TOE PISI FOI AUALA O LE A A’E AOGA

Ua mae’a fa’ataoto mai le mau a le Matagaluega o le Puipuiga o le Saogalemu Lautele, e lapata’ia ai le vasega o aveta’avale ina ia utagia le toe pisi fa’afuase’i fo’i o le mamalu fegasoloa’i o le atunu’u i alatele, ona o lo ua toe a’e a’oga e afua i le taeao o le aso Gafua a sau nei.

“Ia nofouta i tatou uma ave ta’avale, aua e afua mai le fanauiti fa’ato’a a’e i a’oga tulaga muamua ma tulaga lua, e o’o i a’oga maualuluga i le atunu’u, o le a a’e uma lava a’oga i lea vaiaso nei, ia tatou mata’alia ma ia fa’autagia le saogalemu o e uma o feoa’i i lau ta’avale fa’atasi ma e savavali i alatele uma, o lo’o i ou a’ao lo latou saogalemu.”

“Le fanau a’oga ma matua, ia alofagia, fa’aaoga ala savali ua mae’a vali lelei mo i tatou e kolosi ai alatele, ua faigata ona e manumalo i le fa’amasinoga pe afai e te le savali i ala kolosi ua fa’atulaga, ua e solia fo’i tulafono o le savali i le alatele pe afai e te le usita’ia ala kolosi ma ala savali ua mae’a makaina lelei.”

Leoleo o alatele, ua matua mata’alia lava i latou, ma e fa’atu lava lau ta’avale pe afai e va’aia ua e solia le tulafono e amata mai i fusipa’u mo tagata uma o lau pasese, tamaiti e si’i ae le fa’aaogaina nofoa o ta’avale ua i ai fusipa’u mo i latou, fa’atasi ai ma paka le tatau ae le fa’aaogaina pakaga mo pasi e tutu ai, ae o ese ma piki fo’i pasese.

Malae o Suigaula - Fa’amalositino & Sumba mo le Health Care:

Lea ua fa’alauiloa atu le fa’atasiga tele a Aufaigaluega uma i Falema’i Fa’aitumalo i le teritori, e amata mai i Foma’i se’ia o’o i a latou leoleo mata’alia, Tausima’i ma i latou e galulue i Potu talavai ma Ofisa Fa’amaumau, ae tainane le mamalu lautele ua vala’auina fa’aaloalo ia auai i se taeao e faia ai fa’amalositino, savaliga ma Sumba i le Malae o Suigaula a le Atuvasa i Utulei. O le a fa’atasi uma i ai outou, afai o i ai se mea e fia malamalama atili ai i auaunaga e fa’atino e nei sui ma e ofoina mai mo le mamalu lautele i nei falema’i, ia e o’o ane i ai mo sou malamalamaga.

O le taeao lea e manatu e fa’alauiloa ai le tausiga lelei ma le paleni o lou soifua maloloina. O le fa’amalositino e fa’aaogaina lea e fa’apaleni ai tagata atoa, pe a mae’a galuega ma tiute fai i ofisa ma tua fo’i i aiga.