Login

Fa’amaonia Glenn Lefiti ta’avale na aumai fa’atasi ma le Sa’ilele ma Lagisi

ausage@samoanews.com
Le Pulesili Ofisa Tiute ia Glenn Lefiti (ata AF)

Na manino i le molimau a le pule o le Ofisa o Tiute i luma o le Komiti Suesue a le Senate i le vaiaso na te’a nei, o taavale ia na pisa solo ai tala na aumai faatasi i le taimi na toso mai ai le vaa tosovaa o le Sailele ma Lagisi i le teritori, o taavale uma a le malo ma o loo faaaogaina e le Ofisa o Uafu ma Taulaga e oo mai i le taimi nei.

Ae o le isi taavale lea na maua mulimuli ane e patino i se tagata se toatasi, sa toe maua mulimuli ai e le malo le tupe mai lea tagata, ina ua totogi e le tagata lea le lafoga i le taimi na taunuu mai ai le taavale i le uafu.

O taavale e pei ona fesiligia na taua e le faatonu o Uafu ma Taulaga ia Matagi Ray McMoore i lana molimau e faapea, e taunuu atu i Hawaii ua maea ona faatau e sui o le Komiti Faapitoa sa tofia e le kovana taavale nei, ae ina ua fesili atu i ai poo fea e ave i ai nei taavale, ae sau le latou tali, o taavale uma nei e manaomia mo galuega o le faalolotoina o le uafu.

Na fesili Senatoa Velega Savali Jr ia Matagi pe sa i ai sana tala na toe fai e uiga i taavale ina ua taunuu atu uma ua ona faatau, ae na tali Matagi, “e lei toe faia i ai sa’u tala aua o lea ua uma ona faatau taavale.

Ae na taua e Lefiti e faapea, ina ua faia le faaiuga e tatala i tua taavale a le malo ia na aumai i luga o lagisi e faaaoga, sa faateia ai lona ofisa ina ua salalau le isi tala e uiga i le isi taavale fai mai sa faatau foi i tupe a le malo, ae o le taavale a se tagata faigaluega a le Ofisa o Uafu ma Taulaga.

Sa faia suesuega a lona ofisa ina ua sosolo le tala e uiga i le taavale lenei, ma maua ai loa faamaumauga e faapea, o le taavale sa faatau mai i luga o le igoa o le ‘malo o Amerika Samoa’, ae o loo saini ai le suafa o Fanene Sooto.

Na faamanino e Lefiti i le SIC e faapea, i faamaumauga i le taimi na kilia mai ai i tua le taavale, o loo taua ai o le afafine o Sooto na alu ma kilia mai le taavale i tua, sa faapea foi ona maua i a latou suesuega, e $5,000 le tau na faatau mai ai le taavale mai Hawaii, peitai na taua e Velega, “e tusa ai ma faamaumauga ua i luma o le komiti, e $14,000 le tau o le taavale na faatau mai ai,” ae na sii i luga e Lefiti le pepa o loo i ona lima ma faapea atu ia Velega, “tailo i ai pe sa’o lena mau, ae o le pepa lenei o loo faamatala mai ai le tau sa faatau mai ai le taavale mai Hawaii.”

Na toe fesili Velega pe sa totogi se tiute e aumai ai i tua le taavale, ae na tali Lefiti, “e $500 sa totogi, fuafua lava i luga i le tau o le taavale sa aumai ai.”

I le toe faaauauina ai o le molimau a Lefiti sa ia taua ai e faapea, a’o faaauau pea suesuega a lona ofisa, sa latou toe mauaina ai le tulaga lea, o le taavale lea sa sau i luga o le igoa o le malo o Amerika Samoa, e tutusa lelei lava lona ‘Vin #’ (Vehicle Identification Number) ma le ‘Vin #’ o le taavale sa aumai a Fanene, o le taavale lava lea e tasi.

Na fesili Velega poo fea la ua oo i ai le mataupu e uiga i le taavale lea, ae na tali Lefiti e faapea, “sa ou faalogo i le tala fai mai sa faia se fonotaga i luga o le Ofisa a Magelei [Logovi’i], fai mai ua valaau atu Matagi ma Sooto ma latou fono ai, ona ou manatu lea e sili ai loa pe a taoto atu i luma o Magalei le mataupu lea, ae te’i ua ou toe maua le isi tala mulimuli fai mai ua uma ona fofo le mataupu lea, ua leai se mea.” (O Magalei o le Teutupe a le malo)

O le molimau lea a Lefiti na faagau le malie ai Matagi i le ta’u ai fua o lona igoa i le taavale a Sooto, ma ia saunoa ai e faapea, “o se mea e fia faasa’o i le molimau a Glenn, e leai se mea o le a ta’u ai fua lo’u igoa i le taavale lea e ta’u ai le igoa o Fanene, aua le soona lafoa tala o lea fo’i e faalogologo mai le aufai news.”

Na vave ona faauilavea le taitaifono o le SIC ia Lualemaga ma taumafai e faato’a filemu le mataupu i le va o molimau, peitai na toe saunoa Lefiti, “o a’u tala ia e fai atu e le o ni tala moni, ae o tala sa ou faalogo i ai, ae le faapea ua ou tuuaia le afioga Matagi i le mataupu lea.”

Na taua e Velega, e tusa ai ma faamaumauga ua i luma o le SIC, le $61,000 le tupe a le malo  na alu i le faatauina mai o taavale nei, peitai e i ai le isi taavale o loo taua na faatau e le malo, peitai e oo mai i le taimi nei e lei oo mai i le teritori, ua fiu foi e saili i Hawaii e le o i ai se taavale faapena, ae ua i ai foi ripoti fai mai, sa toe tala i tua le tupe sa totogi ai le taavale lea.

O loo faaauau pea suesuega a le SIC e uiga i lenei mataupu.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.