Login

Suia o Aiaiga Pepa Nofo Mau i Amerika

O sui uma o lo’o aumau i Amerika ae le o maua i fa’amaumauga a le Ofisa o Femalaga’iga, ua amata nei ona tatala i ai avanoa e talosaga ai ni o latou pepa faigaluega ma nonofo pea i Amerika talu ai le faiga fou ua tatala fa’alaua’itele e le Peresetene e fa’asa’o ai o latou pepa.

Ua fa’ailoa mai e le Associated Press e 1.7miliona tagata ua mae’a o’o ane ma e agava’a i lea fesoasoani, ma sa amatalia e Peresetene Obama ia Iuni 2012 lea faiga fou, ona o mana’oga tupito sa talosagaina e tagata palota hisipaniolo o le atunu’u.

O le to’atele o nei tagata e le o maua i fa’amaumauga a le Ofisa o Femalaga’iga a le Malo tele, e o mai Amerika Latina, ma ua fa’ailoa mai e maua lava le 11.5 miliona o i latou nei. O nei mea uma, ua fa’ailoa mai e le ripapilikana, “O se faiga e aoga mo Obama i le palota ia Novema lea fo’i fa’asalafa o tulafono tau femalaga’iga ua fa’ataunu’u nei.”

Ua faia nei sailiga a le Matagaluega o le Saogalemu Fa’alotoifale, ma ua iloga mai e agava’a ai nisi o le fanau talavou e i le va o le 16 ma le 30 tausaga, e fa’aauau a’oga ma faigaluega i Amerika. I fa’amaumauga ua i ai nei a le DHS e tusa ma le 1.04 miliona le fanau ua mae’a talosaga ma talia i lea vala o nei tulafono o femalaga’iga.

O le fuafuaga fa’ataoto a le Peresetene, ia le toe fa’afo’ia le fanau i o latou malo, ae ua mae’a a’otauina i latou i tomai aoga i totonu o Amerika, ona ua loa ona nonofo i latou i Amerika, ua agava’a lava i latou o fanau a le atunu’u.

Pau mea ua sailia i nei fanau, o le va’ai toto’a pe mata sa solia e i latou tulafono matuia, ma ua atoa fo’i le lima tausaga o alaala ma a’oga i totonu o Amerika, e sili ona taulia, le tautua fo’i a i latou i le militeri.

O lo’o i ai nisi o lo’o latou masalomia lenei faiga fou, o se faiga lava e toe o’o ina maua ai i latou, nofoaga o lo’o alaala tumau ai, ma e toe saili atu lava i ai i latou i se taimi mulimuli, pe afai o le a manatu Amerika e toe fa’afo’i ia i latou, pe a le taulia latou tusi talosaga mo nei penefiti.

Peita’i, o i latou o le a talia a latou talosaga, o se mea sili lea ua mafai ona maua mo i latou e fa’aauau ai ona latou alaala ma faigaluega ma ta’ua i latou o sitiseni o Amerika. E le toe popole fo’i i latou ise mea e tupu mulimuli mai aua, o lea ua talia o latou pepa nofo mau ma faigaluega.

O lo’o i ai fo’i le tinoitupe e totogia mo le talosagaina o nei pepa nofo mau, ua fa’ailoa mai e $465. mo le tagata e to’atasi. E i ai isi tau e fa’aopoopo i ai pe afai e i ai ni mea e toe talosagaina e toe avatu mo le iloiloga o ou pepa mai le atunu’u sa e fanau ai. O mea na e afua ai ona popolevale isi aua e iloga mai, tauau e le talia lana talosaga, ma o’o ai ina fa’atonuina e tula’i ese mai le atunu’u.

O nisi sui o le ripapilikana sa fa’aalia lona taofi, “Afai o le taliaina o talosga a nei sui  e alaala ma faigaluega i Amerika, o le a tauva ma tagatanu’u moni lava o Amerika latou i avanoa faigaluega, o se isi lea mataupu e tatau ona va’ai toto’a i ai le Peresetene ma le Konekeresi.”

Ua mae’a fa’ailoa mai ituaiga fa’amaumauga e mo’omia mo le fa’auluga o lau talosaga mo nei fesoasoani ma fa’sao ai pepa nofo mau e faigaluega ai: pepa fanau, fa’amaumauga o togi i a’oga, fa’amaumauga o lou faila i le falema’i, faamaumauga o au tupe maua, tautua i le militeri, lau tautua i lou atunu’u ma nisi lava o pepa fa’amaonia mai loia e mo’omia e fa’amautu atili ai au pepa ua taua’aoina. Ua fa’ailoa mai e faitau masina lav o tatalia tali o nei talosaga, ae o nisi lava e vave ona maua mai. O sui talosaga fo’i, ua fa’ailoa i ai, aua lava ne’i tu’ua e i latou Amerika, i le taimi atoa o lo’o iloilo ai lana talosaga.

O lo’o i ai nisi fo’i auaunaga ua latou avea nei tautua e fesoasoani ai mo sui uma e fia fa’aulu latou talosaga, ma ua avea fo’i ma ala e maua ai latou tamaoaiga, ae sili lea aua, e masani i latou i aiaiga e mo’omia mo sui talosaga nofo mau.

saunia: Leua Aiono Frost



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.