Login

Poloka faapitoa Leoleo e taofia ai le aveta’avale ‘ona

ausage@samoanews.com
O se va’aiga i poloka a leoleo i tausaga ua tuana’i, lea foi ua toe amatalia aua lava taumafaiga ina ia mafai ona saogalemu luga o alatele i femalagaiga a le mamalu o le atunu’u. [ata: SN]

E tolu vaiaso le umi o se poloka faapitoa a le Matagaluega o le Puipuiga o le Saogalemu Lautele lea na amataina i le po anapo, mo le faamalosia o le tulafono i le faasa ona ave se taavale pe afa tagofia le ava malosi i luga o le alatele.

E silia i le toa 30 alii ma tamaitai leoleo o le a fesoasoani i le faamalosia o lenei tautua faapitoa, lea o lo o avea o se vaega lea o le Polokalama ua ta’ua i le fa’aperetania o le “Drive Sober or Get Pulled Over.”

O lenei tautua faapitoa o le a amata mai i le 6:00 i le afiafi ae maea i le 6:00 i le taeao, na amata mai i le po anapo ma le faamoemoe e faamuta i le aso 5 o Setema 2012.

I se faatalatalanoaga ma le alii kapeteni ia Taaloloioufaiva John Cendrowski, o ia lea o lo o faauluulu i ai le vaega o Leoleo o lo o tautua i luga o le alatele, sa ia taua ai e faapea, o le latou auaunaga faapitoa lenei o le a aofia ai leoleo e laeiina le toniga, atoa ai ma leoleo e laei savili.  Ma o le a latou mataituina uma gaioiga a i latou e faafoeina taavale i luga o le alatele, ina ia mautinoa e le o filogia le ‘ava malosi ma le faafoeina o le taavale.

“O i latou o lo o faafoeinale taavale ae o loo ‘ona, o se tulaga matuia tele lea mo isi ave taavale i luga o le alatele, aemaise ai tagata savavali i luga o le auala.  O le fautuaga masani lava le atunuu e pei ona momoli atu e le matagaluega, aua e te fealua’i ‘ona i le taavale, afai ua e tagofia le ava malosi, nofo lelei i le fale, pe telefoni se taxi e momoli oe i le fale,” o le saunoaga lea a Cendrowski.

E tusa ai ma faamaumauga ua mafai ona tuuina mai, o lo o taua ai, ua silia i le 50 i latou sa mafai ona taofia ma molia e le malo i le ave taavale ‘ona, talu ona faamamaulina mai le tautua i le masina o Ianuari 2012, peitai o se itu e laki ai, e leai ni faalavelave tau taavale na maimau ai ni soifua o nisi o le atunuu i le faaiuga o le tausaga na te’a nei, e mafua mai ona o le ave taavale ‘ona.

O le fautuaga masani lava foi lea na saunoa i ai le Sui Komesina o Leoleo, le tofa Leseiau Laumoli ina ua fesiligia i sona finagalo e uiga i lenei auaunaga faapitoa a le matagaluega.

Saunoa Laumoli, e ui o se tautua ua masani ai le matagaluega, peitai e ao lava ona faamanatu i le atunuu tulaga o le saogalemu i soo se taimi i luga o le alatele.

Sa ia fautuaina ave taavale uma ina ia manatunatu i le saogalemu i soo se taimi e feoai ai i luga o le alatele, ma ia aua lava nei manatu e inu le ava malosi ao faafoe le taavale.

Soo se tasi lava e tausala e le faamasinoga i soo se solitulafono e aafia ai le ava malosi, aemaise lava i le ave taavale ‘ona, e masani ai lava ona fautua le alii faamasino o John Ward II ia i latou ia e faapea, “o le ‘ava malosi, e le o se uo lelei lea mo le tagata soifua.”



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.