Login

Fia manino Senatoa

ausage@samoanews.com
Se vaaiga atu lena i Lagisi e lua o loo vavao ai nei le atunuu, lea na faatau mai ma le faamoemoe e faaaoga e faaloloto ai uafu i Tutuila ma Manu’a, peitai e oo mai lava i le taimi nei o loo tu tu pea i le uafu o vaa faila e aunoa ma ni galuega o aoga i ai. (ata AF)

O le taeao a taeao lea ua faamoemoe e toe oo atu ai le Faatonusili o le Pulega o Uafu ma Taulaga i luma o le Senate, e faamanino i le komiti o le Faagaioiga o le Malo, po o totoe se tupe e faatupe ai galuega mo le faalolotoina o uafu i Tutuila ma Manu’a.

Saunoa le afioga i le alii Senatoa ia Velega Savali Jr, o ia foi lea o le taitaifono o le komiti, e fia malamalama le komiti po o i ai se tupe o totoe e faatupe ai galuega mo le faalolotoina o le uafu i Fagatogo, atoa ai ma uafu i e lua i Manu’a.

Na taua e Velega i luma o le maota maualuga i le taeao ananafi e faapea, e tusa ai o molimau ua oo atu i luma o le Komiti Suesue a le Senate (SIC), lea foi e avea ai o ia ma sui taitaifono o lea komiti, e $5 miliona le tupe sa faaagaga mo galuega e lua a le Pulega o Uafu, lea e aofia ai le faatauina mai o le vaa toso vaa, ma lagisi mo le faalolotoina o uafu i le atunuu.

“Ua mafua ona fia malamalama le komiti i le mataupu lenei, leaga e oo mai lava i le aso e lei faatinoina lava se galuega na mafua ai ona aumai Lagisi e lua ia o loo tutu ua leai se mea e aoga i ai, o le faalolotoina lea o uafu,” o le saunoaga lea a Velega.

“Ua ou maua le tala i ni ripoti mai le vaega faasalalau e faapea, o loo i ai le tupe o loo totoe mo le galuega lenei, peitai e tatau lava ona matua manino i ai le maota ina ia silafia foi e le atunuu tulaga o tupe ma galuega a le malo.”

Na taua e le faatonu o le pulega o uafu ma taulaga ia Matagi Ray McMoore, ua mafua ona tutu lagisi i le uafu ua le faaaogaina, ona o lo o faaauau pea le mataupu i le va o le malo ma le kamupani na faatau mai ai i Hawaii, le Marisco Ltd.

O lo o fia malamalama foi le Senate, i isi oloa ia na aumai i luga o Lagisi ina ua taunuu mai i le atunuu. (Faitau i le tala atoa i le lomiga i le Aso Gafua, Aokuso 20, 2012).

Sa fesiligia e le SIC ia Matagi poo fea ua ave i ai le mea pu’eata o loo taua na aumai i oloa nei, ae na tali Matagi, “ou te le o mauaina se tala sa’o e uiga i le mea pu’eata, ae o le mea pu’eata sa i lo’u ofisa, ae ai lava ua alu Terry ma ave.”

(O Terry Conden e pei ona taua e Matagi i lana molimau, o le inisinia a le malo na malaga mo le faatauina mai o le vaa toso vaa ma lagisi i Hawaii.)

Saunoa Velega, e tele le manaoga mo le toe faaleleia o uafu i Manu’a, peitai e le o manino mai i le taimi nei le mafuaaga ua tuai ai ona faagasolo le galuega.



Related



Comment Here