Login

TOE SA’AFIAFIGA MO WARREN LEO FISHER

reporters@samoanews.com

O toe saafiafiga mo le alii faipisinisi, o se uo, o se tama foi, le susuga ia Warren Leo Fisher, e pei ona faataunuu ai ona toe sauniga i le malumalu o le ekalesia CCJS i Fagatogo, ma lagomau ai i lona aiga.

Na malaga mamao mai i le 17 o ona tausaga a’o tautua i le Vaega Au, i lea vaitaimi o le vevesi i fetaua’iga i le va o Malo, ae sa ia faia le auaunaga mo lona malo i lona olaga talavou. Na toe taliu i fanua ina ua mae’a to’afilemu malo, ma toe fa’ai’u a’oa’oga, ae a’otauina ai Warren Leo Fisher i tomai tau “Faufale tetele, Alatele ma isi galuega e fa’aaoga ai masini tetele!”

Na amata ana a’oa’oga i le Highland Park Elementary i Seattle Washington, soso’o ai ma le a’oga maualuga a West Seattle High. Ina ua mae’a lana auaunaga i le Vaega Au, sa amatalia ana a’oa’oga i le Seattle Pacifi College ma fa’ai’u ai i le Iunivesite o Washington i ana mataupu fa’a-Faufale ma Alatele.

I le tausaga e 1970 na taliu mai ai Warren Leo Fisher i Amerika Samoa ona o lona fia fesoasoani i le Kamupani a le J.J.Welcome Construction Company lea sa feso’ota’i mai i ai lana Kamupani i Uosigitone.

I lona to’ai taunu’u mai i Amerika Samoa na amata ai loa lana tautua:

Sa avea o ia ma Peresetene o le Southern Star Ltd., Sui Pres. Pacific International Engineering Ltd., Sui Pres. A.S. General Contractors Association, GM J.J. Welcome Construction Co., GM A&M Construction Company, Amataina le Fisher Brothers Construction, Fa’atau ma Fa’afoe le Pago Bay Restaurant [Solis Restaurant].

O nisi o galuega tetele sa mafai ona ia fa’atautaia, ma fa’amae’a ma o lo’o fai pea ma fa’ailoga ae o se molimau mautu o lona soifua tautua i le atunu’u.

Mai le vaitausaga 1970-1989:

 - Fausia A’oga Tulaga Lua i Olosega, Ofu, Sili, Fitiuta ma Pava’ia’i.

- Fausia Tau High School Manu’atele.

- Fausia le Malae Sese’e o Va’alele i Ofu Manu’a.

- Fausia Alatele i Ta’u

- Fausia Guardrails o alatele i Tutuila

- Fausia le Ala e Maila lona umi mai Aua i Afono

- Fausia Alatele i Aua ma Fagaitua

- Fausia  Auvai o Nuuuli, Pava’ia’i, Pago - Aua ma Vaitogi

- Konekarate fesoasoani fausaga Fale’ai Tafuna High

- Fa’alautele le Uafutele i Fagatogo

- Fa’atula’ia Pamu Vai ma le fausaga o le Fale mo le Vai - Iliili.

- Elia le Alavai ma le Sewer Fagatogo i Tafuna

Mai le vaitausaga 1990 -2000:

- Elia le Duct line mo le ASTCA mai Fagatogo, Utulei, Pago Pago Satala & Atu’u.

- Fausia le Alasavali EOB - Utulei

- Fa’akonekarate mo le Commercial Design Corp - San Francisco.

- Fausia le Fa’avae Sima o le School Lunch i Tafuna ma le Pakaga o Ta’avale.

O nei galuega uma, afai e te savalia pe ete va’aia, ona e iloa ai lea o le olaga galue o lea tama. O lona fatu, sa mausali ai lona taofi, “O galuega fausia, o le fa’avae mautu lea o foliga o Amerika Samoa, ma e gafatia e tagata Amerika Samoa ona fausia i o latou tomai ua i ai!”

O nisi na molimau e aofia ai le ali’i loia ma o se tasi o pule o le faletupe ANZ Amerika Samoa Bank Steve Watson, Mr. Wasko, le tama’ita’i o Fatima Langkilde, Tala Antoinette Fisher, lona afafine pele ma le atali’i ui’i o Miles-Lance Fisher.

O le pese sa lagina e le tina o Siloi Fisher, sa ia toe talosaga ai i lana manamea e saili ai te ia i le lagi lea ua muamua atu i ai, ae o ana upu fa’amavae sa ia fa’apea ai, “O se tasi lea o tagata aoga ua mana’omia e fausia ni galuega tetele mo le Tama o i le Lagi, aua e te tu’ua lau taleni, ia fau ia lava ni fale!”



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.