Login

MALAGA ALAFOTI TAALO KALAPU BRISTOL I PERETANIA

ausage@samoanews.com

O se tala faanoanoa lenei mo isi o le atunuu e fiafia i le taaloga lakapi taitoa 7, ae o se tala faifia lea mo le alii taalo o Alafoti Faosiliva ma lona aiga, ina ua sainia se konekarate e taalo ai lea alo tautaua o le atunuu ma le kalapu lakapi a le Bristol i Peretania.

Na pau le eseesega o le konekarate lea ua saini e Alafoti, o le a le taalo mo le au taitoa 7 a le Bristol ae o le a ia laeiina le numera 6 poo le numera 8 foi mo le au taitoa 15 a lea kalapu iloga ma tautaua i Peretania.

 E lei mamao atu foi na saini ai se konekarate a Alafoti ma le isi foi kalapu lakapi i totonu o Peretania, le kalapu o Toulous i Farani, ina ua faatoa maea le Ipu o le Lalolagi i le tausaga na tea nei, na piki ai loa Alafoti e taalo mo lea kalapu mo le umi e 6 masina.

O le filifilia ai o Alafoti e le kalapu lea mai Farani, na faavae lea i ni talanoaga sa faia i Niu Sila ao faagasolo ai le Ipu o le lalolagi, ma faafuasei ai loa ona maua le avanoa o Alafoti e taalo ai mo Toulous.

I le maea ai o lana konekarate lea, na toe taliu mai ai i le atunuu ma toe ofi atu i le au taitoa 7 a le Manu Samoa, i taamilosaga faaauau a le IRB e pei ona faagasolo ai i le tausaga na tea nei, lea o loo faatulaga mai ai Samoa i le tulaga fa ina ua maea taamilosaga e 8 sa faatautaia.

I ni faamatalaga o loo i luga o le upega o fesootaiga a le kalapu lenei o loo taua ai e faapea, o le sainia ia e Alafoti o se konekarate, o se tasi lea o tulaga ua leva ona tulimatai i ai le vaai a le alii faifeau ma le pulega a le kalapu, ina ua latou maitauina le tulaga taalo malosi o lenei alo o le atunuu i soo se taaloga sa fai ai o ia ma sui o Samoa.

O loo taua ai foi i ia ripoti se saunoaga a le alii o Alafoti e faailoa ai lona agaga fiafia ma le faafetai, ina ua maua se avanoa e ofi atu ai i totonu o lenei kalapu tautaua ma logologoa i Peretania.

O le ofi atu ai o Alafoti i le kalapu lenei, ua maua ai ma le avanoa la te feiloai ai ma le isi foi sui o le Manu Samoa i lana taitoa 7 o loo taalo ai, le susuga Fautua Otto.

O ni faamatalaga na faasoa mai e Otto ia Alafaoti na mafua ai ona unaia le loto o le nei alo o le atunuu, e fia maua sona avanoa e avea ai o ia ma totino o le kalapu, peitai o lea miti ua faataunuuina ina ua sainia lana konekarate i le vaiaso na tea nei.

Na taua e le alii faiaoga o le kalapu a Bristol o Liam Middleton e faapea, o se agaga fiafia ia te ia ina ua mafai ona taalo Alafoti mo lana kalapu.

Fai mai lana molimau, ua tele taimi o ia mataituina pea le taalo a Alafoti i au a Samoa, aemaise ai lava le tulaga o le pou e pei ona taalo ai i le laina i luma o le au taitoa 7.

O le tausaga e 2010 lea na siamupini ai le au taitoa 7 a Samoa i le taamilosaga atoa a le IRB, na avea ai Alafoti ma Mikaele Pesamino o alo o le atunuu na filifili mai i ai se tama taalo o le taamilosaga atoa, ma e ui sa faamanuiaina ai Pesamino i le faailoga MVP o le taamilosaga, peitai sa faamalieina le IRB i le tulaga mataina ma le maualuga sa i ai le faatinoina e Alafoti o le taaloga lakapi.

Ina ua salalau le tala e uiga i le malaga atu ai o Alafoti i Peretania mo lana kalapu fou, na faaalia ai e nisi e fiafia i le taaloga lakapi lo latou misia o lenei alo o le atunuu, aemaise lava o lea foi ua olioli mai le amataina o le taamilosaga taitoa 7 mo lenei tausaga.

Na taua e Auelua Papalii o Tafuna, o Alafoti, o se tasi lea o ana tama taalo e fiafia tele e matamata i lana taalo, aemaise lava le tulaga malosi o lana pue ma lana tamo’e.

“O Alafoti le isi tama ou te fiafia tele e matamata i lana taalo, e le gata e malosi toe saoasaoa, ae o se tagata foi e le fefe i se tagata, e osofai i soo se taimi aemaise lava i le taimi e latalata ai Samoa i luga o le laina sikoa a lana paga,” o le molimau lea a Papalii.

O le lagona foi lea o le susuga Peniamina Amituana’i, o se tasi o alii lakapi i se kalapu i le atunuu ina ua fesiligia e le Samoa News.

Na taua e Amituana’i, soo se taimi lava e o faatasi ai Alafoti ma Ofisa i le au taitoa 7 a le Manu Samoa, o taimi pito sili ia ona fiafia ai e matamata i le Manu Samoa.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.