Login

FALEPUIPUI LE ULUGALI’I NA TU’UAIA FAIGA FA’ATALITANE

ausage@samoanews.com

APIA, SAMOA - E ta’i 6 masina ua faasala ai i le toese i Tafaigata le ulualii lea na ta’usala e le faamasinoga maualuga a Samoa, i lo la faaaogaina lea o tupe sa maua mai i faiga faatalitane e ola ai, i le maea ai lea ona iloilo e le faamasinoga o mau a le malo sa tuuina atu i le taimi o le la faamasinoga.

O le tina ia Metala James ma lona toalua o Sanele Sanele, na poloaina e le faamasinoga la te totogiina ni salatupe i le aso Lua na te’a nei, a’o le’i taina le itula e 4:00 i le afiafi, ae afai e le mafai, o le a taofia i laua i le toese mo le tai 6 masina.

I se faamatalaga na tuuina mai i se molimau sa faamaonia ai, ua le mafai e le ulugalii ona totogi le la salatupe, ma ua faafalepuipuiina nei i laua mo le tai 6 masina.

E tai $800 le salatupe na faatonu e le faamasinoga Metala ma Sanele la te totogiina, ina ua faamaonia le moliaga o le ola lea i tupe na maua mai i faiga faatalitane sa tuuaia uma ai i laua, faatasi ai ma le isi salatupe e $500 mo Metala, ina ua faamaonia e le faamasinoga le moliaga sa tuuaia ai na o ia, o lona faamalosia lea o tamaitai na aafia e o i tamaloloa ina ia maua mai ai tupe mo ia.

O tuuaiga faasaga i lenei ulugalii na aliae mai i le masina o  Mati ma Iulai 2011, ina ua faailoa e ni tamaitai se toalua sa aafia i nei faiga lenei mataupu i leoleo.

O moliaga ua ta’usalaina ai lenei ulugalii, e mafai ona faasalaina ai i laua i le toese mo le umi e le silia i le tolu tausaga, peitai o nisi o itu lelei na mafai ona iloiloina e le faamasinoga mo i laua, na mafua ai loa ona faamama le faasalaga faasaga ia te i laua.

O nisi o itu lelei e aofia ai le tulaga lea, o le taimi muamua lenei faatoa solitulafono ai laua, aemaise ai foi, o tamaitai na aafia sa nonofo lava ia te i laua ma la tausia faalelei, ui o lea, na saunoa le tamaitai faamasino ia Mata Tuatagaloa, e fai lava si matuia o le gaioiga sa faia e lenei ulualii.

Ina ua faafofoga le faamasinoga i molimau a le malo na taua ai, e toalima tamaitai na aafia i faiga faasolitulafono a le ulugalii ua faasalaina nei e le faamasinoga, ma o i latou nei e faamalosia ina ia momoe ma tamaloloa e le o ni o latou taitoalua, ina ia maua mai ai tupe, peitai o nei tupe e faaaoga uma e Metala ma Sanele, e pei ona faailoa e tamaitai na aafia i luma o le faamasinoga.

O nisi o po pe afai e faatino e tamaitai na aafia faiga faafeusiaiga ma tamaloloa sa latou momoe, e totogi atu ai e tamaloloa nei tupe ia Metala ma Sanele, amata atu i le tai $20 e oo atu i le tai $50.

O loo tumau pea le poloaiga a le faamasinoga e taofia ai le faalauiloaina lea o suafa o tamaitai na aafia i nei faiga faalealofa.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.