Login

MALIU ATALII O SYLVESTER STALLONE O SAGE M. STALLONE

O le alii tautaua i ata fitaga i lona igoa o Rambo, poo Sylvester Stallone ua faailoa mai le feagai o lona aiga ma se tala faanoanoa, ona o le maliu o lona atalii o Sage M. Stallone i lona fale i Los Angeles ina ua atoa ona tausaga e 36.

E tali foliga mai, ua sofa’i e le tagata le fatu o le tama lelei, ma o le a tauau ina o’o ai i se faiga, e sailia patino ai e Rambo le mea i lona malosi. Peita’i, mo le taimi nei, ua faia nei se malaga fa’apitoa a Rambo ma lona to’alua mo le 15 ai lenei o tausaga, ma lana fanau teine e to’alua, ma o lo’o ua aga’i atu nei i Falani i le va’a faila.

Ua fa’ailoa ma tapu’e mai ata o lea aiga o lo’o ua ulufale atu e nonofo i se tasi o faletalimalo tele i Paris, Falani, ma ua avea ma mata’ina i tagata lautele i lea a’ai le ali’i ta’uta’ua. Ua le toe kea tele Sylvester i le ata lea ua fa’ato’a fa’ata’ita’i ona fa’aalia i Lonetona ma Amerika, ae ua tu’u tia’i lava e ia, ona o le mea ua ali’i mai i si ona atali’i.

 I lana vaega o tama o ata ma teine o ata lea sa tu’u e latou te fa’alauiloa fa’atasia le latou ata tifaga fou lea, ua latou fa’ailoa mai, “E ui lava ona o Sylvester sa tatau ona i ai i lenei mea, ae ua matou tu’ua o ia e alu e fa’amavae ma lona atali’i, ma ia fai fo’i sona taimi lelei ma lona aiga, e toe fa’amaopoopo mai ai o latou lagona mafana i le mafutaga fa’ale-aiga.”

E ui ina tele ata tifaga o lenei ali’i ta’uta’ua, ae ua fa’ailoa mai, e matua ese ona uiga i lona aiga, i lana fanau ma lona to’alua. O se tasi e matua alofa lava ma puipuimalu i lana fanau. E le taitai ona ia le talia mea e augani mai ai lana fanau ia te ia, ae maise e i ai i taimi uma o le olaga o lana fanau.

Ua ia fa’ailoa mai i le vasega o tusitala o nusipepa ma televise, “Ia outou iloa, e le o mautinoa le ala ua maliu ai lo’u atali’i, ou te le fa’alavelave fo’i i a outou tala tusia ma fa’asalalauga, peita’i, ou te ‘ai’oi atu, ina ia outou taga’i toto’a i le olaga o lenei tama, e le’i molia muamua i se solitulafono, pe ua va’aia o faia ni uiga mataga i luma o nisi, ona talosaga ai lea, ia taofia nei mea uma, se’i o tatou mautinoa lava le afuaga moni ua maliu ai Sage. O lona olaga fo’i, e tau lava i lo’u fatu ona uiga malu ma le fa’afiafia tama!”

Sa ia toe faliu mai fa’ailoa mai i le vasega o tusitala, “E leai se tiga ua ou o’o i ai i lenei olaga, e tusa ma le to’esea o lo’u atali’i fa’apenei, ae ou te le’i i ai e fesoasoani ia te ia, i se mea na tiga ai!” O le taimi tonu lava na maliu ai lona atali’i, o le taimi lea ua fa’atasi uma ai Rambo, Arnold ma isi uma ali’i ta’uta’ua i le ata o le Expendables 2 i le a’ai o San Diego.

O se tasi o ali’i fai ata tifaga o Dolph Lundgren, sa ia fa’ailoa mai, “Ou te alofa tele ia Sylvester ma lana fanau, sa  ou tusi i ai ma ‘ave i ai la’u meaalofa e avea ma se fa’aputugatupe mo lana fanau.”

O le igoa atoa o lea atali’i o Sylvester o Sage Moonblood Stallone, ma sa avea ma se tasi e auai i lona ata tifaga o le “Rocky V” i le tausaga 1990 ma le isi ona ata o le “Daylight” i le tausaga 1966.

saunia: Leua Aiono Frost



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.