Login

Tala otooto mai le Fono Faitulafono

ausage@samoanews.com
SN file photo

FESILIGIA MAFUA’AGA UA TUAI AI TALOSAGA MO NONOGATUPE

Ua talosagaina e le afioga i le alii faipule ia Puleleiite Li’amatua Tefele Jr ia le faataunuuina o se iloiloga e fesiligia ai se tasi o mataupu o lo o atugalu ai le atunuu, e faasaga i le tautua a faletupe i le atunuu, mo le faatinoga o talosaga mo nonogatupe.

Saunoa le alii faipule e faapea, e toatele tagata o le atunu’u ua tuu fesili i le fia malamalama, pe aisea ua mafua ai ona telegese le faagaioiga o talosaga mo nonogatupe i le taimi nei.

Saunoa Puleleiite e faapea, o nonogatupe i aso ua mavae e tasi lava le vaiaso pe lua e faatali ai ae maua, peitai o le suiga lea ua maitauina i nisi o talosaga mo nonogatupe ua o o atu lava i le tai fa vaiaso o faatalitali, ae tulua foi le talia ma le teena.

Na taua e le alii faipule e faapea, afai ua i ai ni suiga fou ua faia e faletupe, e tatau ona logo le atunuu, afai foi ua mafua lea suiga ona o le tulaga vaivai ua i ai le tamaoaiga, e tatau foi ona silafia e le atunuu.

“O le mea lea ua i ai, e le o toe i ai se talosaga mo se nonogatupe o toe fai iinei, e faatumu lau talosaga ona lafo lea i fafo e talia mai ai pe teena foi,” o le saunoaga lea a le alii faipule.

O le komiti o le Sailiga Manuia a le maota lea o loo taitaifono ai le afioga i le alii faipule ia Toeaina Faufano Autele, ua taoto atu i ai le suesueina o lenei mataupu.

VIIA FUAMATU LE LOLOFI MAI O TURISI I LE TERITORI

Na viia e le afioga i le alii Senatoa mai Alataua ia Fuamatu J.V Fuamatu le tautua a le Ofisa o Turisi i le atunuu, ona o le faatupulaia o vaa meli o loo malaga mai ai turisi ua asia le teritori i lenei tausaga faapea ai ma tausaga ua tuana’i atu.

E fetaui lava le lolofi mai o turisi i le aso ananafi ina ua taunuu le vaa o le Sun Princess ae toe tauaofia loa le Fono Faitulafono mo ana galuega masani, i le tuanai ai o lana malologa e tasi le vaiaso le umi.

Saunoa Fuamatu, o suiga ua vaaia i le lolofi mai o turisi i le atunuu, e le gata o se atavaaia lea o le tulaga manuia o lenei atina’e, ae o se auala foi e maua ai e tagata faipisinisi tupe fou mo a latou pisinisi aemaise ai o le tamaoaiga o le atunuu.

O faanaunauga o le alii Senatoa, ia faaopoopo mai pea le aofai o meli mai fafo e ulufale mai i le atunuu, ina ia toatele ai turisi e fiafia e malaga mai i Amerika Samoa.

Na vaaia le tumutumu solo o le taulaga ma vaega eseese o le atunuu i le aso ananafi, i turisi na malaga mai i le Sun Princess lea na malaga mai i le motu o French Polynesian i le taeao ananafi, ma tuuvaa atu ai loa i Niu Sila i le afiafi ananafi.

E silia i le toa 2,000 le aofai o le pasese ma le auvaa na malaga mai i le vaa, lea foi sa vaaia ai le toatele o pasi ma taxi na faamanuiaina i le feaveaina lea o turisi e faamatamata solo i vaega eseese o le atunuu.

ATUGALU VAAMUA I LE AAFIA O LE SAMI ONA O LE SUAVAI LAFOA’I

Na taua e le afioga i le alii faipule mai Pago Pago ia Vaamua Henry Sesepasara sona atugaluga o loo i ai, ina ua maitauina tulaga aafia ua i ai ogasami o le Fagaloa, e mafua mai i le suavai lafoa’i mai le kamupani i’a a le StarKist Samoa lea o loo pamu i le sami i gatai tonu o le afioaga o Aua.

Na taua e Vaamua e faapea, ua maua i ni ripoti le faamutaina lea o le konekarate a le kamupani i’a ma se tasi o kamupani, lea sa masani ona o latou la’uina atu le suavai lafoa’i mai le kamupani i tai i le moana ma pamu atu ai, ma o le faanoanoaga lea ua maitauina, talu mai le taimi na taofia ai lea konekarate, ua tele le afaina o le sami i le Fagaloa, ona o lea ua le toe aveina le lapisi o le suavai lafoa’i e pamu i le moana, ae ua pamu lava i gatai o Aua ma lafoa’i ai.

“Soo se taimi lava e tulaga faaletonu ai le gataifale i gatai o le Fagaloa, poo ni otaota ma lapisi e lafoa’i ai, e i’u uma atu lava i gatai o Pago Pago ma to’a ai, ma o le isi lena faanoanoaga tele i lo’u sui faipule, ona o le a aafia atu ai ma le soifua maloloina o tagata o le atunuu aemaise ai lo’u itumalo,” o le saunoaga lea a Vaamua.

Sa ia taua foi e faapea, afai ete malaga i luga o le auala i Afono ma e vaavaai mai i le sami, e te maitauina ai suiga ua i ai le lanu o le sami i le Fagaloa, ua amata lanu enaena isi itu ae lanu paepae le isi itu, o iina e faailoa atu ai aafiaga ua i ai le gataifale e mafua mai i le suavai lafoa’i o loo pamu i ai.

Na faafetaia e le Sui Fofoga Fetalai o le maota o sui le finagalo o le alii faipule, ma taoto atu ai loa le mataupu i le komiti o le Faagaioiga o le malo, lea o loo taitaifono ai le afioga i le alii faipule mai Aua ia Faimealelei Allen, mo le faatulagaina o se iloiloga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.