Login

“Toe Tima’i Gagana Samoa i Tupulaga Talavou!”

reporters@samoanews.com
O se va’aiga i le vaega o talavou o lo’o aofia i le Kalapu Su’eala a le SDA Leone, ma ua fa’atautaia nei le polokalama o le toe tima’i le gagana Samoa i le faitau ma le malamalama ma ia tautala ai pea lava! [ata: Leua Aiono Frost]

Tatala Polokalama Humanities - Autalavou SDA Leone

O le afiafi o le aso Lulu, Aukuso 15, 2012 na tatala aloa’ia ai le polokalama fa’atautaia a le Humanties Council ua atofaina e fa’atino e le Autalavou a le SDA Leone, “Toe Tima’i le  Gagana Samoa i le Tupulaga Talavou!”

O lea polokalama ua fa’atulaga ai le susuga Teleiai Christian Ausage e avea ma Sikola e fa’atautaia a’oa’oga patino i lea manulauti aoga tele. Ma sa auai atu fo’i nisi o le Komiti Fa’afoe o le Humanities Council ina ia fa’amalosi’au i le Autalavou ma le laulauatofi fa’apea fo’i le fanau talavou a le Pathfinder a lea Ekalesia, ina ia mautinoa o lo’o aluga lelei lo latou fa’amoemoe.

I le tautalaga a le susuga le Fa’atonu o Polokalama fa’atautaia e le Humanities, Dr To’afa Vaiaga’e sa ia saunoa ai, “I lo matou vaitau, e fa’asa ona tautala fa’asamoa i a’oga, ae a o’o atu i aiga, e fa’asa ona fa’apapalagi. Ae fa’afetai, o lea ua o’o mai i lenei vaitaimi ua tau maua ni nanu fa’aalia ai manatu, aua o lo’o maua’a lava le gagana Samoa ona o nai matua!”

E tusa ai ma le taumafaiga o le a amatalia, sa ia fa’apea ai, “O lenei toe fafagu, e aoga tele mo tupulaga o lumana’i, aua o lenei lava vaitaimi, ua faigata ona toe tautala tupulaga ma le mautinoa i le gagana samoa, tusitusi ai ma le toto’a, ma ua le toe malamalama a’ia’i pe a mafai fo’i ona faitau tusitusiga i le tatou gagana.”

“Ona moni ai lea o le mau a le Humanities, O tupulaga o le aso, e fa’atamaoa’igaina le tupulaga o a taeao!”

O le taimi na tu’ua mo le folasaga a le ali’i Sikola mo lenei fa’amoemoe, sa ia fa’ailoa ai, “Ua fa’afetai i lenei Ofisa mamalu o le Kalapu Su’eala a le Ekalesia i Leone, ua mafai ona latou manatunatu i mea lelei ma toe taumafai ai e tima’i le fanau, ia iloa faitau ma le malamalama lelei i le gagana samoa, tusitusi, sipela ma tu’ufa’atasia fuaiupu i le gagana Samoa.”

Sa ia fa’aopoopo mai, “Ona o a’u o se faia’oga o le gagana, ua ou iloa lelei le faigata o i ai, i le olaga o le fanau talavou ona toe tautala i le gagana, ua matele ina vave atu le latou fa’amatala i le gagana peretania. O lea, o le taumafaiga lenei ua aoga tele, ma ua fiafia fo’i e fai ai se sao aoga mo tupulaga o lenei vaitau, ma isi tupulaga o le a fa’a’oaina ai i fua o lenei galuega o le a tatou faia fa’atasi.”

Ona o le amataga o lea galuega, sa tima’i ai fo’i i talosaga a le Ekalesia i lea lava afiafi, ia fa’amanuiaina le taumafaiga se’ia o’o ina mae’a. Ina ua tu’ua lea sauniga matagofie sa ta’ita’ia e le susuga le Faife’au Ragoso Tagaloa, ona fa’atasia lea o le vasega o le Ekalesia atoa ai ma le tupulaga talavou ua fuafua patino i ai le polokalama, ma sui mamalu fo’i, le ta’ita’ifono o le Humanities Iuli Alex Godinet ma le fa’atonusili Tofa Taua Niualama Taifane, i se ‘aiga i le Maota lava o le galuega i Leone, ma ta’ape ai le aofia.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.