Login

Vavau a Samoa

Ni isi nei o vaaiga i ni isi o Vavau a le atunu’u i le motu tele i Savai’i, i gatai tonu o le afioaga o Tufutafoe.

E anoanoa’i nisi o Vavau o loo taooto i totonu o le nu’u o Tufutafoe i Savai’i, ma o nisi o nei Vavau o loo i ai mau e faamaonia ai mea sa tutupu i aso ua mavae.

ALA O UPOLU MA LE ALA O SAVAII - O le vavau lenei, e taoto i luga o le sami i gatai o Tufutafoe, ma, pe afai e te agai atu i le nuu lea, e te maitauina ai ni papa i gatai o le sami, ma o ia papa e agai atu lava i luga ma agai atu ai lava i le manava o le sami ma le iloa atu ai. Fai mai le tala faaanamua, o aso ua mavae, o Tufutafoe lava sa tele ina fono ai Saualii poo aitu a Samoa i aso ua te’a, ma o ia fonotaga e masani ai ona agai atu Saualii mai Upolu ona ui atu lea i le ala lea e taua o le ALA O UPOLU, ae o Saualii a Savaii, e ui atu foi i latou i le ALA O SAVAII.

Fai mai le tala ua oo i se tasi aso ona fono lea o Saualii ma ua le tasi o latou loto i le mataupu sa talanoaina, ma, o iina na maua ai le isi vavau e taua o le LUALOTO O ALII, ua lua ai loto pe ua le tasi sa latou manatu i ni mataupu sa talanoaina, ma o iina na mafua ai loa ona foliga mai ua malepe le fono faa faletui sa masani ona faia e Saualii a Samoa i aso ua mavae.

E eseese foi manatu e tusa ai o le vavau lenei o le LUALOTO, ona e taofi nisi o le atunu’u, o i na tuu eseese ai loto o Saualii o Samoa, ua tuu ese ai loto o Tamalii tuu ese ai loto i tufanua, ona faatafea lea i le sami, fai mai a oo atu i le vai e taua o le Vaiola ona toe ola mai lea. O le nofoaga foi lea na mafua ai le isi vavau e taua o le FAFA O SAUALII, poo se nofoaga faapitoa e faapotopoto uma i ai Saualii o Samoa. Ma o le tele o taimi e te faafofoga ai i ni faasalalauga i luga o le leitio pe afai o se mataupu taua o le a fuafua se aiga e talanoaina, ona faapea lea o upu e masani ona faaaoga e faleupolu, “O paia o le atunuu, e afua mai i le tai samasama o le Tuimanu’a seia paia le Lualoto o Alii na tauilo ai manu o malo.” O lona uiga, e taua tele le tulaga o le i ai o vavau nei e pei ona aofia ai i faaupuga mo le faalagilagiina o paia o Samoa.

Fai mai le isi mau, afai lava o le ala na ui atu ai Saualii mai Upolu e agai atu i le fono, o le ala foi lena e toe foi mai ai pe a uma le fono, e faapena foi i Saualii Savaii, ma o le malae sa usuia ai nei fonotaga e taua o le Malaeolevavau, ma o le malae lenei e i tua tonu ane lava o le ana lea e taua o le Ana o Vaatausili, le uso o Vaea lea ua liua nei e avea ma mauga, ma o Vaea lea sa nonofo ma le tamaitai o Apaula, le tamaitai mai Fiti.

PA LE SOPOIA- O le isi lenei vavau taua e pei ona faamatalaina mai e le aufai lauga o le atunuu, lea foi o loo taoto ai i totonu o le nuu o Tufutafoe, ona fai mai le tala, o le pa lenei, e i ai ona ‘ai, ma, a a le usitaia e se tasi, e le manuia se gasegase e sii atu. O le pa lenei e fausia i maa ma e le maualuga tele lona fausiaina, ma, fai mai le mau a Tufutafoe o le pa lenei e sau mai lava i Tufutafoe ui mai ai i lalo o le sami ma oo atu ai i Manu’a. I aso ua mavae, fai mai le tala a oo ina sii mai se gasegase mai se tasi nuu e pito atu i tua, e le mafai ona sopoia le pa lenei e se gasegase sii atu. Fai mai afai o se gasegase tigaina, e tatau ona sii faatolu atu ma tau i le pa ona toe sii mai lea, faatoa mafai ai ona sopoia le pa, ma e le mafai ona manuia le gasegase pe afai e lei uia ‘ai o le pa e pei ona i ai.  Soifua



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.