Login

LAPATAIA TAGATA INA IA FAASAO LE I’A O LE MALIE

reporters@samoanews.com

Ua salalau i le atunuu lapataiga mo le faasaoina lea o le i’a o le malie, lea ua maitauina le amata ona galo atu mai ogasami sa masani ona nonofo ma tata’a ai.

O se Mau e aoga tele i le si’omaga o le tatou atunu’u, le vasa pasefika, ae maise le lalolagi atoa, aua o le Malie, o le fa’auluuluga lea o meaola uma i le alititai po’o le moana sausau. Ua fa’ailoa mai e Sawada, “E tali tutusa lelei le fa’asinomaga o le Liona i le vaomatua, ma le Malie i le moana. O le fua pito aluga lea o le fa’asologa o meaola i le moana sausau, ma e pau lava lona fili e mafaia ona fa’aumatia i latou ole “tagata soifua.”

Ona o se taumafaiga ua faliu lea Sosaiete “Fa’asao Malie o le Kelope - PEW” ua mae’a fa’amauina ai lea fa’asa i Hawaii, CNMI, Guam, Palau, Atu Malesala ma Fiti, peita’i, e ao ina fa’amau le li’o lea e aofia ai Amerika Samoa ma Samoa Tuto’atasi.

O le auga o nei mea uma, ua malaga mai foi le latou Fa’atonu Sili o le PEW, ma o le tama’ita’i lea o Jill Hepp, ma e fia o’o mai fo’i e molimauina se taumafaiga ua fa’atautaia fa’atasi e le latou sui Jennifer Sawada ma le Coalition of Reef Lovers lea e galue malosi ai le susuga Mike i Amouli.

Ona o le a tatalaina fo’i se Ofisa e fa’a’autu i ai galuega ma Auaunaga uma mo le Gataifale, le Tauese PF Sunia Marine Center, o lea ua agatonu ai fo’i lea taumafaiga mo le ‘Fa’asao o Malie o le Kelope.’

I le vaitausaga o le 1980 sa fa’atautaia ai pisinisi tuma’oti e latou te fa’aaogaina ‘apa’apa malie i totonu o Amerika Samoa. O le pisinisi lea sa fa’aigoaina, Samoa Sharkfins Company. Ua iloga mai ua le toe i ai i le atunu’u lea pisinisi, ae o ituaiga fagotaga nei sa mafai ona ‘ave’esea na’o apa’apa malie, ae toe lafoa’i le tino atoa o malie uma i le sami e le fa’aaogaina!

O le ituaiga faigafaiva nei ua lapata’ia nei le tatou atunu’u, ia taofia, ma ia lipotia i le Ofisa o le DMWR mo le fa’amalosia o tulafono tau fagotaga solitulafono i totonu o le tatou Malo. I le asiasiga a nei sui mai le PEW i Mapusaga Fou, lea sa fa’afeso’ota’ia e le susuga le Pulenu’u, Paepaetele Kilepoa Tuitama,  “O le a fa’alauiloa atili ai le aoga o Malie i le Si’omaga i le alititai ma le moana sausau, aua sa fa’atulaga fo’i e le Atua foafoa lona natura e aoga tele i le toe fa’afo’ia o le gasologa o mea’ai i le alititai, ina ia paleni.”

O le toe fa’atasiga matagofie mo lenei kemupeni fa’asao Malie, e faia i le afiafi o le aso Gafua, Aukuso 20, 2012, e fa’aalia ai le ata matagofie o Malie o le Sami, ma e fa’ai’u i se ata tifaga mo le mamalu e fa’atasia uma i le tatou Vetrans Memorial Stadium i Tafuna. ”O se avanoa matagofie lea ua saunia e le “Global Conservation of Sharks ma le Coalition of Reef Lovers” e fa’ailoa atu ai uiga matagofie o Malie o le Moana, o mea e mo’omia e nei meaola e ola fiafia ai, ma le matagofie fo’i o lo latou si’omaga i le alititai, pe afai ae i ai ma le Tupu o le Moana - Le Malie!”

O le ata fa’aalia mo le mamalu lautele i le afiafi lea i Tafuna e le totogia le ulufale, ae o le a maua le avanoa mo aiga uma e alaalata’i ai ma maimoa ma le fiafia i le fa’asoa mai a lea fo’i tautua aoga.

Moni ai le fuaitau a le atunu’u, “A i ai le i’a e le magafagafa, e ‘aia e le Malie!”



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.