ina ua fai atu i ai le faatauoloa e totogi atu le tupe o loo nofo aitalafu ai le isi o i laua i le faleoloa.

O le taeao ananafi na tutulai ai i luma o le Faamasinoga Faaitumalo le alii o Aperu Tauanuu ma Beaver Toai, ma o la teena ai tuuaiga faasaga ia i laua, ma ua faatulaga ai le isi a la iloiloga mo le masina fou.

E tusa ai ma faamaumauga a le faamasinoga o lo o taua ai e faapea, o le aoauli o le Aso Toonai na vevesi ai se inuga pia sa faia i tafatafa o le aoga tulaga muamua a Pava’ia’i.

Na taua e molimau i leoleo e faapea, sa faaumuumu le alii o Toai ma pisapisao, atoa ai ma lona lafo o upu mataga i tagata feoai. Na taua e le molimau i leoleo, o ia e aiga ia Toai, peitai e popole lona loto i le tulaga ‘ona ua i ai le ua molia, atonu foi o le a faa faigata e lona tina ona faafilemu o ia ona ua ova tele lona ‘ona.

Na taua foi e molimau le agai atu o Tauanuu ma Toai i le faleoloa e faatau mai ni a laua fagupia, ma maua ai loa le avanoa o le faatauoloa e fesiligia ai le alii o Tauanuu i sana aitalafu ua tolu masina e lei toe totogia, peitai na avea lea ma itu na ita ai le ua molia, ma amata ai ona la lafo upu le mafaufau, ma faia uiga le faaaloalo i le faatauoloa.

O le taimi foi lea o lo o tuuaia e le malo na folafola ai e i laua ua molia i le faatauoloa, lo la fanaina o ia.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.