Login

TAUA’I MISA MAMOE INA UA FAATE’A LEOLEO MAMOE

reporters@samoanews.com

Na fiu nisi o aiga tuaoi e nonofo latalata i le nofoaga lea e i ai le falesa o le aulotu lea ua faate’a le latou faifeau e pupulu fusuaga a nisi o fafine ma tamaloloa o le aulotu, ina ua taua le toe agai atu o aiga na teteva ma faatonu le toeaina matua o loo faauluulu i ai le lotu e toe faafoi uma atu a latou tupe sa lafo mo le atinaeina o le galuega.

O le vevesi lenei na tulai mai ina ua faate’a e le aulotu le latou Leoleo Mamoe ae totoe ai loa na o sina vaega o le lafu mamoe i le pa, ae o le toatele ua liu lotu e aofia ai ma nisi ua nofo fale ua le toe lolotu.

Na taua e se molimauina na faaooina maia le mataupu lenei i le Samoa News, o lea ua lua vaiaso talu ona faate’a le faifeau ae alia’a mai loa faafitauli e pei ona maitauina, ina ua agai atu nisi o fafine sa lolotu muamua i le aulotu ma fai i le toeaina matua o loo faauluulu i ai le aulotu, e toe faafoi atu tupe sa lafo e o latou aiga mo le fausiaina o le falesa fou lea e le’i fausiaina.

Fai mai le molimau, e faalua ona agai atu fafine nei i le falesa peitai e le’i maua atu le toeaina, ae o le o atu faatolu na maua atu ai loa le toeaina i lona fale, ma amata ai loa le vevesi seia oo ina faateteleina ma faaiu ai loa i futifutigaulu i luma o le falelotu, ae matamata i ai tamaiti ma tamaloloa.

O tagata ia na agai atu ma faatupu le vevesi, o i latou ia e lagolagoina le alii faifeau ua faate’a o Rev. Koneferenisi Apisaloma, ma o nisi o i latou nei na faavaeina le lotu peitai ua toe solomuli ona o lo latou manatu, e le o sa’o faaiuga o loo taitaiina ai le lotu, e aofia ai ma le faaiuga e faate’a le faifeau.

O le itu e laki ai le vevesi lea, e le’i manatu se isi e telefoni leoleo, ae sa taumafai lava e faatoatoa i lagona faatagata ekalesia, ona o le naunau ia aua nei manumalo le tiapolo i lagona o tagata ekalesia.

Fai mai le molimau, na ona oso lava o futifutigaulu a nisi o fafine, amata loa ona faalogoina gutu o le isi au maula ua amata ona lalau mea paia, ma ua faasolo atoa atu ai ma tamaloloa i le felafoa’i solo o folafolaga ma lima.

“Na vave lava ona faatoa filemu le vevesi ina ua laga atu nisi o aiga tuaoi ma taumafai e pupulu fusuaga sa faia i le isi itu o le malae, ma talosagaina ai loa e le toeaina matua o loo tu ai le ekalesia lana aulotu ina ia faapotopoto atu mo sa latou fonotaga, sei soalaupule se fofo o le faafitauli,” o le tala lea a le molimau ma ata.

“O le itu e malie ai, o mea paia na lililo peitai na aliali uma i le aso lea ina ua pa’ilima le au foga uumi, ma lalau ai loa e isi le overstayer o isi, ae lau e isi le faatau faapapa o isi ma le nonofo rent solo,” o le tala lea a le molimau ma ata.

O le toatele o aiga tuaoi e i ai o latou piitaga i le toeaina matua o loo faauluulu i ai le aulotu, o le mafuaaga foi lea na faatuai ai ona telefoni e nisi leoleo, ona o le vaai alofa isi nei tama matua o le a faatasina atu ai i nei mea faatauvaa, ae maise ai o le toeaina na muamua sasaina le isi fafine i le tootoo, ina ua fiu e fai atu i ai e soia le pisa ae le mafai lava le oso o le gutu, tau ai loa ma le tootoo i le papatua ma amata ai loa le vevesi,” o le tala lea a le molimau.

Ae ui lava i le vevesi peitai sa mafai lava ona toe faia se leleiga i le afiafi lea, ina ua vaaia e tagata le tutulu o le tama matua o loo faauluulu i ai le aulotu, ma ia talosagaina aiga uma o le aulotu ua o ese ina ia toe faatasi atu mo sa latou faatasiga.

“O le aso Toonai la o le vaiaso na te’a nei na toe maua ai se faatasiga tuu faatasi a le aulotu talu ona malepe mai i le taimi na faate’a ai le latou faifeau, ma e foliga mai e ono toe tuu faatasia le aulotu ma toe foi uma atu tagata e lolotu i le ekalesia.

Fai mai le molimau, o le itu e malie ai le aulotu lea, e muamua lava vaovao fusuaga i aso Toona’i pe a fai taaloga poo ni fonotaga ae a oo i le aso Sa ona vivii lea, fetagisi ma pepese i totonu o le falesa, pei lava e leai se mea na tupu.

Fai mai le isi toeaina, o tagata kerisiano faapea e moni ai upu o le pese a Misiluki Su’a, e na o laugutu e vivi’i i le Alii ae o loto matua mamao lava, peitai na taua e le molimau, e i ai lona talitonuga tusa lava pe o le tulaga lea ua i ai le lafu mamoe ina ua faate’a ese le leoleo mamoe, e i ai lava le taimi e toe fealofani ai mamoe ma toe galulue faatasi mo le manuia o le galuega a le matai.



THE NEW COMMENTS PROCESS

To make comments, you will need to register. You can register under your real name or use a 'screen' name. This way, people will be able to follow comments and make comments back and forth to each other. If you choose to use a 'screen name' no one will know your true identity. In either case, no email addresses will be available to anyone. It is an automated process. If you have questions, email: webmaster@samoanews.com

You currently are not logged in, please LOGIN to post comments.