Login

Tala o Fa’amasinoga

ausage@samoanews.com

TETE’E NIMAROTA FINA’I I ONA MOLIAGA

O le aso 5 Oketopa lea ua faatulaga e fofogaina ai le uluai iloiloga a le alii o Nimarota Fina’i, ina ua ia teena moliaga o loo tuuaia ai o ia e le malo i luma o le faamasinoga maualuga i le vaiaso na te’a nei.

O le tali tete’e a Fina’i sa faaleoina lea e lana loia fautua ia Mike White, lea ua tofia e le faamasinoga na te fautuaina lea ua molia i taualumaga uma o lona faamasinoga.

O le afioga i le alii faamasino ia Elvis Patea na faatautaia le iloiloga a Fina’i, ona o loo toesea le afioga i le faamasino sili atoa ai ma le faamasino sili lagolago.

O Fina’i o loo tuuaia i le faaoolima i le tulaga muamua, atoa ai ma le faatupu vevesi i nofoaga faitele, ona o se faalavelave na tulai mai i le lua masina talu ai i Leloaloa, lea o loo tuuaia ai o ia i lona tuiina lea o le papatua o le isi alii i se naifi ma manu’a ai.

Na taofia le alii na manu’a i le falema’i mo togafitiga ma toe te’a ai i tua, ae o Fina’i o loo taofia pea i le toese i Tafuna, ina ua le mafai ona ia totogiina le $25,000 sa faatulaga e le faamasinoga e tatala ai o ia i tua.

O le aso 5 o Oketopa lea ua faamoemoe e tatau ona oo atu i ai ua maua se tulaga tonu o le mataupu a le ua molia, pe faatulaga sona faamasinoga autu, poo le faia foi lea o se maliliega ma le malo ina ia faamuta ai loa lenei mataupu.

LOKA MO LE 90 ASO LE AVE PASI NA SOLA I APIA

O le alii ave pasi lea na sola ese ma le teritori i le 2008, ina ua faamaonia e le faamasinoga faaitumalo le moliaga o le ave taavale ‘ona atoa ai ma le fealua’i i le taavale i se laisene ua uma lona aoga, ua poloaina na te tuliina aso e 90 i le toese i Tafuna, ina ua faamaonia le moliaga o lona ave taavale ae o loo se’i lona laisene ave taavale.

Na maua e leoleo le alii o Rando Ripine o loo ia faafoeina se pasi la’upasese i le masina o Iuni, i le nofoaga o le maketi fou i Fagatogo.

I le fofogaina o lana faasalaga, na poloaina ai e le faamasinoga le faafalepuipuiina o ia i le toese i Tafuna mo le 3 tausaga, peitai sa faamalumalu le faataunuuina o lea faasalaga, ae ua faanofovaavaaia o ia mo le tolu tausaga i lalo o poloaiga a le faamasinoga, lea e aofia ai lona tuliina o aso e 90 i le toese, e pei ona faatonuina e le tulafono.

I faamaumauga a le faamasinoga sa taua ai, na toe malaga mai Ripine i le teritori i se pemita e 30 aso, ma ua poloaina o ia e le alii faamasino o Joh Ward II, a maea ona tuli lana faasalaga faa falepuipui, ona ia tuua lea o le teritori ae toe foi atu i lona atunuu na sau ai, ma aumau ai mo le umi e 3 tausaga o lana faanofovaavaaia.

FAATULAGA LE ULUA’I ILOILOGA A FAAFETAI KASIANO

O le alii talavou lea o loo tuuaia i lona taumafai e osofai se faleoloa i Koko Land i le lua vaiaso talu ai, e ala i lona tata’eina lea o le faitoto’a tioata o le faleoloa, ua faatulaga e le faamasinoga maualuga lana uluai iloiloga e faataunuu lea i le aso 5 Oketopa i le itula e 9:00 i le taeao, ina ua ia teena moliaga a le malo faasaga ia te ia.

O Faafetai Kasiano o loo tuuaia i le moliaga o le taumafai e talepe se faleoloa, faaleaga mea totino i le tulaga lua, atoa ai ma le faatupu vevesi i nofoaga faitele.

O tuuaiga faasaga ia Kasiano na afua mai ina ua vaaia e ni molimau lo la agai atu ma se isi alii i le faleoloa o le Hi Mart i Koko Land, ona ia faaaogaina lea o se pate baseball e ta ai le tioata o le faitoto’a ma ta’e ai.

Fai mai faamaumauga a le malo, e $128 le tau o le faitoto’a sa faaleagaina e le ua molia, ma o loo taofia pea o ia i le toese sei vagana ua ia totogiina le $10,000 ona faatoa mafai lea ona tatala o ia i tua.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.