Login

PU FA’ATIGA MATA

ausage@samoanews.com

Ua faaigoa e nisi o Senatoa ma Faipule tulaga omoomo i vaega eseese o le alatele o ‘pu faatiga mata’, ma ua tatau i le Ofisa o Galuega a le malo ona vave faia se auala e foia ai lea faafitauli, manu e le’i oo atu ina afaina tele tagata ma latou taavale.

E le gata ua taua e sui o le Fono ‘pu fa’atiga mata,’ ae ua taua foi le ‘fa’atiga mata’ o gaioiga o loo faia e le au vaega fau auala a le Matagaluega o Galuega a le malo, i le asuina lea o oneone e faatutumu ai pupu o le auala.

E leai se sui o le Fono e le’i faaleoina lagona faasea ma le le fiafia i le tulaga faaletonu ua i ai auala i soo se vaega o le atunuu i le taimi nei, aemaise lava i le taimi e loloto ai timuga, lea e faigata ai ona iloa le omo pe a oo ina gatasi faatasi ma alavai.

Ina ua fesiligia e Senatoa le Faatonusili o Galuega a le malo ia Taeotui Punaofo Tilei i le mafuaaga e ala ai ona tulai mai pea faaletonu i auala, na taua ai e le alii faatonu e faapea, o loo taumafai pea le malo e faagasolo galuega mo le faaleleia o auala, peitai o loo toatele lava aiga o loo faalavelave i galuega a le malo

Ae na saunoa Senatoa Velega Savali Jr, e lua lava mafuaaga e iloa e ia e mafua ai ona tutupu faafitauli ma faasea a le atunuu, afai o le atunuu lava ia ua tumu i le faasea, lona uiga e tala pepelo le matagaluega o Galuega a le malo, na o le faamoe mai lava o le Fono i a latou faamatalaga, ona toe foi lea ma nofonofo i o latou ofisa e leai ni galuega e faia.

O le alii Senatoa mai Nuuuli ia Levu Tulafono Solaita na faasea i le faaletonu o auala i totonu o lona nuu.

Saunoa Levu, maimau pe ana mafai ona faataga atu e le malo lona nuu e tofu ma le taga sima e faatutumu ai omoomo ma pupu o le auala, atonu o le a fesoasoani lea i le tulaga pagatia o loo i ai tagata.

“O nisi taimi a soona saoa  loa ni taavale i totonu o le nuu, ona tauai lea ina ia tau faalemu ai le soona o i luga o le auala, talu ai o le pefu ma tagata,” o le saunoaga faaataata lea a Levu.

Na taua e le alii faatonu e faapea, o le auala i Nuuuli ua maea ona sainia se feagaiga ma le malo mo le fausiaina, peitai ina ua agai atu le malo e faataunuu le galuega, sa faalavelave ai nisi o aiga ma ua i luma nei o le faamasinoga maualuga lenei mataupu.

E ui e lei faailoa e Taeotui suafa o aiga e toalua sa faalavelave peitai e mafai ona faailoa e le Samoa News e faapea, o aiga e toalua ua tuuina atu ni a laua faalavelave i le faamasinoga e uiga i lenei mataupu e aofia ai Muagututi’a ma Savusa, ma ua poloaina e le faamasinoga lenei mataupu ina ia tuuina atu i le Ofisa o Mataupu Tau Samoa mo sana faaiuga e iloiloina ai faasea a aiga.

O loo taua e sui o le aiga o Muagututi’a e faapea, o le feagaiga sa osia e le sao o le latou aiga ma le malo, sa sainia lea i le taimi ua aafia ai le sa’o o le aiga i gasegase eseese o le tino, ina ua tagata matua o ia ma ua faigata ai ona malamalama o ia i le uiga tonu o pepa sa ia sainia.

O loo taua foi e le aiga lea, o le vaega o le fanua lea sa taua i le maliliega ua sainia, o loo aofia ai ma se vaega o le fanua o Savusa, le mafuaaga foi lena o le aofia ai ma Savusa i lenei mataupu.

Saunoa Punoaofo, e tusa ma le $15,000 le tupe ua maea ona totogiina atu e le malo i aiga nei mo le totogiina lea o a latou meatoto o le a faaleagaina ona o le auala, peitai e foliga mai o lea ua faalavelave ae ua maea ona totogi le tupe.

E leai mafia ona faamaonia mai pe faamaonia lea molimau mai le alii faatonu. Sa ia taua foi e faapea, o le fuafuaga a le malo i mataupu faapenei, soo se taimi lava e faalavelave ai ni aiga i galuega a le malo ona o mataupu tau fanua, e le toe maimauina se taimi o le malo e faaauau ai ona taofia lea galuega, ae o le a me’i atu loa i le isi galuega o loo sosoo ai ma le fuafuaga, e le toe fo’i mai i le galuega ua faalavelaveina.

Sa fia iloa e Levu mai le alii faatonu poo ai aiga e toalua sa ia taua ua faalavelave, peitai o lea fesili na taofi e le alii taitaifono o le komiti o le Faagaioiina o le malo ia Velega Savali Jr, ona e talitonu le taitaifono, e le talafeagai ona talanoaina lea mataupu i luma o le komiti.

O le taimi nei, o loo faatalitali le malo i le taimi e taunuu mai ai a latou mea faata auala ina ia mafai ai ona toe faaauau le faaleleia o auala i le atunuu, pau le faafitauli o loo tulai mai, o nei gaioiga uma ua na o sina taimi lava e foia ai ona toe faaletonu fo lea pe a tetele timuga.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.