Login

Fa’asea nisi o le aufai va’a fagota tulafono fou USCG

ausage@samoanews.com
Se vaaiga atu lena i nisi o va’a fagota alia o lo’o taula i le uafu o va’a faila i Malaloa (ata AF)

Na taua e nisi o le aufai vaa fagota alia i le atunuu, lo latou teena o se tasi o suiga fou ua faamoemoe le vaega o le U.S Coast Guard e faaopoopo i le pasiaina o a latou vaa fagota, ona o suiga fou nei o le a faaee atu ai le isi avega mamafa i o latou tauau ao taumafai ai lenei atina’e mo latou aiga.

“E ui lava o ni suiga e taua mo le saogalemu, peita’i mo a’u o se suiga o le a fa’ae’e mai ai se isi avega mamafa i la’u tama’i pisinisi o loo tausi ai lo’u aiga ma saili ai tupe mo le manuia o la’u fanau,” o le saunoaga lea a le alii Anetone Uaealesi, o se tasi o fai vaa alia i le atunuu.

Na taua e Uaealesi e faapea, o suiga e pei ona faalauiloa mai e le U.S Coast Guard, e aofia ai le faamalosia lea o ni suiga mo vaa fagota uma e ova atu i le tai 3 maila le mamao e fagogota ai i fafo atu o le teritori, ina ia mautinoa e ausia e vaa fagota laiti nei le malosi ma le saogalemu e faatulagaina mo soo se vaa fagota.

“Talu lava ona avea a’u ma fai faiva i le ova ai ma le 20 tausaga e le’i tula’i mai lava se faaletonu i la’u va’a, e le’i tafea foi pe na maliu se tagata fai faiva i la’u vaa, lona uiga o faaopoopoga fou o le a foufou mai e ono avea ma itu e faalavelave ai i la’u taumafaiga,” o le isi lea ana molimau.

O le taimi nei, o loo taoto atu lava i le au fai vaa le faitalia e asiasia ai e le U.S Coast Guard a latou vaa ina ia mautinoa, o loo ausia tulaga saogalemu i luga o a latou vaa fagota, peitai e tuana’i loa le aso 16 Oketopa 2012, ona faamalosia loa lea ona asiasia e le U.S Coast Guard vaa fagota uma.

O le suiga fou e pei ona faalauiloa e le U.S Coast Guard, o se tasi lea o suiga ua faaopoopo i le tulafono fetarale, Coast Guard Authorization Act of 2010.

Afai ae amata faamalosia e le U.S Coast Guard suiga fou i a latou tulafono ae maua mulimuli ane o loo i ai vaa e le o usitaia ia suiga fou, o le a mafai ona tuuina atu i ai ni faasalaga i vaa nei, ma o iina lea e afua mai ai faasea a nisi o le aufai vaa fagota.

Ae i le molimau a le susuga Telea Amituana’i, o se alii fai faiva mai Tafuna e faapea, e ui e aoga suiga ua faalauiloa e le malo tele, peitai e ao foi ona vaavaai i le malolosi o loo i ai pisinisi a tagata fai faiva i le teritori, pe a faatusatusa i vaa fagota tetele.

“Ua masani lava tatou i Samoa i nai vaa alia nei e maua ai ni tupe e fesoasoani i o tatou aiga, e le pei o vaa fagota tetele ia ua vaaia i le taulaga, o loo toatele tagata fagogota o loo galulue ai i luga, e silia foi i le ta 2 masina o malaga fagota,” o le saunoaga lea a Amituana’i.

O le faasea a lea alii e faapea, e oo mai lava i le taimi nei e lei maua lava ni fesoasoani mo nisi o le aufai faiva na faaleagaina a latou vaa i le taimi o le galulolo ia Setema 2009, o le toatele foi o i latou sa faaalu lava a latou tupe e toe faaleleia ai a latou vaa ona o le naunau, pau lea o le auala o loo maua ai tupe e tausi ai o latou aiga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.